8 წლის მაქსიმე კახიძეს ნიუ-იორკის მერმა ზოჰრან მამდანიმ თხოვნა აუსრულა და სახლთან ახლოს პარკი გაუხსნა .
ყველაფერი ორი თვის წინა დაიწყო: მაშინ მაქსიმემ ვიდეომიმართვა ჩაწერა და ნიუ-იორკის მერს, ზოჰრან მამდანის სთხოვა, მის სამეზობლოში მდებარე მაკ-კინლის პარკის სათამაშო მოედანი გაეხსნათ. მოედანი თითქმის ორი წლის განმავლობაში დაკეტილი იყო. მაქსიმეს თხოვნას შედეგი მოჰყვა – რამდენიმე კვირის შემდეგ პარკი გაიხსნა, თავად ბიჭი კი ქალაქის მერის, ზოჰრან მამდანის, ღონისძიებაზე მიიწვიეს.
„გამარჯობა ყველას. ჩემი სახელია მაქსიმე და ძალიან მიხარია, რომ დღეს აქ ვარ. მადლობა მერ მამდანის მოწვევისთვის, ამას ძალიან ვაფასებ. აბა, გინდათ გაიგოთ აქ როგორ აღმოვჩნდი? დაახლოებით ორი თვის წინ ჩავიწერე ვიდეო, სადაც ვთხოვდი მერ მამდანის, დაგვხმარებოდა მაკ-კინლის პარკში სათამაშო მოედნის გახსნაში. ის თითქმის ორი წელი დაკეტილი იყო. მაგრამ, იცით რა? რამდენიმე კვირის შემდეგ, პარკი საბოლოოდ გაიხსნა.
ასე რომ, მადლობა მერ მამდანის და ნიუ-იორკის პარკების დეპარტამენტს ჩემი აზრის მოსმენისთვის. ამას ძალიან ვაფასებ. ძალიან მნიშვნელოვნად მიმაჩნია პარკების გახსნა, რადგან ბავშვებს სათამაშოდ უსაფრთხო და სახალისო გარემო სჭირდებათ.
ჩემი მშობლები ყოველთვის მეუბნებოდნენ, რომ ჩემს ხმას მნიშვნელობა აქვს და მინდა მადლობა გადავუხადო მათ ჩემი რწმენისთვის და იმისთვის, რომ სტიმულს მაძლევდნენ, ხმა ამომეღო. და მინდა სხვა ბავშვებმაც იცოდნენ, რომ თქვენს ხმასაც აქვს მნიშვნელობა. თუ ხედავთ რამეს, რაც შესაცვლელია, არასოდეს შეგეშინდეთ ხმის ამოღების. მადლობა Renew Crew-ს და გუნდის თითოეულ წევრს, რომელიც თავდაუზოგავად შრომობს, რათა ნიუ-იორკი საცხოვრებლად უკეთეს ადგილად აქციოს. და მადლობა მერ მამდანის” – ამბობს ბიჭი.
ვიდეო სოციალურ ქსელში მაქსიმეს ბებიამ, რუსკა ნარჩემაშვილმა გაავრცელა.
გამოსვლის ბოლოს მაქსიმემ ნიუ-იორკის მერს კიდევ ერთი თხოვნით მიმართა:
“მოდით, შევინარჩუნოთ ნიუ-იორკის პარკები ბავშვებისთვის ღია”.
მერის პასუხიც მოკლე და თბილი იყო. ზოჰრან მამდანიმ 8 წლის ბიჭს უთხრა: „ძალიან ყოჩაღი ხარ, მაქსიმე.“
ვიდეოს ნიუ-იორკის პარკების დეპარტამენტიც გამოეხმაურა ფრაზით: „We heard you loud and clear, Max“ – „მაქს, შენი ხმა მკაფიოდ გავიგეთ“.
მათივე ინფორმაციით, მაკ-კინლის პარკის სათამაშო მოედნის განახლების პროექტი დაახლოებით 5 მილიონი დოლარი ღირდა. პროექტის დიზაინზე მუშაობა 2023 წელს დაიწყო, მშენებლობა კი 2025 წლის მარტში დასრულდა. მაქსიმეს მიმართვის შემდეგ პარკის გახსნის პროცესი დაჩქარდა და სივრცე დაგეგმილზე ადრე გაიხსნა.
ასევე დაგაინტერესებთ:
