ტინა ტერნერი ხანგრძლივი ავადმყოფობის შედეგად 83 წლის ასაკში შვეიცარიაში საკუთარ სახლში გარდაიცვალა. BBC-ის ცნობით, ბოლო წლებში ტერნერს ჯანმრთელობის მრავალი პრობლემა ჰქონდა, მათ შორის კიბო, ინსულტი და თირკმლის უკმარისობა.
მომღერლის მუსიკალური კარიერა მის მეუღლესთან აიკ ტერნერთან ერთად 1950-იან წლებში იწყება. დუეტს წარმატება სიმღერამ – Proud Mary მოუტანა , შემდეგ იყო River Deep და Mountain High. იმის მიუხედვად, რომ წყვილი ძალიან წარმატებული გახლდათ , პირად ურთიერთობაში ხშირი იყო დამამცირებელი მოპყრობა და ფიზიკური ძალადობა აიკ ტერნერის მხრიდან, რამაც საბოლოოდ 1978 წელს მათი განქორწინება გამოიწვია, თუმცა თინამ ქმრის გვარი მაინც დაიტოვა.
აღსანიშნავია, რომ მომღერალმა უფრო მეტი პოპულარობა მოიპოვა 1980-იანი წლებიდან. განქორწინების შემდეგ მომღერალმა გამოსცა ავტობიოგრაფიული წიგნი – მე, ტინა. წლების განმავლობაში ტინა ტერნერი თავისი ნიჭით, ხმის დაუვიწყარი ტემბრითა და ამოუწურავი ენერგიით ადამიანების გულებს იპყრობდა. ჟურნალმა “Rolling Stone” იგი პლანეტის ერთ-ერთ უდიდეს მომღერლად დაასახელა, რაზეც მომღერლის 8 გრემიც მიუთითებს.
2013 წელს მრავალწლიანი ურთიერთობის შემდეგ ტინა დაქორწინდა Erwin Bach-ზე და სიცოცხლის ბოლომდე ჰპოვა ბედნიერება მასთან.
საბოლოოდ ტინა ტერნერი თავის მსმენელებს 81 წლის ასაკში დოკუმენტური ფილმით დაემშვიდობა – TINA. როგორც მისი წარმომადგენელი ამბობს – “ტინა ტერნერი, როკ ენ როლის დედოფალი იყო და მასთან ერთად მსოფლიო კარგავს მუსიკის ლეგენდას და მისაბაძ ადამიანს”
