ვიქტორია ბექჰემი Gap-თან თანამშრომლობს — დიზაინერის ახალი კოლექცია კლასიკურ ამერიკულ ბრენდს მინიმალისტურ ელეგანტურობას მატებს. ვიქტორია ბექჰემის პირველი შეხვედრა ბრენდ Gap-თან 1990-იანი წლების დასაწყისში შედგა, როდესაც ის ჯერ კიდევ თინეიჯერი იყო და ბრიტანეთის მაღაზიებში ე.წ. high street მოდას ეცნობოდა. როგორც დიზაინერი Vogue-თან ინტერვიუში იხსენებს, Gap იმ პერიოდში მისთვის „ნამდვილი ამერიკული, ახალი და სრულიად განსხვავებული“ გამოცდილება იყო – შთაბეჭდილება, რომელიც დღემდე დარჩა.
დღეს, ათწლეულების შემდეგ, მოდის ინდუსტრიაში დაგროვილი გამოცდილებითა და საკუთარი ბრენდის ისტორიით, ბექჰემი Gap-თან თანამშრომლობით 38 ერთეულისგან შემდგარ კოლექციას წარადგენს. ეს მრავალსეზონიანი პარტნიორობის პირველი ეტაპია, სადაც დიზაინერი კლასიკურ Gap ესთეტიკას საკუთარ ხელწერას — მინიმალიზმს, მკაფიო სილუეტებსა და დახვეწილ დეტალებს აერთიანებს.
კოლექციის მთავარი იდეა ყოველდღიური სამოსის ახალ დონეზე აყვანაა. ხაზში წარმოდგენილია ხაკის შარვლები, მაისურები და განსაკუთრებით დიდი აქცენტია გამახვილებული დენიმზე. დეტალებში კი ბექჰემის ხელწერა ჩანს — მაგალითად, წითელი ნაკერით შესრულებული VB მონოგრამა. განახლებულია Gap-ის კლასიკური ლოგოიანი ჰუდები და მაისურებიც, რომლებსაც ახლა წინა მხარეს Victoria Beckham-ის წარწერა აქვს. კოლექციაში იგრძნობა 1980-90-იანი წლების Gap-ის არქივიდან შთაგონებული ვინტაჟური ელემენტებიც.
ბექჰემის სტილი წლების განმავლობაში მნიშვნელოვან გავლენას ახდენდა მოდის სამყაროზე — ტომ ფორდის Gucci-ის ეპოქის შავი მინი კაბებიდან დაწყებული, დევიდ ბექჰემთან ერთად 2000-იან წლებში შექმნილი საკულტო წითელი ხალიჩის ლუქებით გაგრძელებული. 2008 წელს საკუთარი ბრენდის დაარსების შემდეგ დიზაინერმა ტანისამოსის შექმნა bodycon კაბებით დაიწყო, თუმცა საბოლოოდ მკაფიო, ტეილორინგზე დაფუძნებულ ესთეტიკამდე მივიდა, რომელიც დღეს მისი მთავარი ხელწერაა.
„დენიმი ბუნებრივი საწყისი წერტილი იყო, რადგან ის Gap-ის ისტორიის მნიშვნელოვანი ნაწილია,“ – ამბობს ბექჰემი. მისი თქმით, კოლექციაში ყურადღება გამახვილდა ისეთ ნივთებზე, რომლებიც ერთდროულად თანამედროვე და დროულია. ფერთა პალიტრა ნეიტრალურ ტონებზეა აგებული, თუმცა მასში ჩნდება მკვეთრი ლურჯი და ღრმა იისფერი ფერები, რომლებიც თითქმის თანამედროვე ნეიტრალებად აღიქმება.
„ჩემი ბრენდი ყოველთვის თანამედროვე გარდერობის აუცილებელ ნივთებზე იყო აგებული – ხარისხიან ტანსაცმელზე, რომელიც ქალებს თავდაჯერებულობას მატებს,“ – ამბობს ბექჰემი. მისი თქმით, Gap-ის ღირებულებები მის ხედვას ემთხვევა, რადგან ორივე მხარე ყოველდღიურ, დროულ და პრაქტიკულ სტილზეა ორიენტირებული.
ახალი კოლექციის ფასები 34-დან 328 დოლარამდე მერყეობს. 2026 წელი დიზაინერული თანამშრომლობების წლად ყალიბდება, ხოლო Gap x Victoria Beckham კოლექცია პირველად აერთიანებს დიზაინერის ესთეტიკას ხელმისაწვდომ ფასებთან, რაც ორივე ბრენდის აუდიტორიას ახალ შესაძლებლობას აძლევს.
„ეს იყო შესაძლებლობა, რომ ჩემი ხედვა Gap-ის საკულტო მემკვიდრეობასთან შემეერთებინა,“ – აღნიშნავს ბექჰემი. „დეტალებზე ორიენტირება ჩემი ბრენდის მთავარი ხელწერაა, ამიტომ მიზანი კლასიკური Gap-ის საფუძვლების დახვეწა იყო. ამ თანამშრომლობით ქალებს მთელ მსოფლიოში ხარისხიან პროდუქტს ხელმისაწვდომ ფასად ვთავაზობთ.“
იმ ფონზე, რომ ბექჰემის ბრენდი კვლავ ფინანსურ გამოწვევებს აწყდება და კომპანიას £6.2 მილიონის საბანკო ვალდებულებები აქვს, ეს კოლაბორაცია მისთვის ერთ-ერთ მნიშვნელოვან ბიზნეს ნაბიჯად შეიძლება ჩაითვალოს.
ასევე დაგაინტერესებთ
#OK!BusinessCelebrity – რატომ ვერ იქცა ვიქტორია ბექჰემის ბრენდი სტაბილურად მომგებიან ბიზნესად?
