სიამოვნებით წარმოგიდგენთ ქართული მუსიკალური სამყაროს ერთ-ერთ გამორჩეულ ტრიოს, რომელიც საავტორო სიმღერებით გვანებივრებს. ტრიო „აპრილია“ ორი წლის წინ შეიქმნა. მათი ტკბილი ხმები და სასიამოვნო შესრულება მსმენელმა მალევე შეიყვარა. ამ დროის განმავლობაში ტრიომ არაერთი საავტორო სიმღერა შექმნა და პირველი ალბომიც წარუდგინა მსმენელს. სულ ახლახან კი ახალი სინგლი – „თეთრი ნისლები“ გამოუშვა.
გვიამბეთ ტრიო „აპრილიას“ შექმნის ისტორია.
ტრიო „აპრილიას“ შექმნის და სახელის იდეა ეკუთვნის ჩვენს მეგობარს, ოთო ედიშერაშვილს, რომელიც ასევე ჩვენი პროდიუსერიცაა. ტრიოს პირველი პრეზენტაცია და კონცერტი ჩავატარეთ 2023 წლის აპრილში. ამ მცირე დროში შევძელით ჩვენი საავტორო სიმღერების და ალბომის გამოშვება.
გაგვაცანით ტრიოს წევრები.
ბეჟო ამირანაშვილი: ლევან ჯორჯიაშვილი – პირველი ხმა, გიგი ჯალაღონია – მეორე ხმა და ბეჟან ამირანაშვილი – სიმღერების ავტორი.
ჩვენი მუსიკალური შემოქმედება ტრიო „აპრილიამდეც“ არსებობდა. მე ვარ ასევე ჯგუფ „მგზავრების“ გიტარისტი, გიგას სხვადასხვა პროექტი აქვს, ლევანს კი თავისი სოლო კარიერა. 2023 წელს ჩვენ გავერთიანდით და დავიწყეთ ქალაქური სიმღერების ჩვენებურად შესრულება სამ ხმაში.
წარმოგვიდგინეთ თქვენი ალბომი
ალბომში „პირველი“, შესულია 12 სიმღერა, აქედან ერთი არის ქალბატონ რუსუდან სებისკვერაძის, დანარჩენი 11 სიმღერა კი ჩვენი შემოქმედებაა. ალბომი ჩაწერილია დავით უგრეხელიძის სტუდიაში. სწორედ დავითი გახლავთ ჩვენი ყველა სიმღერის არანჟირების ავტორი. ჩვენი ალბომი ყველანაირ მუსიკალურ პლატფორმაზეა ხელმისაწვდომი.
გარდა ამისა, სულ ახლახან გამოვუშვით სინგლი – „თეთრი ნისლები“, რომლის მუსიკის ავტორი მე ვარ, ხოლო ტექსტი მაკა ბლიაძეს ეკუთვნის. როცა კონცერტზე ეს სიმღერა შევასრულეთ, ძალიან მოეწონა მსმენელს, განსაკუთრებული ემოციები გამოხატეს და ძალიან გაგვიხარდა.
თვითონ სიმღერის შექმნის პროცესი, რა თქმა უნდა, ძალიან საინტერესოა. ჯერ ვქმნი მელოდიის ჩონჩხს, შემდეგ ბიჭები ერთად ვსხდებით და ვქმნით მუსიკის საბოლოო ვარიანტს.
გაიხსენეთ ის გარდამტეხი მომენტი, რამაც შემდგომ თქვენი მუსიკალური გემოვნება განსაზღვრა…
დამეთანხმებით, რომ ქართველები ერთ-ერთი ყველაზე მუსიკალური ერი ვართ – ყოველი მეორე ადამიანი კარგად მღერის და კარგი მუსიკალური გემოვნება აქვს. ქალაქური მუსიკა, რომელსაც ჩვენ ვასრულებთ, ქართული მრავალხმიანობისა და ქართული ჟღერადობის გამოძახილია. ჩვენი შემოქმედების შთაგონების წყარო, რა თქმა უნდა, არის ის გენიალური კომპოზიტორები, რომლებიც ქმნიდნენ გენიალურ მუსიკას. სწორედ ამ მუსიკაზე გავიზარდეთ და ამან განაპირობა ჩვენი მუსიკალური გემოვნება, თუმცა იყო პერიოდი, როდესაც როკსაც ვუსმენდი, ბლუზსაც, მაგრამ ქართველი კაცისთვის ქართული ქალაქური მუსიკა მაინც ბევრად ღრმა და სხვაა.
მუსიკა არის…
ეს არის მდგომარეობა, სადაც მუსიკოსს ყველანაირი ნიღაბი აქვს მოხსნილი. როცა უსმენ მის შემოქმედებას, მასში ჩანს მუსიკოსის სულიერი მდგომარეობა. მუსიკა არის მსოფლიო ენა. ზოგადად, ხელოვნებას შეუძლია, არ გესმოდეს ის ენა, რაზეც მღერიან, თუმცა მუსიკა ისე შემოვიდეს შენში, რომ აღარ აქვს მნიშვნელობა, გესმის თუ არა ესა თუ ის ენა. მუსიკა არის სინამდვილე.
როგორია ქართველი მსმენელი?
ძალიან კრიტიკული და გულწრფელი. ქართველ მსმენელს ვერასოდეს ვერ მოატყუებ. თითოეულ მათ რეაქციაზე ჩანს, თუ როგორ იმღერე, როგორი რეპერტუარი გაქვს და სხვ. გემოვნებიანი მსმენელი გვყავს და მოდუნების საშუალებას არ გვაძლევს.
რამ განაპირობა თქვენი ტრიოს წარმატება?
გამომდინარე იქიდან, რომ ორი წელია, რაც ჩვენი ტრიო არსებობს, მაინც ვიტყოდი, რომ ჯერ სტარტაპია ეს ჩვენთვის. წარმატება ბევრმა ფაქტორმა განაპირობა, მათ შორის მენეჯმენტმა, მეგობრების გვერდში დგომამ და, რა თქმა უნდა, ჩვენმა შემოქმედებამ, რომელსაც ჩვენ ვქმნით. ჩვენ ვმღერით გულიდან, ვმღერით ჩვენს ხასიათზე მორგებულ სიმღერებს.
სამომავლო გეგმები
ჩვენი უმთავრესი მიზანია, რაც შეიძლება ბევრი კარგი სიმღერა ვაჩუქოთ ჩვენს მსმენელს. გაზაფხულზე ვაპირებთ ახალი სინგლის გამოშვებას.
წარმატებები.
ტექსტი: სოფიო მალანია
ფოტო: ალექსეი სეროვი
