Street style – ტერმინი, რომელიც ძალზე აქტუალურია 21-ე საუკუნეში და ყოველთვის მნიშვნელოვან გავლენას ახდენს მოდის ინდუსტრიაზე.
„ქუჩის სტილი“ ხაზს უსვამს მიმდინარე მოდის ტენდენციებსა და ადამიანში ინდივიდუალიზმის გამოხატულებას. ბუნებრივია, ქუჩის მოდის ცვლილებებზე დიდ გავლენას ახდენს თითოეული ეპოქის საზოგადოება და მათი დამოკიდებულებები სხვადასხვა საკითხის მიმართ.
„ქუჩის სტილი“ ხშირად ასახავს კონკრეტული ადგილის ან პერიოდის კულტურასა და ღირებულებებს, ასევე, ფართო საზოგადოების გემოვნებას.
რაც შეეხება განმარტებას, ის ბრიტანული მოდის კულტურიდან მოდის და ეს არის სტილის გამოხატულება, რომელიც ეფუძნება ინდივიდუალიზმს და არ აკეთებს აქცენტს მიმდინარე მოდის ტენდენციებზე.
ჩვენ ყველამ კარგად ვიცით, რომ ტანსაცმელი და აქსესუარები ადამიანის შინაგან სამყაროს ასახავს. „ქუჩის მოდა“ კი ეხმარება ცალკეულ ადამიანებს საკუთარი თავის, სტილისა და გემოვნების გამოხატვაში. იგი მე-20 საუკუნის ფენომენად ითვლება, მიუხედავად იმისა, რომ ის ყოველთვის არსებობდა და მუდმივად იყო ადამიანის კულტურის განუყოფელი ნაწილი.
ქუჩის სტილის განვითარებაში განსაკუთრებული წვლილი შეიტანეს კრისტიან დიორმა და პიერ ბალმენმა. იმ პერიოდში ქუჩის სტილი ძირითადად შედგებოდა ერთი მაღალი მოდის ბრენდისგან. ქალები ძირითადად იცვამდნენ კრისტიან დიორის მიერ სინთეზირებულ „ახალ ლუქს“, რომელიც ხშირად მოიცავდა გრძელ ქვედაბოლოსა და ქურთუკს განიერი მხრებით, რაც ხაზს უსვამდა ქალის ფიგურას.
ქუჩის სტილის განვითარება უკავშირდება საერთო სოციალურ მოვლენებს. ეს პროცესი ძალიან გრძელი იყო, რადგან მას თან ახლდა კულტურული და ეკონომიკური ცვლილებებიც.
სწორედ ამ პერიოდში დამყარდა ძლიერი კავშირი ქუჩის სტილსა და მოდის ინდუსტრიას შორის. ქუჩის სტილი უკავშირდებოდა ავთენტურობას და რაიმე მნიშვნელოვანი განზრახვის გამოხატვის სურვილს. მისი განვითარება მე-20 საუკუნის შუა წლებში საკმაოდ განსხვავდება უახლესი ეტაპებისგან. მეორე მსოფლიო ომის შემდეგ მომხდარმა ქაოსმა ასევე დიდი გავლენა იქონია მოდის განვითარების ეტაპებზე.
ეს იყო პერიოდი, როდესაც საზოგადოებას სტილის შეცვლა სურდა. შედეგად შეიქმნა სხვადასხვა ჯგუფი, თითოეულს თავისი განსხვავებული სტილი ჰქონდა: ჰიპები, პანკები, გოთები, ბაიკერები… ახალგაზრდებმა უარი თქვეს წარსულის მკაცრ რეგულაციებსა და ფორმალურ სამოსზე და უფრო თავისუფლად დაიწყეს ჩაცმა. ამან მათ საშუალება მისცა, საკუთარი თავი და შეხედულებები უფრო მკაფიოდ წარმოეჩინათ.
ახალი სუბკულტურების გაჩენამ თავის მხრივ გავლენა მოდის ტენდენციებზე იქონია. პანკს, გრანჟს და ჰიპ ჰოპს, – თითოეულს ჰქონდა საკუთარი გამორჩეული სტილი, რომელიც ხშირად მეამბოხე და აზარტული ხასიათის იყო. მაგალითად, 1970-იანი წლების პანკის მიმდინარეობა გამოირჩეოდა ტყავის ქურთუკებით, ქამრებითა და დახეული ტანსაცმლით, ამ ტრენდებმა საბოლოოდ ისეთი ადგილი დაიკავეს მოდაში, რომ დღემდე ძალიან აქტუალურია.
ასევე, მნიშვნელოვანი იყო 1990-იანი წლების გრანჟის მოძრაობა, რომელიც ხასიათდებოდა ფლანელის მაისურებითა და დახეული შარვლებით. 1980-იანი და 1990-იანი წლების ჰიპ ჰოპ კულტურა თავისი ფართო ჯინსებითა და გიგანტური მაისურებით შეიჭრა ე. წ. მთავარ მოდაში და და დღემდე საპატიო ადგილი უჭირავს ბევრი მოდის სახლის მზა ტანსაცმლის კოლექციაში. ზოგადად, სუბკულტურების გაჩენამ ხელი შეუწყო მოდის ტენდენციების სპექტრის გაფართოებას, გამრავალფეროვნებას და ქუჩის სტილის განვითარებას.
სოციალური მედიის წყალობით ეს ტერმინი კიდევ უფრო პოპულარული გახდა ოცდამეერთე საუკუნეში, რადგან სოციალური მედია ხელს უწყობს ქუჩის სტილის ტენდენციების პოპულარიზაციას. უამრავმა ადამიანმა შექმნა საკუთარი პერსონალური ბლოგი, სადაც გამომწერებს თავისი ჩაცმის სტილს უზიარებს, რაც ბევრისთვის ინსპირაციის წყარო გახდა. ადამიანებს გაუადვილდათ ახალი დიზაინის და სტილის პოვნა, უფრო მარტივი გახდა ბრენდებისა და დიზაინერების მომხმარებლებთან დაკავშირება, რამაც კიდევ უფრო იმოქმედა ქუჩის სტილის ტენდენციების პოპულარობაზე.
ხშირად ბევრი ადამიანისთვის და მათ შორის ფოტოგრაფებისთვის, დიდ ქალაქებში მოდის კვირეულებზე მისული სტუმრების ჩაცმულობა და ვიზუალი უფრო საინტერესოა, ვიდრე თავად კვირეულზე წარმოდგენილი კოლექციები. სწორედ ამიტომ ყველა მოდურ გამოცემას აქვს ცალკე „ქუჩის სტილის“ ბლოგი, სადაც ბევრი ძალიან ცნობილი ფოტოგრაფის გადაღებულ ფოტოებსაც ნახავთ.
საინტერესოა, თუ როგორ განვითარდება ქუჩის სტილი მომავალში და როგორ იმოქმედებს ის გარემოზე, რომელშიც ჩვენ ვცხოვრობთ.
ქუჩის სტილის ტენდენციების მიმართულების პროგნოზირება რთულია, მაგრამ სავარაუდოა, რომ სოციალურ-ეკონომიკური და კულტურული ძვრები კვლავაც იმოქმედებს მათზე. საერთო ჯამში, ქუჩის სტილის ტენდენციების მომავალი, სავარაუდოდ, მრავალფეროვანი და მუდმივად განვითარებადი იქნება, რაც ჩვენ გარშემო არსებულ ცვალებად სამყაროს ასახავს.
