ესთეტიკური მედიცინა მუდმივად ვითარდება და უფრო დახვეწილი ხდება. დღევანდელი კოსმეტოლოგია კი მხოლოდ გარეგნული იერსახის შეცვლას არ მოიაზრებს. ის ადამიანებს საშუალებას აძლევს, მიიღონ და მეტად შეიყვარონ საკუთარი თავი, რაც მათ ფსიქოემოციურ მდგომარეობაზე დადებითად აისახება. ჟურნალი OK! გაგაცნობთ კოსმეტოლოგ ლალი სხულუხიას, რომლისთვისაც პროფესიონალიზმი, ინდივიდუალური მიდგომა და ემპათია სწორედ ის ფასეულობებია, რომლებიც მისთვის წარმატების გზად იქცა. ინტერვიუში ის გვიზიარებს საკუთარ გამოცდილებას, ინდივიდუალურ მიდგომებსა და სილამაზის სფეროში არსებულ ტენდენციებს.
რამ განაპირობა თქვენი პროფესიული არჩევანი?
ყოველთვის მიზიდავდა ისეთი პროფესია, რომლითაც შევძლებდი ჩემთვის საინტერესო პრობლემების გადაჭრას, ადამიანებთან კომუნიკაციას და დავამყარებდი მათთან რეალურ ურთიერთობებს. ჩემი პროფესიის არჩევა სიყვარულთან არის დაკავშირებული. სიყვარული იმ საქმის მიმართ, რომელიც ყოველდღიურ ცხოვრებაში მაძლევს განვითარების საშუალებას და მმატებს მოტივაციას.
გვიამბეთ სილამაზის სფეროში არსებული ტენდენციების შესახებ…
სილამაზის ინდუსტრია მუდმივად განიცდის ცვლილებებს და ვითარდება. ერთი მხრივ, ეს განპირობებულია ტექნოლოგიური პროგრესით, მეორე მხრივ კი, საზოგადოებაში არსებული კულტურული ტრენდებით. ამასთანავე, იზრდება ინტერესი ინდივიდუალური სერვისების მიმართ. კანის ტიპზე, თმის სტრუქტურასა და სახის ფორმაზე მორგებული პროცედურები პაციენტს საშუალებას აძლევს, მეტად კომფორტულად იგრძნოს თავი სასურველი შედეგის მიღების შემდეგ. სილამაზე ბუნებრიობაშია. სწორედ ამიტომ ვცდილობ ყველა პაციენტს ინდივიდუალურობა შევუნარჩუნო და ეს ინდივიდუალიზმი უფრო მისაღები გახდეს მათთვის.
როგორია თქვენი მიდგომა და სამუშაო პრინციპი?
იქიდან გამომდინარე, რომ სილამაზე და თავის მოვლა პრიორიტეტულია, ვიყენებ უმაღლესი ხარისხის ევროპული ბრენდების პრეპარატებსა და კანის მოვლის საშუალებებს. ყველა პროდუქტის ეფექტურობა მეცნიერულად დადასტურებულია, პრეპარატებს, რომლებსაც ვიყენებ, ინდუსტრიაში FDA სტატუსი აქვს, რაც ხაზს უსვამს მათ სანდოობას. შესაბამისად, პაციენტი სრულიად დაცულია არასათანადო შემადგენლობისგან.
რომელი პროცედურაა ყველაზე აქტუალური ამ სეზონზე? და რატომ?
ზამთრის პერიოდის შემდეგ კანი იმყოფება სტრესში. ხშირად გაუწყლოებული და გაუხეშებულია, რაც გამოწვეულია ცივი ჰავისა და გათბობის სისტემის ზემოქმედებით. ამ პერიოდში ტენდენციები უფრო ფოკუსირებულია კანის განახლებასა და დასვენებაზე. გაზაფხული-ზაფხულისთვის აქტუალური დერმატოლოგიური პროცედურებია: ზედაპირული პილინგი, ბიორევიტალიზაცია, მეზოთერაპია, მაქსიმალური დატენიანება და ასევე მზის სხივებისგან დაცვა.
მნიშვნელოვანია სპეციალისტს ენდობოდე, რა განაპირობებს ამ ნდობას?
ყოველთვის ვუსმენ პაციენტს, პატივს ვცემ მათ აზრს. მარტივად და დეტალურად ვუხსნი მკურნალობის გეგმას, ასევე, ვაცნობ შესაძლო გვერდით ეფექტებს. მნიშვნელოვანია გვახსოვდეს, რომ ყველა კანის პრობლემა განსხვავებული და უნიკალურია. ექიმის მიმართ ნდობა ძლიერდება მაშინ, როდესაც ის არ მუშაობს შაბლონურად, არამედ პირიქით, პერსინალიზებულად უდგება დიაგნოსტიკასა და მკურნალობას.
3 რამ, რაც წარმატებას სჭირდება…
საქმის მიმართ სიყვარული და, ამასთანავე, როგორც შრომა, ასევე მოთმინება.
რთულია წარმატებული კარიერისა და ოჯახური ცხოვრების შეთავსება? რაშია ბალანსის საიდუმლო?
პროფესიული განვითარება ზიანს არ აყენებს პირად ურთიერთობებს და პირიქით – ოჯახური ვალდებულებები არ უშლის ხელს თვითრეალიზაციას. წარმატება დროებით შეიძლება უფრო აქტიური იყოს, ზოგჯერ კი ოჯახი მოითხოვს დიდ ყურადღებას. ბალანსი ნიშნავს ამ ცვლილებების დაფიქსირებას და გააზრებულ რეაგირებას.
თქვენ ელოდებით ტყუპს, თან აქტიურად განაგრძობთ მუშაობას… გვიამბეთ ამის შესახებ, რა არის თქვენთვის ყველაზე დიდი მოტივაცია?
ჩემი წარმატება ვერ იქნება სრული წარმატება მიზნების არქონის გარეშე. ჩემი მიზნების უკან კი დგას ჩემი დიდი ოჯახი: მყავს მეუღლე, ორი შვილი და ვართ ტყუპის მოლოდინში, რაც დიდ მოტივაციას მაძლევს.
რჩევა მათ, ვინც ამ სფეროში ახლა დგამს ნაბიჯებს…
დამწყები კოსმეტოლოგებისთვის რჩევა ძალიან მნიშვნელოვანია: მაგალითად, პროფესიული ტრენინგები, სწრაფი ადაპტაცია ახალ ტექნოლოგიებთან, ფუნდამენტური ცოდნა, პაციენტის მიმართ ყურადღება, მათი მხარდაჭერა და ემპათიის გრძნობა.
ტექსტი: სოფიო მალანია, ანნო ბუხრაშვილი
ფოტო: გვანცა ახალაია
