პანდემიის დროს მოწოდებამ „დარჩით სახლში“ ბევრი მოყვარული კულინარი გამოავლინა. კულინარია ტრენდული ჰობი გახდა და ამას სოციალურმა ქსელებმაც შეუწყო ხელი. ინსტაგრამზე თუ Facebook-ზე არაერთი კულინარიული ბლოგი და ჯგუფი შეიქმნა − თითქოს ასე უფრო მარტივი გახდა საკუთარი შესაძლებლობების დემონსტრირება და კულინარიული შედევრების ერთმანეთთან გაზიარება. OK! გაგაცნობთ რამდენიმე კულინარიულ ბლოგს და მის შემქმნელებს.
Nino’s Food Adventures – ნინო თვალავაძის ბლოგია, რომელიც გთავაზობთ ვეგეტარიანული მრავალფეროვანი კულინარიული რეცეპტებს.
როგორ გაჩნდა თქვენი ბლოგის შექმნის იდეა?
23-წლიანი ვეგეტარიანული კვების გამოცდილების ფონზე, მუდმივად ვეძებდი ალტერნატიული კვების რეცეპტებს, ჯანმრთელი პროდუქტების გამოყენებით. სახლის პირობებში დავიწყე არატრადიციული ტიპის მურაბების მომზადება, შემდეგ უკვე „არომატის“ სახელით დავიწყე მათი წარმოება. სწორედ ამ მურაბების მარკეტინგული კუთხით წარმოჩენას მოჰყვა ბლოგის შექმნა, შემდეგ კი ეტაპობრივად გაჩნდა სურვილი გამომწერებისთვის გამეზიარებინა საინტერესო ვეგეტარიანული რეცეპტები.
რა არის თქვენი ბლოგი თქვენთვის?
ჩემი სამზარეულო ექსპერიმენტებზე, ფანტაზიაზე და შეცდომებზეა აგებული. რადგან არ მიმიღია შესაბამისი განათლება, ჩემთვის გამოცდილებით მიღებული ცოდნა ულიმიტოა და ჩარჩოებს სცდება. ჩემი ბლოგი ზუსტად ამ „არატრადიციულობას“ ემსახურება. მინდა, ჩემი ინსტაგრამგვერდი ის ადგილი იყოს, სადაც საკუთარი გამომწერები თავისუფლად მიიღებენ ინსპირაციას ჩემი ხშირად ქაოსური კერძებისგან და თავს არ აარიდებენ ექსპერიმენტების ჩატარებას, რადგან ჩემი გამოცდილებით, ზუსტად ამ შეცდომებითა და ექსპერიმენტებით იქმნება ყველაზე საინტერესო და ინოვაციური კერძები, და სწორედ ამ ქაოსში ხდება ინტერესებისა და გატაცებების აღმოჩენა. ბლოგისთვის „დაიწყეთ დილა ჯანსაღად“ ყოველი დღე იწყება ამ სლოგანით და თითოეული პოსტი მარწმუნებს, რომ ეს ორმხრივი კომუნიკაცია საკუთარი ცოდნის გაღრმავებაშიც მეხმარება.
ერთი შეხედვით თითქოს ყველამ ვიცით, რომ უნდა ვიკვებოთ ჯანსაღად, მაგრამ ბევრი ამას მაინც ვერ ახერხებს. რას ეტყოდით ამ ადამიანებს?
ჯანსაღი ცხოვრების წესი, ჯანსაღი კვება, არის არჩევანი, რომელიც დროთა განმავლობაში იქცევა ჩვევად, მარტივდება და ყოველგვარი ძალისხმევის გარეშე ხდება ადამიანის ყოველდღიურობის ნაწილი. შესაბამისად, დღე ხდება უფრო მობილიზებული, ენერგიული, მიზანდასახული და პოზიტიური. ადამიანებს, რომლებიც ჯერ კიდევ ფიქრობენ, რომ ამ ყველაფრისთვის დრო არ აქვთ, ვურჩევდი სულ მცირე დროით შეცვალონ მარტივი დამოკიდებულება კვებასთან მიმართებაში და თუნდაც კვირაში ერთხელ მოამზადონ და გაუმასპინძლდნენ საკუთარ თავს ან საყვარელ ადამიანებს, გამოიყენონ ჯანმრთელი პროდუქტები და ვფიქრობ ნელ-ნელა ეს დამღლელი პროცესი მათთვის სასარგებლოსთან ერთად, სასიამოვნოც გახდება.
რა არის კულინარია თქვენთვის?
კულინარია ჩემთვის ხელოვნებაა, კარგად შესრულებული კერძები კი ხელოვნების ნიმუშებია. სამზარეულო ჩემთვის ის ადგილია სადაც კერძებით ვცდილობ გამოვხატო საკუთარი თავი, ხასიათი თუ იმ მომენტის შინაგანი მდგომარეობა, ეს პროცესი ხშირად ქაოტური და ექსპერიმენტებით სავსეა.
