რა არის თქვენთვის სტილი და რას გამოხატავს ადამიანში?
ჩემთვის სტილი არის ჩემი გუნება, განწყობილება, კომფორტი და გარემო, სადაც ვარ. სტილი ადამიანის ბუნებაზე და გემოვნებაზე მეტყველებს, ღირებულებებისა და ხასიათის მაჩვენებელია. ტანსაცმელი უნდა მოირგო და არა პირიქით…
რის მიხედვით ირჩევთ თქვენს ყოველდღიურ ჩაცმულობას?
ყოველდღიურ ჩაცმულობას ვირჩევ ხასიათის, ამინდის მიხედვით და ასევე, პატარ-პატარა წარმოდგენებით. ჩემი როლები მაქვს და ასე ვირთობ თავს. ბოლო დროს მუდამ სპორტსმენი ვარ, ან ბოტები, ლაბადა და კალათა მიჭირავს, რადგან პანდემიის დროს, მეტწილად აბასთუმანში ვცხოვრობ.
აქვს თუ არა თქვენთვის მნიშვნელობა ბრენდებს და ტანსაცმლის ღირებულებას?
ბრენდებს, რა თქმა უნდა, აქვს მნიშვნელობა, რადგან შესაბამისად, ხარისხი უკეთესია, მაგრამ მხოლოდ იმის გამო, რომ ბრენდია, არ ჩავიცვამ, თუ არ მომწონს და არ მიხდება. ძალიან შემიყვარდა ინგლისური, ფრანგული, იტალიური, თითქოს ჩემს ბავშვობაში მაბრუნებს და ძველ ფილმებს ვუყურებ. მიყვარს შოტლანდიური ქაშმირი, ლამაზი ჩინური აბრეშუმი, იტალიური ტილო… ბელგიური ავანგარდი, დანიური მინიმალიზმი და გამბედაობა. ყველა ტიპის სამოსი მიყვარს, როცა სწორი შეხამებაა. რაც მთავარია, იუმორით მიუდექით. ძალიან ნუ გაასერიოზულებთ, თორემ ტრაგიკული ხდება მოდა! Fashion victims ბევრია ქუჩაში.
