პირადი სივრცე მეპატრონეს უნდა ჰგავდეს. ჩვენი ხასიათი, გემოვნება და ფანტაზიები უნდა იგრძნობოდეს იმ სივრცეში, სადაც უდიდესი დროის გატარება მოგვიწევს. ინტერიერის დიზაინერი კი არის ადამიანი, რომელმაც კარგად უნდა გაგვიცნოს, რათა სასურველი შედეგის მისაღებად ჩვენთვის საინტერესო იდეა შემოგვთავაზოს. რაც, დამეთანხმებით, საკმაოდ რთული, მაგრამ საინტერესო პროცესია. ჟურნალი OK! გაგაცნობთ ინტერიერის დიზაინის კომპანიას N.S.Kariaul-ს და მის დიზაინერებს: ნათია და სოფო კარიაულებს.
(სოფო კარიაული): ჩვენ ბიძაშვილები და მეგობრები ვართ. დებივით გავიზარდეთ, აკადემიაშიც ერთად ჩავაბარეთ და პროფესიად ტანსაცმლის დიზაინი ავირჩიეთ, თუმცა მოგვიანებით პროფესია შევიცვალეთ. მე რამდენიმე წელი სამშენებლო კომპანიაში ვიმუშავე, სადაც ამ მიმართულებით დიდი გამოცდილება მივიღე.
(ნათია კარიაული): ინტერიერის დიზაინით სამხატვრო აკადემიის მერე დავინტერესდით და მუშაობაც სხვადასხვა მიმართულებით დავიწყეთ, თუმცა როდესაც დავინახეთ, რომ ჩვენს ნამუშევრებზე მოთხოვნა იყო, გადავწყვიტეთ გაგვეერთიანებინა ჩვენი ძალები და საყვარელი საქმე ერთად გვეკეთებინა.
მიუხედავად იმისა, რომ დიდი გამოცდილება დავაგროვე ამ სფეროში, ყოველთვის მინდოდა აკადემიური, უფრო სიღრმისეული ცოდნა მიმეღო. სწორედ ამიტომ შარშან კონკურსში მივიღე მონაწილეობა და სასწავლებლად მილანში გავემგზავრე.
მქონდა საოცარი წელი, მივიღე უდიდესი გამოცდილება, გავეცანი უახლეს ტენდეციებს და რაც მთავარია, ავიხდინე ოცნება, რომ ინტერიერის დიზაინის მიმართულებით მაგისტრატურა დამემთავრებინა.
იტალიამ დამანახვა, რომ ამ ქვეყანაში დიზაინზე სულ სხვანაირად მუშაობენ, სხვა პრინციპებით, სხვა ხედვით. მიღებულ ცოდნას, რა თქმა უნდა, საქართველოში აქტიურად გამოვიყენებ.
რას სთავაზობს N.S.Kariaul საზოგადოებას?
(ნათია): მომხმარებელს ვთავაზობთ ნებისმიერი ობიექტის შავი კარკასიდან საბოლოო შედეგამდე მიყვანას. ჩვენი მიზანია ნებისმიერი მომხმარებლის სურვილი დავაკმაყოფილოთ და დახვეწილი დიზაინი შევთავაზოთ.
ყველა დამკვეთთან ინდივიდუალურად ვმუშაობთ, მით უმეტეს, როდესაც პირადი სივრცის მოწყობაზეა საუბარი. უპირველესად ვცდილობთ კარგად გავიცნოთ ჩვენი დამკვეთი, რათა გავითვალისწინოთ მისი ხასიათი, გემოვნება და სურვილები. მომხმარებელთან გასაუბრების შემდეგ დაახლოებით ვიცით, რა უნდა შევთავაზოთ მას. ასევე, ხშირია, როდესაც არ იციან რა უნდათ და ჩვენს იდეებს ენდობიან – „დაგვეხმარეთ ამ ქაოსის დალაგებაში“ – ხშირად მოუმართავთ ამ სიტყვებით და ჩვენც ქაოსიდან ჰარმონიულ გარემოს ვქმნით.
(სოფო): კომერციული სივრცეების შემთხვევაში, განსხვავებით პირადი სივრცისგან, ბევრად თავისუფალი ვართ და უფრო თამამად ვთავაზობთ იდეებს. ჩვენს ხედვას, დამკვეთის სურვილებსა და ტენდენციებს ვაბალანსებთ.
როგორია დიზაინზე მუშაობის პროცესი?
(სოფო): ყველაზე დიდ დროს მოითხოვს კონცეფციის შექმნა, ეს არის პირველი და მნიშვნელოვანი ნაბიჯი ინტერიერის დიზაინზე მუშაობისას.
ვითვალისწინებთ ძალიან ბევრ დეტალს, ნიუანსს, ვცდილობთ არაფერი გამოგვეპაროს და საბოლოოდ ისეთი იდეა და ჩვენეული ხედვა შევთავაზოთ დამკვეთს, რომელიც, პირველ რიგში, მის ხასიათთან იქნება ახლოს. ამ ყველაფერს კი იქამდე მივყავართ, რომ ჩვენი შექმნილი ყველა ინტერიერი ინდივიდუალურია. სწორედ ამიტომ არის ჩვენი ნამუშევრები ერთმანეთისგან განსხვავებული და უნიკალური.
საბოლოოდ კი ვიძენთ კმაყოფილ დამკვეთს, რომელიც ბედნიერია იმ სივრცით, რომელიც შენი ფანტაზიით და ხელშეწყობით შეიქმნა. ამაზე დიდი მოტივაცია რა უნდა იყოს?!
ინტერიერის დიზაინზე მუშაობისას რას აქცევთ ყველაზე დიდ ყურადღებას − ფუნქციას თუ ესთეტიკას?
(სოფო): რა თქმა უნდა, ორივე ძალიან მნიშვნელოვანია და ამიტომაც ვცდილობთ, ესთეტიკა ფუნქციას შეესაბამებოდეს. უპირველესად ობიექტი უნდა იყოს ერგონომიკურად მოსახერხებელი, ჰარმონიული და მყუდრო.
სხვათა შორის, ჩვენი დამკვეთები ხშირად აღნიშნავენ, რომ ჩვენი შექმნილი ინტერიერები გამოირჩევა სიმყუდროვით, იქნება ეს საზოგადო თუ პირადი სივრცე.
რას მოაქვს წარმატება? რას ეტყოდით ქალებს სამოტივაციოდ?
(ნათია): აკეთეთ საქმე, რომელიც გიყვართ. ამით საქმიანობაც სასიამოვნო და საინტერესო თავგადასავალი ხდება. რა თქმა უნდა, ძალიან ბევრი შრომაა საჭირო და არ უნდა შეგაშინოთ დაბრკოლებებმა, ყოველთვის უნდა გქონდეთ მიზანი და გჯეროდეთ მისი. ნებისმიერ ასაკში უნდა იფიქროთ განვითარებაზე და ახლის შესწავლაზე, რადგან ისეთ დროში ვცხოვრობთ, სადაც ყველაფერი უცებ იცვლება და ამ ტემპს არ უნდა ჩამოვრჩეთ.
მჯერა, ქალებს ყველაფერი გამოგვივა, რადგან სამყარომ მოგვცა ნიჭი და ენერგია იმისა, რომ ყველაფერში ჰარმონია ვიპოვოთ. როდესაც შენ მაქსიმალურად იყენებ შენს მონიჭებულ რესურსს, ეს აუცილებლად პოზიტიურად დაგიბრუნდება.
სამომავლო გეგმები…
ჩვენი სურვილია მომხმარებელს მომავალში კიდევ უფრო დახვეწილი მომსახურება შევთავაზოთ. იტალიაში ახალი კონტაქტები დავამყარეთ, რომლებიც ინოვაციებს, ახალ ტექნოლოგიებს გვთავაზობს და მათთან თანამშრომლობას ვფიქრობთ. ამით გვინდა ჩვენი კომპანია ახალ საფეხურზე გადავიყვანოთ. ვგეგმავთ ახალ და საერთო პროექტებს როგორც საქართველოში, ასევე საზღვარგარეთ.
ტექსტი: სოფიო მალანია
ფოტო: ალექსეი სეროვი
