საკონდიტრო Mon Nuage 2022 წელს შეიქმნა. მიზანი მომხმარებლისთვის დესერტების უნიკალური ხაზის შეთავაზება იყო, სადაც ინოვაციური ფორმა, ფრანგული ტექნოლოგია და მაღალი ხარისხი ერთმანეთთან თანხვედრაში იქნებოდა. Mon Nuage ფრანგულად „ჩემს ღრუბელს“ ნიშნავს, რაც ზუსტად ასახავს იმ სიფაქიზესა და სიმსუბუქეს, რითაც საკონდიტროს დესერტები გამოირჩევა. Mon Nuage-ის მისიაა დესერტების კულტურის გამდიდრება საქართველოში – მრავალფეროვანი, არასტანდარტული და დაუვიწყარი გემოებით, რომლებიც პირველივე ლუკმიდან აღფრთოვანებას იწვევს. აღსანიშნავია, რომ საკონდიტრო გამორჩეულია ინდივიდუალური მიდგომით, რომელიც აერთიანებს საავტორო ხედვას, ტრადიციულ რეცეპტებს და თანამედროვე ტენდენციებს. განსაკუთრებული ყურადღება ეთმობა ყალიბების – დესერტის ფორმების – დიზაინს, რაც განსაკუთრებული დესერტების დამზადების საშუალებას იძლევა როგორც ვიზუალურად, ასევე ტექნიკურადაც. გარდა გამორჩეული პროდუქციის შექმნისა, Mon Nuage-ის გუნდი აქტიურადაა ჩართული პროფესიულ განათლებაში, რადგან მათთვის ხარისხიანი დესერტი იწყება ცოდნით და მუდმივი განვითარების სურვილით. სწორედ ამ ღირებულებებზე დაყრდნობით, Mon Nuage წარმოადგენს ახალ სიტყვას ქართულ საკონდიტრო სივრცეში.
გვიამბეთ, რატომ აირჩიეთ ეს პროფესია?
Alrahim Kenzhekara, Mon Nuage-ს შეფი: კულინარია ჩემთვის მხოლოდ პროფესია არ არის – ეს არის ხელოვნება, თვითგამოხატვის ფორმა. შეფმზარეულობა აერთიანებს ტექნიკურ სიზუსტეს, კრეატიულობასა და ემოციას – ინგრედიენტებისგან იქმნება ახალი რეალობა, ახალი გამოცდილება.
15 წელზე მეტი გამოცდილება მაქვს ამ სფეროში და დღესაც ყოველ ახალ რეცეპტში ისევე ვპოულობ შთაგონებას, როგორც პირველ დღეებში.
წარმოგვიდგინეთ MON NUAGE-ის დესერტები, რა გამოარჩევთ მათ?
Mon Nuage-ის დესერტები უნიკალურია არა მხოლოდ გემოვნური მახასიათებლებით, არამედ კონცეფციითაც – ჩვენთვის თითოეული დესერტი არის ნაზავი ტექნიკის, შემოქმედებისა და გულით შექმნილი დეტალების.
გემოების გაბედული შერწყმა, დახვეწილი ტექსტურები და ვიზუალი – ეს არის ის, რაც ქმნის Mon Nuage-ის ხელწერას.
თქვენ რა მიგაჩნიათ MON NUAGE-ის მთავარ უპირატესობად?
ჩვენი მთავარი უპირატესობაა თავისუფლება – შევქმნათ ისეთი პროდუქტი, რომელიც სიამოვნებას ანიჭებს როგორც შემქმნელს, ისე მომხმარებელს. ვირჩევთ მხოლოდ მაღალი ხარისხის ინგრედიენტებს, ვაკვირდებით თითოეულ დეტალს და, რაც მთავარია, ყოველთვის ვმუშაობთ გრძნობით.
Mon Nuage არის სივრცე, სადაც იდეა გარდაიქმნება რეალობად, ღრუბელივით მსუბუქად და სასიამოვნოდ.
ტექსტი: სოფიო მალანია
ფოტო: ალექსეი სეროვი
