ტრადიციის მიხედვით, Met Gala წელსაც გაზაფხულის სეზონში გაიმართება — ღონისძიება, რომელიც ყოველწლიურად მაისის პირველ ორშაბათს ტარდება, 2026 წელს 4 მაისს შედგება. საღამო ემთხვევა მეტროპოლიტენის მუზეუმის Costume Institute-ის ახალი გამოფენის ოფიციალურ გახსნას.
Met Gala-ის მთავარი მიზანი მხოლოდ მოდის აღნიშვნა არ არის — ღონისძიება საქველმოქმედო ხასიათსაც ატარებს და Costume Institute-ის მხარდასაჭერად ფონდების მოზიდვას ემსახურება. მაღალი პროფილის სტუმრები და მოდის სახლები ღონისძიებაზე დასასწრებად მაგიდებს ყიდულობენ, რაც ინსტიტუტის საქმიანობის დაფინანსებას უზრუნველყოფს.
ვინ უმასპინძლებს Met Gala 2026-ს?
წლევანდელი გალას მუდმივი თანათავმჯდომარე კვლავ ანა ვინტურია — Vogue-ის გლობალური სარედაქციო დირექტორი და Condé Nast-ის მთავარი კონტენტოფიცერი, რომელიც ათწლეულებია ღონისძიების მთავარი ფიგურაა.
მას წელს თანათავმჯდომარეებად შეუერთდებიან:
- ბიონსე
- ნიკოლ კიდმანი
- ვენუს უილიამსი
გალას დამატებითი თანათავმჯდომარეები არიან:
- ენტონი ვაკარელო
- ზოი კრავიცი
Gala Host Committee-ში წარმოდგენილია თანამედროვე პოპკულტურისა და მოდის ინდუსტრიის არაერთი ცნობილი სახე, მათ შორის:
საბრინა კარპენტერი, Doja Cat, გვენდოლინ კრისტი, ალექს კონსანი, მისტი კოპლანდი, ელიზაბეტ დებიკი, ლენა დანჰემი, პალომა ელსესერი, ლისა, ქლოე მალე, სემ სმიტი, ტეიანა ტეილორი, ლორენ ვასერი, ანა ვეიანტი, აჯა უილსონი და Yseult.
მოგვიანებით კომიტეტს შეუერთდნენ:
ადუტ აკეჩი, ანჯელა ბასეტი, სინეიდ ბერკი, რებეკა ჰოლი, ეიმი მალინსი, ტშაბალალა სელფი, ემი შერალდი და ჩეის სუი უონდერსი.
ღონისძიების საპატიო თავმჯდომარეები კი Amazon-ის დამფუძნებელი ჯეფ ბეზოსი და მისი მეუღლე ლორენ სანჩეს ბეზოსი იქნებიან, რომლებიც გამოფენისა და გალას მთავარი სპონსორებიც არიან.
გამოფენის თემა – Costume Art
წლევანდელი გამოფენა სახელწოდებით Costume Art მომავალი წლის 10 იანვრამდე გაგრძელდება და თითქმის 400 ექსპონატს გააერთიანებს.
Met-ის ინფორმაციით, ექსპოზიცია შეისწავლის „შემოსილი სხეულის ცენტრალურ მნიშვნელობას“ და ერთმანეთს დაუპირისპირებს მოდას და ხელოვნების ნიმუშებს მუზეუმის ფართო კოლექციიდან. გამოფენა წარმოაჩენს, როგორ იქცა ტანსაცმელი კულტურული, ისტორიული და არტისტული გამოხატვის ფორმად.
დრესკოდი – „Fashion Is Art“
Met Gala-ს დრესკოდი ყოველ წელს გამოფენის თემასთან მჭიდროდ არის დაკავშირებული, თუმცა განზრახ რჩება გარკვეულწილად ღია ინტერპრეტაციისთვის, რათა დიზაინერებსა და სტუმრებს შემოქმედებითი თავისუფლება მიეცეთ.
2026 წლის დრესკოდია „Fashion Is Art“, რომელიც მოდის ისტორიულ კავშირს უსვამს ხაზს ვიზუალურ ხელოვნებასთან — როგორ ასახავდა ხელოვნება ჩაცმულ სხეულს და როგორ შთააგონებდა ხელოვნება თავად მოდას.
სტუმრებისგან ელიან როგორც აბსტრაქტულ, ისე პირდაპირ ინტერპრეტაციებს — სკულპტურული სილუეტები, ექსპერიმენტული ფორმები და ხელოვნებით შთაგონებული დიზაინები წითელი ხალიჩის მთავარი აქცენტი იქნება.
დიზაინერები, რომელთაც განსაკუთრებით ელიან
თემის შესაბამისად, მოდის კრიტიკოსები განსაკუთრებით ელიან ბრენდებს, რომლებიც მოდასა და ხელოვნებას შორის საზღვარს შლიან:
- Schiaparelli — სიურეალისტური ესთეტიკითა და ვიზუალური ილუზიებით ცნობილი მოდის სახლი, რომელსაც დენიელ როზბერი ხელმძღვანელობს
- Iris van Herpen — ტექნოლოგიასა და ხელით შესრულებულ კუტიურეს შორის უნიკალური სინთეზის ავტორი
- Loewe — ახალი კრეატიული დირექტორების, ჯეკ მაკკოლოსა და ლაზარო ერნანდესის ხელმძღვანელობით, თამამი ფერებისა და ტექსტილის ექსპერიმენტების ბრენდი
ასევე მოსალოდნელია დიზაინერი დანიელ დელ ვალე, რომლის კოლექციები კერამიკით, ფილებითა და ყვავილოვანი ინსტალაციებით შთაგონებულ მოდას წარმოადგენს.
სავარაუდო სტუმრები Met Gala 2026-ზე
მოდის ინდუსტრიის ახალი ვარსკვლავი ბჰავითა მანდავა, რომელიც 2024 წელს ნიუ-იორკის მეტროში აღმოაჩინეს და მალევე Chanel-ის ახალი მუზა გახდა, დიდი ალბათობით ღონისძიებაზე ბრენდის სპეციალურად შექმნილი ლუქით გამოჩნდება.
ემა სტოუნი და ჩეის ინფინიტი, რომლებიც დაჯილდოების სეზონის აქტიური მონაწილეები იყვნენ, სავარაუდოდ Louis Vuitton-ის ინდივიდუალურ დიზაინებს მოირგებენ.
Grammy-ზე ნომინირებული არტისტი Sombr, რომელიც წელს Valentino-ს გლობალურ ელჩად დასახელდა, ასევე მოსალოდნელ სტუმრებს შორისაა.
Coachella 2026-ის ჰედლაინერი საბრინა კარპენტერი, როგორც Gala Host Committee-ის წევრი, დიდი ალბათობაა რომ ის დაესწრება ღონისძიებას — შესაძლოა Dior-ის ინდივიდუალური კოსტიუმით.
ასევე ელიან:
- ელ ფენინგს, Cartier-ის გლობალურ ელჩს
- Grammy-ს გამარჯვებულ მომღერალ ოლივია დინს
- სეიდი სინკს, რომელიც Prada-ს ხშირი სახეა და სავარაუდოდ ბრენდის ინდივიდუალურად შექმნილ ლუქში გამოჩნდება.
ასევე დაგაინტერესებთ
#OK! მეტროსადგურიდან ბრიტანული ვოგის წინა ყდამდე – ინდოელი მოდელის შთამბეჭდავი ისტორია
