ბავიტა მანდავა 2000 წელს ინდოეთის ქალაქ ჰიდერაბადში საშუალო, ნორმალური კლასის ოჯახში დაიბადა და სრულიად შემთხვევით აღმოჩნდა მოდის ინდუსტრიაში. ბავიტა თავდაპირველად მოდელობაზე არც ფიქრობდა. ის ინდოეთში არქიტექტურას სწავლობდა და შემდეგ კარიერის გასაგრძელებლად ნიუ-იორკში გადავიდა. მისი მიზანი აკადემიური და პროფესიული განვითარება იყო, თუმცა ყველაფერი მოულოდნელად შეიცვალა.
ნიუ-იორკის მეტროში მოდის აგენტთან შემთხვევითმა შეხვედრამ მისი ცხოვრება სრულიად სხვა მიმართულებით წაიყვანა. სწორედ ამ მომენტიდან დაიწყო მისი გზა მოდის სამყაროში — სფეროში, რომელიც მანამდე მის გეგმებში საერთოდ არ ფიგურირებდა.
მისი დებიუტი იტალიური მოდის სახლის — Bottega Veneta-ს ჩვენებაზე შედგა. ეს იყო პირველი მნიშვნელოვანი ნაბიჯი, რომელმაც მოდის ინდუსტრიის ყურადღება მიიქცია. თუმცა ნამდვილი გარდამტეხი მომენტი დადგა მაშინ, როცა ბავიტა გახდა პირველი ინდოელი მოდელი, რომელმაც Chanel-ის Métiers d’Art 2026 წლის ჩვენება გახსნა. ახლა კი, ამ ყველაფერთან ერთად, ის პირველი ინდოელი მოდელი გახდა, რომელიც სოლოდ British Vogue-ის წინა ყდაზეა წარმოდგენილი. ეს ფაქტი არა მხოლოდ მისი პირადი წარმატება, არამედ კულტურული მნიშვნელობის მოვლენაც გახდა.
Chanel-ის პოდიუმზე გამოსვლის შემდეგ სოციალურ ქსელში გავრცელდა ვიდეო, სადაც მისი მშობლები ინდოეთში, ტელევიზორის წინ, ცრემლებითა და სიხარულით ადევნებდნენ თვალს შვილის წარმატებას.
მოდის კარიერის დაწყების პერიოდში ბავიტა ნიუ-იორკის უნივერსიტეტში — New York University (NYU) სწავლობდა, სადაც დიზაინისა და მედიის მიმართულებით დოქტორანტურას აგრძელებდა. იგი პარალელურად ახერხებდა სწავლას, კვლევით საქმიანობასა და მოდელობას — რაც მის ისტორიას კიდევ უფრო შთამბეჭდავს ხდის. საბოლოოდ მან გადაწყვიტა, რომ მოდელობა დროებით მთავარ პროფესიულ მიმართულებად ექცია.
