OK! Gastro Book-ი გიამბობთ ყველასგან განსხვავებული კონცეფციის, ხასიათისა და ინტერიერის რესტორნის – „ბაჩატას“ შესახებ, ადგილის, რომელიც იდეალურია მეგობრებსა და ოჯახის წევრებთან ერთად სავახშმოდ და დროის მყუდრო გარემოში გასატარებლად. მანამდე კი გთავაზობთ ინტერვიუს რესტორნის თანადამფუძნებლებთან, მარიამ გოგოჭურსა და მის მეუღლესთან, მამუკა კვირკველიასთან, რომლებმაც უფრო ვრცლად და დეტალურად გვიამბეს „ბაჩატას“ დაფუძნებისა და საქმიანობის შესახებ.
უპირველესად, გაგვაცანით „ბაჩატას“ დაფუძნების ისტორია. რამდენი ხანია, რაც ბაზარზე გამოჩნდა?
მოგესალმებით და მადლობას გიხდით სტუმრობისთვის. „ბაჩატას“ კარი 4 თვის წინ გავაღეთ და უკვე ძალიან ბევრ სტუმარს შევაყვარეთ თავი, ჩვენთვის „ბაჩატა“ მეორე სახლია და აუცილებლად იგივე გრძნობა გაგიჩნდებათ თქვენც, როგორც კი ფეხს შემოაბიჯებთ.
მისი ისტორია ასე იწყება: მე და მამუკა გურმანი ადამიანები ვართ და მუდმივად ვეძებთ საინტერესო სივრცეებს, სადაც შეიძლება გემრიელად მიირთვა, მყუდროდ მოეწყო, ისიამოვნო საუცხოო სასმლით და განიტვირთო. რა თქმა უნდა, თბილისში არის ჩვენი ფავორიტი ობიექტები, თუმცა გვინდოდა კიდევ უფრო მეტი ადგილი, რომელსაც ყოველდღე ვესტუმრებოდით და ეს არ იქნებოდა მომაბეზრებელი, არ დაემსგავსებოდა რუტინას და ყოველთვის ახალი შთაბეჭდილებებით აგვავსებდა. სწორედ ამიტომ გაჩნდა „ბაჩატას“ იდეა, ადგილი, სადაც არ მოგბეზრდება მეგობრებთან შეხვედრა, ოჯახის წევრებთან ერთად ვახშამი თუ საღამოს სხვადასხვა ხასიათის ღონისძიებაზე სიამოვნება.
გვესაუბრეთ რესტორნის კონცეფციაზე.
ხშირად გვეკითხებიან, რატომ დავარქვით „ბაჩატა“ და აქვს თუ არა რაიმე საერთო ცეკვასთან.
იდეა არ ყოფილა პირდაპირი პარალელის გავლება სახელსა და ცეკვას შორის, თანაც „ბაჩატა“ უფრო ბრაზილიური ცეკვაა, ვიდრე მექსიკური, თუმცა მას აქვს ხასიათი, ძალიან საინტერესო და ინტიმური. მარტივი, ლამაზი, რომანტიკული და მიმზიდველი მოძრაობები ჩვენს კონცეფციასთან გავაიგივეთ. იგივე განწყობა გვინდოდა შეგვექმნა ჩვენთან და ვფიქრობ, გამოგვივიდა.
რა სახის მომსახურებას სთავაზობთ საზოგადოებას?
ჩემი აზრით, „მომსახურება“ ცოტა უხეში სიტყვაა, ჩვენ გულიანად ვიღებთ და ვუმასპინძლდებით ჩვენს სტუმრებს ლანჩზე, ვახშამსა და უფრო გვიან საინტერესო საავტორო კოქტეილებზე, რომელთაც მექსიკელი და ესპანელი ადამიანების სახელები ჰქვიათ.
ხშირად აღნიშნავენ ჩვენთან ღონისძიებებს, დაბადების დღეებსა და კორპორაციულ წვეულებებს, ვეხმარებით სტუმრებს საინტერესო საღამოების დაგეგმვაში, რომელიც არ სცდება მექსიკურ და ესპანურ ხასიათს.
„ბაჩატას“ სამზარეულო გაგვაცანით.
სამზარეულოს ახლაგაზრდა და ძალიან ნიჭიერი შეფი მართავს და მუდმივად სიახლეებს გვთავაზობს. მენიუ არ არის მოცულობითი, თუმცა სიურპრიზებით სავსეა. ძალიან დიდ ყურადღებას ვაქცევთ ინგრედიენტების ხარისხს და ჩვენი გამორჩეული გემოები დიდწილად ამის დამსახურებაცაა.
თამამად ვიტყვი, რომ მექსიკური „ტაკოები“, „კესადია“, „ემპანადა“, „სევიჩე“ და, რა თქმა უნდა, ჩვენი განსაკუთრებული ჩიზქეიქი „სან სებასტიანი“ „სმარტ ფუდის“ კატეგორიაა. ყველასთვის გასაგები და მისაღები, რასაკვირველია, ჩვენი საავტორო შტრიხებით.
რა მიგაჩნიათ რესტორნის ნიშად?
გახსნამდე რომ გეკითხათ, გეტყოდით, რომ კონცეფცია და გარემოა, თუმცა ამ გადმოსახედიდან ჩვენი ნიშაა ის ადამიანები, ვინც ჩვენთან დადიან და ზუსტად ხვდებიან, სად მოხვდნენ. ძალიან ამაყი ვარ, რომ მუდმივად ასეთი კარგი სტუმრები გვყავს. ამიტომ აქ არის – BaChata Community.
სად მდებარეობს რესტორანი?
„ბაჩატა“ აბაშიძის 31 ნომერში მდებარეობს და არც ისე მარტივია მოგნება, რადგან დიდი აბრებითა და კაშკაშა რეკლამებით არ ვსარგებლობთ.
რატომ „ბაჩატა“?
იმიტომ, რომ ყველასგან განსხვავებულია – ხასიათით, ინტერიერით, კონცეფციით. თუმცა ამას მოყოლით ვერ ახსნი, ერთხელ თუ მაინც ესტუმრებით „ბაჩატას“, თავად მიხვდებით განსხვავებას.
ბოლოს სამომავლო გეგმები გაგვაცანით.
„ბაჩატა“ დიდი რესტორანი არ არის, თუმცა მუდმივად ვცდილობთ ვიყოთ მოვლენების ეპიცენტრში. ცოტა ხნის წინ ვიყავით Gudauri Summer Set-ზე და ეს ჩვენთვის ახალი გამოწვევა იყო. ვეცდებით, მუსიკალურ ფესტივალებში კიდევ მივიღოთ მონაწილეობა.
სექტემბრიდან მთელი კვირა საინტერესო ღონისძიებებით იქნება დატვირთული, რომ თითქმის ყოველდღე შევქმნათ ნამდვილი მექსიკური ფიესტა.
