ლიკა კედელაშვილი იგივე Lika Wallace გრაფიკოს-დიზაინერი და ილუსტრატორია. ხატვით ბავშვობიდან იყო გატაცებული, სწავლა სამხატვრო აკადემიაში, არქიტექტურულზე გააგრძელა, თუმცა ბოლო 8 წელია ხატვას დაუბრუნდა. ქმნის ილუსტრაციებს, სადაც კარგად ჩანს მისი ხედვა და ტექნიკა. ილუსტრაციებთან ერთად მის პორტფოლიოში შეხვდებით ვებ და გარე გამოყენების ბანერებს, ვიზუალური იდენტობის პროექტებს, მარკეტინგული მასალების დიზაინსა და ანიმაციურ რეკლამებს.
რატომ აირჩიეთ ეს პროფესია?
ხატვა ბავშვობიდან ჩემი დიდი სიყვარული იყო. მახსოვს, სკოლაში ყველა საგნის რვეულში პატარა ჩანახატებს ვაკეთებდი. მოგვიანებით დედას ვთხოვე, ხელოვნების სკოლაში ვეტარებინე, სადაც პირველად შევეხე ზეთის საღებავს, გრაფიკასა და ქანდაკებას, და მაშინვე ძალიან შემიყვარდა. ამას გარდა, საკუთარ თავში ვპოულობდი გარემოზე დაკვირვებისა და მისი უფრო მეტად კეთილმოწყობისა და გალამაზების სურვილს. სწორედ ამ დროს დავინტერესდი არქიტექტურით. როდესაც პროფესიის არჩევის დრო დადგა, გადაწყვიტე, არქიტექტურულზე მესწავლა სამხატვრო აკადემიაში. იქ, არქიტექტურის გარდა, ხატვასაც ვახერხებდი და ძალიან სახელოვნებო გარემო იყო. მაგისტრატურაც ამ მიმართულებით განვაგრძე, თუმცა ამავე პერიოდში აკადემიაში 3D მოდელირების კონკურსი ჩატარდა, სადაც ჩემმა შექმნილმა მოდელმა გაიმარჯვა და „ჯიპას“ სასერტიფიკატო პროგრამების ვაუჩერი გადმომეცა, ხოლო ჩამონათვალში გრაფიკულმა დიზაინმა მომჭრა თვალი. სწორედ აქედან დაიწყო ჩემი გარდაქმნა 2D ვიზუალიზატორად. „ჯიპაში“ საშუალება მქონდა, ინდუსტრიაში საუკეთესო პროფესიონალები მყოლოდა ლექტორებად, რამაც დიდი შთაგონება, გამოცდილება და ცოდნა მომცა.
არქიტექტორად ცოტა ხანს ვიმუშავე, ჩემი სამყარო სრულიად მოიცვა დიზაინმა. გარდა სამსახურისა, აქტიურად ვმუშაობდი კერძო შეკვეთებზე და აღმოვაჩინე, რომ ილუსტრაციების ხატვა ყველაზე მეტად მსიამოვნებდა. ციფრული ილუსტრაციების კვალდაკვალ, სახლში მივიწყებული საღებავებიც გადმოვალაგე და თავისუფალ დროს ხატვაც დავიწყე.
როგორია მუშაობის პროცესი? საიდან ჩნდება იდეა და რა შთაგაგონებთ?
ჩემი მუშაობის პროცესი საკმაოდ მრავალფეროვანია და დამოკიდებულია პროექტის ტიპზე. თუმცა შემიძლია გამოვყო რამდენიმე ძირითადი ეტაპი:
იდეის გენერირება: ეს არის ყველაზე მნიშვნელოვანი ეტაპი, როდესაც ვფიქრობ იდეაზე, ვიკვლევ თემას, ვეძებ შთაგონებას. ხშირად იდეები სპონტანურად ჩნდება, მაგრამ ხანდახან საჭიროა უფრო მეტი დრო და ძალისხმევა. ჩემთვის ყველაზე დიდი შთაგონების წყარო მუსიკა და ბუნებაა.
კონცეფციის შემუშავება: ეს მოიცავს მუდბორდისა და ესკიზების შექმნას, კომპოზიციის შერჩევას, ფერების პალიტრის განსაზღვრას.
ნამუშევრის შექმნა: კონცეფციის სრულყოფის შემდეგ ვიწყებ უშუალოდ ნამუშევრის შექმნას. ეს შეიძლება იყოს ციფრული ილუსტრაცია, ნახატი საღებავებით ან სხვა დიზაინპროდუქტი.
რედაქტირება: ნამუშევრის დასრულების შემდეგ ვამოწმებ მას დეტალურად, ვასწორებ შეცდომებს და ვამატებ საჭირო დეტალებს.
წარდგენა: საბოლოო ეტაპზე ვამზადებ ნამუშევარს წარსადგენად. ეს შეიძლება იყოს ციფრული ფაილი ან ორიგინალი ნამუშევარი.
როგორ ფიქრობთ, რა გამოგარჩევთ და როგორია თქვენი ხელწერა?
ვფიქრობ, ჩემი პროექტების მრავალფეროვნება ყველაზე მეტად გამომარჩევს, რადგან ჩემს პორტფოლიოში ილუსტრაციებთან ერთად შეხვდებით ვებ და გარე გამოყენების ბანერებს, ვიზუალური იდენტობის პროექტებს, მარკეტინგული მასალების დიზაინსა და ანიმაციურ რეკლამასაც კი. ვფიქრობ, ჩემი ხელწერა ფერადოვნება და ექსპრესიულობაა.
შეგიძლიათ რეკომენდაციის სახით ჩამოგვითვალოთ რამდენიმე გრაფიკული დიზაინერი, ვინც უნდა ვიცოდეთ?
Jessica Walsh, Stefan Sagmeister, Max Miedinger, Paul Rand, Saul Bass…
სამომავლო გეგმები…
დღეს, უკვე 8-წლიანი გამოცდილებით ამ სფეროში, პორტფოლიოს რომ გადავხედავ ხოლმე, ყველაზე დიდი სიყვარულით ისევ ილუსტრაციებს ვუყურებ. მაქვს ბევრი გამოუფენელი ნამუშევარიც, რომლებსაც იმედია, მალე შევმატებ ჩემს პორტფოლიოს.
სწორედ ამიტომ ჩემს თავს მომავალშიც ილუსტრაციასა და დიზაინში ვხედავ, მსურს შევქმნა უფრო მასშტაბური და საინტერესო პროექტები.
ტექსტი: სოფიო მალანია
ფოტო: ალექსეი სეროვი
