ჯეკი კენედი ყოველთვის ასოცირდებოდა დახვეწილ და სადა, თუმცა გამორჩეულ სტილთან. მისი რჩეული ჩანთები დღეს უკვე მოდის ისტორიის ნაწილია: დიზაინები, რომლებიც ათწლეულობის შემდეგაც არ კარგავს აქტუალურობას და თანამედროვე სტანდარტებსაც განსაზღვრავს.
წარმოგიდგენთ ჯეკი კენედის ლეგენდარული ჩანთების კოლექციას:
HERMÈS TRIM
Hermès Trim პირველად 1958 წელს წარადგინეს და მალევე გახდა ჯეკი კენედის ერთ-ერთი ყველაზე ცნობილი ყოველდღიური ჩანთა. მრგვალად დახურული ზედა ნაწილი, გრძელი მხრის სამაგრი და მინიმალისტური ფორმა სრულად ასახავდა იმ ბუნებრივ ელეგანტურობას, რომელიც ჯეკის სტილის მთავარ ხელწერად იქცა. ჰობო სტილის ჩანთები მოდის მთავარ ტრენდად ბევრად მოგვიანებით იქცა, Hermès Trim კი უკვე არსებობდა. რბილი კონსტრუქცია და სუფთა ხაზები ერთ-ერთი პირველი მცდელობა იყო, შეექმნათ ლუქს კლასის ჩანთა, რომელიც ერთდროულად სადაც იყო და დახვეწილიც — ზუსტად ისეთი, როგორსაც ჯეკი ატარებდა.
GUCCI JACKIE
1961 წელს შექმნილი Gucci-ს მხარჩანთა საბოლოოდ ჯეკი კენედის სახელს დაუკავშირდა. პაპარაცების მიერ გადაღებულ ფოტოებში ის მუდმივად ამ ჩანთით ჩნდებოდა, რის შემდეგაც მოდელმა ოფიციალურად მიიღო სახელწოდება — Jackie.
თანამედროვე დაბრუნება — Jackie 1961
Gucci-მ მოდელი ახალი სიცოცხლით 2020 წლის შემოდგომა-ზამთრის კოლექციაში, ალესანდრო მიქელეს ხელმძღვანელობით გააცოცხლა. ამით კიდევ ერთხელ დამტკიცდა, რომ ჯეკი კენედის გავლენა მოდაზე მხოლოდ ისტორია არ არის.
CHANEL 2.55
ჯეკი კენედი ხშირად ასოცირდებოდა Chanel-ის ლეგენდარულ 2.55 ჩანთასთან — მოდის ისტორიაში ერთ-ერთ ყველაზე მნიშვნელოვან დიზაინთან. ის იდეალურად ერწყმოდა მის გარდერობს: ელეგანტური, სტრუქტურული და დახვეწილი ისე, რომ არასდროს გამოიყურებოდა გადატვირთულად.
VALENTINO BAG
ჯეკი კენედი მჭიდროდ იყო დაკავშირებული Valentino-ს სახლთანაც, რომელმაც მნიშვნელოვანი როლი ითამაშა მისი დახვეწილი და უკიდურესად ელეგანტური იმიჯის ჩამოყალიბებაში. კენედი არაერთხელ გამოჩენილა ვალენტინოს შავი ჩანთითაც.
HERMÈS CONSTANCE
Hermès-ის კიდევ ერთი საკულტო მოდელი — Constance 1959 წელს გამოჩნდა.მართკუთხა ფორმა, მხრის სამაგრი და ცნობილი „H“ საკეტი ჯეკის სტილის უფრო მკაფიო, სტრუქტურულ და ძალზე დახვეწილ მხარეს ასახავს. ჯეკი არასოდეს მისდევდა ტრენდებს. ის ირჩევდა ნივთებს, რომლებიც იყო ფუნქციური, ელეგანტური და ყოველდღიურად სატარებელი.
ჯეკი კენედის ჩანთები — Hermès Trim-იდან Gucci Jackie-მდე დღესაც განსაზღვრავს თანამედროვე სტილის ესთეტიკას. ის დღემდე ითვლება მოდის ერთ-ერთ მნიშვნელოვან ფიგურად, რომელიც ყოველთვის დახვეწილ სტილთან ასოცირდება.
ასევე დაგაინტერესებთ
