ალბათ დამეთანხმებით, რომ ყველას გვინდა ვიცხოვროთ ეკონომიკურად ძლიერ ქვეყანაში, თუმცა ჩვენ შორის ბევრმა არ იცის, რომ საამისოდ თითოეულ ჩვენგანს შეგვიძლია საკუთარი მცირე წვლილის შეტანა, თუნდაც ქართული პროდუქციის შეძენით. იმისათვის, რომ აქტიურად დავიწყოთ ქართული პროდუქტის შეძენა, საჭიროა ვფლობდეთ უფრო მეტ ინფორმაციას, თუ რომელი ქართული ნაწარმია ხარისხიანი, რომელი კომპანია რა ბრენდით ოპერირებს. ცნობადობის ამაღლების მიზნით, ქართული #OK! იწყებს ახალ რუბრიკას #იყიდექართული. ამჟამად კი შევარჩიეთ ერთ-ერთი წარმატებული ქართული კომპანია − „სანტე“.
„სანტე ჯი-ემ-თი პროდუქტები“ დაარსდა 1997 წელს თბილისის რძის კომბინატის ბაზაზე და 2016 წლიდან მსოფლიო რძის პროდუქტების ბაზრის ლიდერ „Lactalis ჯგუფის“ წევრი გახდა.
საზოგადოებისთვის „სანტე ჯი-ემ-თი“ ცნობილია რძისა და რძის პროდუქტების ისეთი ბრენდებით, როგორიცაა „სანტე“, „სანტინო“, „სანტისიმო“, „სანებო“, „სანტისიმო ამორე“ და „ლოკო მოკო“. თამამად შეიძლება ითქვას, რომ ეს ის ბრენდებია, რომლებიც მოწინავე პოზიციებს ინარჩუნებენ ქართულ ბაზარზე. როგორც „სანტეში“ ამბობენ, ეს ხარისხის დამსახურებაა. კომპანია მუდმივად ორიენტირებულია, რომ მომხმარებელთან მივიდეს ხარისხიანი, მრავალფეროვანი და ინოვაციური პროდუქტი.
„სანტე“ პირველი იყო საქართველოში, რომელმაც ინვესტიცია განახორციელა რძის მიღებისა და გადამუშავების ინფრასტრუქტურაში. შედეგად დღეს „სანტე“ რძის უმსხვილესი გადამამუშავებელი კომპანიაა საქართველოში, რომელიც 2000-მდე ფერმერთან თანამშრომლობს, წლის განმავლობაში კი დაახლოებით 12 მილიონ ლიტრ რძეს იღებს და ამუშავებს. რძის მიმღები 15-მდე პუნქტიდან თქვენს სახლამდე რძე რამდენიმეჯერ გადის შემოწმებას ხარისხის სხვადასხვა მაჩვენებელზე, მაგალითად ცხიმის, წყლისა და ცილის მაჩვენებლებზე, რათა მომხმარებელი უზრუნველვყოთ ნატურალური და უსაფრთხო პროდუქტით მთელი წლის განმავლობაში. მაღალმთიანი რეგიონებიდან შეგროვებული რძე ინარჩუნებს საქართველოს ხელუხლებელ ბუნებაში არსებულ ყველა სიკეთეს. სწორედ კომპანიაში დანერგილი ხარისხის კონტროლის უმკაცრესი ნორმები განსაზღვრავს „სანტეს“ მთავარ უპირატესობას ბაზარზე − სტაბილურად მაღალ ხარისხს.
აღსანიშნავია, რომ „სანტე“ ფლობს მაწვნის მომზადების უნიკალურ ტექნოლოგიას, რომლის საფუძველზე კომპანია დღემდე ენდემურ მაწვნის დედოს იყენებს.
„სანტე ჯი-ემ-თი პროდუქტების“ ხარისხზე მეტყველებს არა მხოლოდ გემო, არამედ შეფუთვაც. „სანტე“ მკაცრად იცავს ყველა რეგულაციას, რაც კანონმდებლობით არის გათვალისწინებული. პროდუქციის შეფუთვაზე ყოველთვის წერია პროდუქტის ზუსტი შემადგენლობა და შენახვის პირობები.
კომპანია მუდმივად ზრუნავს განვითარებაზე და მომხმარებლებისთვის ინოვაციური პროდუქტების შეთავაზებაზე. ერთ-ერთი ბოლო ინოვაცია, რომელიც კომპანიამ მომხმარებელს შესთავაზა, არის „სანებოს“ ბრენდის სახელით შექმნილი ნამდვილი ქარხნული ყველი, რომელიც აპრილის თვიდან უკვე შეგიძლიათ იხილოთ დახლებზე.
როცა ვყიდულობთ ქართულს, ამით ვაძლიერებთ ქართულ ბიზნესს და შესაბამისად ვაძლიერებთ ქვეყანას. სწორედ ამიტომ არის საჭირო დავინახოთ, თუ რამხელა მნიშვნელობა აქვს ქართული პროდუქტის შეძენას, მით უმეტეს, როცა გვაქვს ხარისხიანი ნაწარმი. დროა, ქართული ასოცირდებოდეს ხარისხიანთან.
ტექსტი: სოფიო მალანია
