ჟურნალ OK!-ის დღევანდელი გმირი წარმატებული ქალია. სასტუმრო „შერატონ გრანდ თბილისი მეტეხი პალასის“ ფიტნეს და სპაცენტრ „პაუზას“ მენეჯერ ია გელაშვილს მიაჩნია, რომ წარმატება მიზანდასახულობის, შრომისმოყვარეობისა და საქმისადმი დიდი სიყვარულის შედეგია. მუდმივი განვითარების სურვილი იმდენად დიდია, რომ ამ დროს შეუძლებელიც შესაძლებელი ხდება. ია მალე დედა გახდება, ის ორსულობის ბოლო კვირაშიც ისევ ისე აქტიურად მუშაობს და ჩვენს მკითხველს უზიარებს, თუ რამდენად მნიშვნელოვანია სპაცენტრის არსებობა ტურიზმის სექტორში და რა გამოარჩევს „პაუზას“ ბაზარზე.
როგორ ფიქრობთ, რა არის თქვენი წარმატების საწინდარი?
„მარიოტის“ ქსელში ამ პოზიციაზე ორი წელია რაც ვმუშაობ, აღნიშნულ სფეროში კი 14-წლიანი გამოცდილება მაქვს. ეს არის საქმე, რომელიც თავდავიწყებით მიყვარს, ეს არ არის ვალდებულება, ეს სიამოვნებაა. გამუდმებით სიახლისა და გამოწვევების ძიებაში ვარ.
საკუთარი ძალის რწმენა, შრომისმოყვარეობა და მუდმივი განვითარების სურვილი − ეს ის თვისებებია, რამაც წარმატება მომიტანა. მიუხედავად იმისა, რომ ორსულობის ბოლო კვირაში ვარ, ძალიან მიჭირს აქაურობის დატოვება, ალბათ, სწორედ ეს არის პასუხისმგებლობის შეგრძნება და საქმისადმი დიდი სიყვარული. ვფიქრობ, ყველა ქალს შეუძლია იყოს წარმატებული და დამოუკიდებელი, იმიტომ, რომ ქალი ძალიან ძლიერია, ის მუშაობს, ზრდის შვილებს, უვლის ოჯახს და ჟურნალ OK!-ის წასაკითხადაც კი რჩება დრო. ეს მხოლოდ ქალებს შეუძლიათ!
გვესაუბრეთ დეტალურად, რა სახის სპაპროცედურებს სთავაზობს „პაუზა“ საზოგადოებას?
„პაუზა“ სპაადგილია, სადაც მომხმარებელს შეუძლია მძიმე სამუშაო დღის შემდეგ განიტვირთოს, ისიამოვნოს და, რა თქმა უნდა, გაჯანსაღდეს − როგორც ფიზიკურად, ისე სულიერად. აქ შეგიძლიათ უბრალოდ დააპაუზოთ დრო.
სპაში გვაქვს ღია და დახურული აუზები, ორთქლისა და ფინური საუნები, ჰამამის ოთახი, ჯაკუზი, დიდი ფიტნესდარბაზი, რომელიც აღჭურვილია ტექნოჯიმის უახლესი ინვენტარით. ასევე, მოთხოვნიდან გამომდინარე, გავხსენით კრივის სივრცე.
აღსანიშნავია სერვისები, რომლებსაც მომხმარებლებს ვთავაზობთ: ტანისა და სახის პროცედურები, ტანის სკრაბები და გადახვევები, სპეციალურად წყვილებისთვის შექმნილი პროგრამები, ჰამამის პროცედურები და ასევე, ულამაზესი და მრავალფეროვანი მანიკიურ-პედიკიურის განყოფილება. როგორც ხედავთ, ყველა პირობაა შექმნილი უსასრულო განტვირთვისა და დასვენებისთვის.
ასევე, მინდა აღვნიშნო გუნდი − პროფესიონალი თანამშრომლები, რომელთა დამსახურებითაც გვყავს ძალიან ბევრი ლოიალური მომხმარებელი. სწორედ ისინი ქმნიან დაუვიწყარ შთაბეჭდილებებს.
მთავარი, რაც გამოგარჩევთ ბაზარზე…
უპირველესად სერვისის ხარისხი, მუდმივი სიახლეები და ყოველთვიური აქციები, რომლებითაც ვანებივრებთ საზოგადოებას. მაგალითად, ნებისმიერი სპაპროცედურის დაჯავშნის შემთხვევაში, მომხმარებელს ვჩუქნით მთელ დღეს სპაში.
გარდა ამისა, გამოგვარჩევს ყველაზე დიდი ფიტნესდარბაზი, რომელიც აღჭურვილია უმაღლესი ხარისხის ინვენტარით. მუდმივი ზრდა და განვითარებაზე ორიენტირება, ამავდროულად − ყველაზე ხელმისაწვდომი ფასები.
აღსანიშნავია, მთლიან სასტუმროს, შესაბამისად „პაუზა სპა“-საც 4 წელია რაც ჩაუტარდა სრული რეაბილიტაცია. შესაბამისად, სპა აღჭურვილია თანამედროვე და მაღალი კლასის ინვენტარით, რაც საქართველოს ბაზარზე იშვიათია.
როგორც უკვე აღნიშნეთ, მალე დედა გახდებით. რომელი სპაპროცედურების ჩატარებაა ორსულობისას რეკომენდებული?
მასაჟი მშვენიერი საშუალებაა ორსულობის პერიოდში თავის მოსავლელად. ამ დროს სხეული მუდმივად იცვლება. იპოვეთ დრო, გაიკეთოთ როგორც ტანის მასაჟი, ასევე სახის მოვლის პროცედურები, რათა თქვენი სხეული მზად იყოს ცვლილებებისთვის. „პაუზა სპაში“ ორსულებისთვის ყველა პროცედურა ტარდება სპეციალური, ჰიპოალერგიული პროდუქტებით. აღნიშნული პროცედურების ჩატარება შესაძლებელია ორსულობის მეორე და მესამე ტრიმესტრში, პირადი ექიმის ნებართვით.
რამდენად მნიშვნელოვანია თქვენი მიმართულება ტურიზმის სექტორში?
ვფიქრობ ტურიზმისა და სასტუმროს სექტორში ერთ-ერთი მნიშვნელოვანი მიმართულებაა სპაცენტრები. ნებისმიერი მიზნით ჩამოსული ტურისტისთვის განტვირთვა და დასვენება ყოველთვის საჭიროა, ამიტომ აუცილებელია ქვეყანაში გვქონდეს მაღალი დონის სპაცენტრები, სადაც სტუმრებს შესაფერის სერვისს შევთავაზებთ. მოხარული ვარ, რომ საქართველოში ტურიზმი ძალიან სწრაფად ვითარდება, ტურისტების რაოდენობაც შესაბამისად იზრდება. ამ ტენდენციის გათვალისწინებით, ვცდილობთ ჩვენც განვვითარდეთ და სიახლეები შევთავაზოთ მომხმარებლებს, რადგან ქვეყანა ამ მიმართულებითაც გავხადოთ ტურისტებისთვის მიმზიდველი ადგილი.
რომელი პროცედურებია ყველაზე მოთხოვნადი ამ სეზონზე?
რა თქმა უნდა, ნებისმიერ სეზონზე ყველაზე მოთხოვნადია სახის მოვლის პროცედურები, რომლებიც განსაკუთრებული პროდუქციით, ჩვენი თერაპევტების ჯადოსნური ხელების კომბინაციაში, საოცარ შედეგს იძლევა. ამ სეზონზე კი აქტუალურია ღვინის დეტოქს-თერაპია, რომელიც იდეალური პროცედურაა კანისთვის. მასში შედის: ღვინის აბაზანა, ყურძნის წიპწის სკრაბი, ფელამუშის გადახვევა და სარელაქსაციო მასაჟი, ხოლო დასასრულ, უგემრიელესი ჭიქა ღვინო ჩვენგან საჩუქრად.
სამომავლო გეგმები…
ჩემი დეკრეტული შვებულების დასრულების შემდეგ ორი ძირითადი მიმართულებით ვგეგმავთ განვითარებას, კერძოდ: უფრო მრავალფეროვანი გავხადოთ თავის მოვლის პროდუქტების არჩევანი ჩვენს სპაში, რაც გულისხმობს პრემიუმკლასის თავის მოვლის საშუალებების დიდ არჩევანს, რომელიც, რა თქმა უნდა, ხელმისაწვდომი იქნება მხოლოდ „პაუზა სპაში“. ვინაიდან კომპანია მუდამ ორიენტირებულია მომხმარებლისთვის კომფორტული გარემოს შექმნაზე, ვგეგმავთ შიდა აუზის გაფართოებას, რაც უფრო მიმზიდველს გახდის ჩვენთან სტუმრობას.
ტექსტი: სოფიო მალანია
ფოტო: ალექსეი სეროვი
