ჯიჯი და ბელა ჰადიდები პალესტინური წარმოშობის ამერიკელი მულტიმილიონერის მუჰამედ ჰადიდისა და ჰოლანდიელი მოდელის იოლანდა ფოსტერის ქალიშვილები არიან. ჯიჯიმ სამოდელო კარიერა ჯე კიდევ ბავშვობის ასაკში დაიწყო, როდესაც Baby Guess-თან ითანამშრომლა. მიუხედავად არაერთი წარმატებული ფოტოსესიისა, ჯიჯის ადრეულ ასაკში ფრენბურთის პროფესიონალი მოთამაშე სურდა გამხდარიყო, ბელა კი ოცნებობდა სახელგანთქმული ცხენოსანი ყოფილიყო. 2014 წელს ჯიჯი პირველად მოხვდა Models.com-ზე არსებულ 50 საუკეთესო მოდელს შორის, 2016 წელს კი British Fashion Council-ის მიერ წლის საერთაშორისო მოდელის სტატუსი მიიღო. ჯიჯის უმცროსი დის დებიუტი პოდიუმზე 2015 წელს შედგა, 2017 წელს მან Forbes-ის ყველაზე მაღალანაზღაურებად მოდელებს შორის მეცხრე ადგილი დაიკავა. 2019 წელს ბელა პლანეტის ულამაზეს ქალად აღიარეს, ხოლო 2022 წელს ბრიტანული მოდის დაჯილდოებაზე “წლის საუკეთესო მოდელად” დაასახელეს. დები ჰადიდები ამჟამად მსოფლიოს ერთ-ერთი ყველაზე მაღალანაზღაურებადი მოდელების სიაში მნიშვნელოვან ადგილებს იკავებენ. წარმოგიდგენთ გოგონების გულახდილ ინტერვიუს, სადაც ჟურნალისტის როლში ჯიჯი ჰადიდი გვევლინება, ხოლო რესპონდენტისაში კი ბელა ჰადიდი.
ჯიჯი: ბელა, შენ რეალურ ცხოვრებაში რადიკალურად განსხვავებული ადამიანი ხარ იმ პიროვნებისგან, რომელსაც საზოგადოება ფოტოსესიებსა და პოდიუმზე ხედავს. შენი გულშემატკივრები ფიქრობენ, რომ რადგან კამერებთან ხშირად გიწევს მუშაობა შენს შესახებ ყველაფერი იციან. რა შეგიძლია უთხრა მათ, რაც აუცილებლად გააოცებთ მათ?
ბელა: არასდროს გადის დღე, რომ არ გავიღიმო. ადამიანები ხშირად ამბობენ ჩემს შესახებ, რომ ერთი და იგივე სახის გამომეტყველება მაქვს, რაც ტყუილია. მე ასე იმიტომ ვიქცევი, რომ ფოტოგრაფებისგან ვიღებ მითითებებს, როგორი გამომეტყველება მქონდეს ფოტოსესიის დროს, მაგრამ ეს არ გამოხატავს იმას, როგორი ადამიანი ვარ მე რეალურად. შენ იცი ეს ყველაფერი ჯიჯი, რადგან ბავშვობიდან მიყურებ.
ჯიჯი: მიკვირს, რატომ ფიქრობს ხალხი, რომ სიცილი არ გიყვარს. მე ვკითხულობ ხოლმე კომენტარებს, მაგრამ ვერ ვიჯერებ, რომ ეს სიტყვები შენს შესახებ წერია. შენ ჩემთვის ხარ ადამიანი, რომელიც არის კეთილი, მეგობრული და ძალიან მგრძნობიარე. ახდენს თუ არა შენზე სოციალურ მედიაში გავრცელებული ნეგატიური კომენტარები ზეგავლენას?
ბელა: მე დიდი ხნის განმავლობაში ვებრძოდი საკუთარ თავს, მქონდა ომი საკუთარ მესთან, სოციალურ მედიასთან და ადამიანების მიერ გავრცელებულ ნეგატიურ ინფორმაციასთან. ადამიანები ზოგჯერ ამბობდნენ: “ის საშინლად უხეშია”, მე კი ამ დროს ვფიქრობდი: “იქნებ მე უბრალოდ ცუდი დღე მქონდა, ან უბრალოდ ვტიროდი?”. ადამიანებმა ხშირად არ იციან რეალურად სხვების ცხოვრებაში რა ხდება, ამიტომ ერთი შეხედვით დასკვნები, ვფიქრობ, რომ ნამდვილად არ უნდა გამოიტანონ.
ჯიჯი: მართალია, ადამიანები ხშირად უყურებენ ინსტაგრამზე გავრცელებულ ფოტოს და ჰგონიათ, რომ უკვე კარგად იციან როგორი ადამიანი ხარ.
ბელა: ზოგჯერ ძალიან რთულია ეს პროცესი ჩემთვის. ადამიანები ხედავენ ჩვენს ფოტოებს, რომლებსაც პაპარაცები გვიღებენ სახლიდან გამოსვლის წინ და ჰგონიათ, რომ ერთი შეხედვით მარტივად გასაგებია ყველაფერი. იცი, რა არის ყველაზე რთული? როდესაც შენთვის წყნარად გამოდიხარ სახლიდან და 40 ადამიანი გელოდება გარეთ ფოტოაპარატით ხელში, ამ დროს კი შენ ვალდებული ხარ სრულიად უცხო ადამიანებს გაუღიმო, რათა მათ ცუდი ადამიანი არ ეგონო. თუ ასე არ მოიქცევი ინტერნეტში გავრცელდება შენი ფოტოები და ხალხი იტყვის, რომ ფოტოგრაფებს ცუდად ექცევი. ვცდილობ, მაქსიმალურად გავჩერდე ხოლმე ისეთ ადგილებში, სადაც გულშემატკივრები მელოდებიან, რომ გამესაუბრონ და ჩემთან ერთად ფოტოები გადაიღონ.
ჩვენ დედამ ასე გაგვზარდა, რომ ყველა ადამიანს პატივისცემით მოვექცე, არ აქვს მნიშვნელობა ეს იქნება პრეზიდენტი, შენი ქვეშემრდომი, ფოტოგრაფი, პაპარაცი თუ შენი გულშემატკივარი. ჩემთვის ყველა ადამიანის დრო მნიშვნელოვანია, ამიტომაც სულ ვჩერდები ფანებთან შესახვედრად, რომლებსაც შეუძლიათ დრო საკუთარ ოჯახის წევრებთან ერთად გაატარონ, მაგრამ ისინი მე მიცდიან. ასე, რომ მე მათ მიმართ დიდი პატივისცემა გამაჩნია, ისინი ხშირად სიცივეში დგანან, სასტუმროს წინ, რომ ჩამეხუტონ, მე კი მათ ამაზე უარს ვერ ვეტყვი, რადგან მათი ქმედება ჩემთვის რაღაცას ნიშნავს.
ჯიჯი: მე ძალიან კარგად ვიცი, რომ წვეულებაზე სიარული არ გიყვარს, თუმცა ბევრმა ადამიანმა არ იცის, რომ სახლში ოჯახის წევრებთან ყოფნა გარეთ გასვლას ყოველთვის გირჩევნია.
ბელა: ზოგჯერ მინდა უბრალოდ “მე” ვიყო თუნდაც 30 წუთით და არა “ბელა”, არ მიყვარს წვეულებებზე სიარული, მირჩევნია ჩემს გარშემო იყვნენ ადამიანები, რომლებსაც ნამდვილად ვუყვარვარ და არა უცხოები. შაბათ საღამოს მირჩევნია ვითამაშო ვიდეო თამაშები, ვუყურო ფილმებს ან გავაკეთო საჭმელები ჩემი ოჯახის წევრებთან ერთად.
მე ყოველთვის ვეკითხები საკუთარ თავს, როგორ მოახერხა გოგონამ, რომელსაც აქვს ბევრი კომპლექსი, აწუხებს დეპრესია, არ მოსწონს საკუთარი სხეული, აქვს ჭამასთან დაკავშირებული არაერთი პრობლემა და ვერ იტანს ადამიანებით გადატვირთულ ადგილებში ყოფნას, მაგრამ როგორც ჩანს, წლების განმავლობაში მოვახერხე გავმხდარიყავი კარგი მსახიობი.
ჯიჯი: რა გეხმარება იმაში, რომ იყო მშვიდი, წყნარი და ენერგიით სავსე სამუშაო დღისთვის?
ბელა: ძილის წინ ყოველთვის ვუსმენ სამედიტაციო მუსიკას, რაც მშვიდ ძილში მეხმარება. გაღვიძებისთანავე ვცდილობ მინიმუმ 30 წუთით მაინც არ გამოვიყენო მობილური ტელეფონი, რათა ჩემმა ტვინმა ნორმალურად ფუნქციონირება შეძლოს. ზოგჯერ უბრალოდ ვივიწყებ იმას, რომ ცნობილი ადამიანი ვარ და ამ მომენტში მე ყოველთვის ძალიან ბედნიერი ვარ.
