ესპანეთის პრემიერ-მინისტრმა პედრო სანჩესმა განაცხადა, რომ ქვეყანის ხელისუფლება 16 წლამდე ასაკის ბავშვებისთვის სოციალური მედიის გამოყენების აკრძალვას გეგმავს. პოლიტიკოსმა აღნიშნა, რომ ეს ღონისძიება ბავშვებს „ციფრული ველური დასავლეთისგან“ დაიცავს.
ზემოთ ხსენებული ინიციატივის გარდა, ესპანეთის ხელისუფლება აპირებს მიიღოს კანონი, რომელიც პლატფორმის მენეჯერებს მათ სერვისებზე სიძულვილის გაღვივებისთვის პასუხისმგებლობას დააკისრებს – ინფორმაციას Reuters პრემიერ-მინისტრ პედრო სანჩესის განცხადებაზე დაყრდნობით ავრცელებს.
„ჩვენი შვილები ისეთ სივრცეში ხვდებიან, სადაც მათი მარტო ყოფნა არასოდეს ყოფილა გათვალისწინებული. ჩვენ ამას აღარ მოვითმენთ. ჩვენ მათ ციფრული ველური დასავლეთისგან დავიცავთ “ – თქვა სანჩესმა და სხვა ევროპულ ქვეყნებსაც მსგავსი ზომების მიღებისკენ მოუწოდა.
სანჩესის თქმით, ესპანეთის ხელისუფლება აპირებს სოციალური მედიის პლატფორმებს ასაკის დადასტურების სისტემების დანერგვა მოსთხოვოს, რომლებიც „მხოლოდ საკონტროლო ველები არ იქნება“.
ესპანეთის პროკურატურა ასევე შეისწავლის კანონის შესაძლო დარღვევებს ისეთი პლატფორმების მიერ, როგორიცაა Grok, TikTok და Instagram. აკრძალვა არასრულწლოვანთა ციფრული დაცვის შესახებ არსებული კანონპროექტის ცვლილებების ნაწილი იქნება, რომელსაც ამჟამად ქვეყნის პარლამენტი განიხილავს.
შეგახსენებთ, რომ გასული წლის დეკემბერში, ავსტრალიამ 16 წლამდე ასაკის ბავშვებისთვის სოციალური მედიის გამოყენება აკრძალა. ავსტრალია გახდა პირველი ქვეყანა მსოფლიოში, რომელმაც ასეთი პლატფორმები მოზარდებისთვის ოფიციალურად შეზღუდა.
ასევე დაგაინტერესებთ
#OK! ჩხრეკა X-ის ოფისებში – საფრანგეთის პროკურატურამ ილონ მასკი დაკითხვაზე დაიბარა
