გიამბობთ ქართული კომპანიის, Megi’s Art-ის შესახებ, რომელიც მომხმარებელს სასურველი დიზაინის შოკოლადების მრავალფეროვან არჩევანს სთავაზობს, რომ არაფერი ვთქვათ იმ არომატებზე, რომლებიც დაგემოვნებისთანავე დაუვიწყარი ხდება ნებისმიერი ადამიანისთვის. კომპანიის დაფუძნების მთავარი მიზანი ხელოვნებისადმი განსაკუთრებული დამოკიდებულება იყო, რაც ჩვენმა სტუმარმა თავის ყოველდღიურ საქმიანობად აქცია და სიამოვნებით უმასპინძლდება მომხმარებლებს საკუთარი შემოქმედებით. გთავაზობთ ინტერვიუს მეგი ვერძაძესთან, რომელიც უფრო ვრცლად გვიამბობს ამ და სხვა საინტერესო საკითხების შესახებ.
უპირველესად, გაგვეცანით.
მოგესალმებით, მე ვარ მეგი ვერძაძე, Megi’s Art-ის დამფუძნებელი და ადამიანი, რომელიც ბავშვობიდან შეყვარებულია ხელოვნებაზე. სწორედაც რომ ხელოვნებად მივიჩნევ იმას, რასაც ვაკეთებ. ჩემ მიერ შექმნილი თითოეული დიზაინი თუ შოკოლადის ფილა სავსეა სიყვარულით, ჩემი მიზანიც სწორედ ეს არის – ვაკეთო საქმე, რომელიც ხალხს მხოლოდ დადებით ემოციებს მოუტანს. აქვე დავძენ – შოკოლადი ხომ ენდორფინის დონეს ზრდის ორგანიზმში.
გვიამბეთ თქვენი საქმიანობის შესახებ.
ჩემი ძირითადი საქმიანობა მოიცავს უმაღლესი ხარისხის ხელნაკეთი შოკოლადების დამზადებას. როგორც უკვე აღვნიშნე, ამ საქმეს ხელოვნებად აღვიქვამ, სწორედ ამიტომ, გემოსთან ერთად ჩემთვის უმნიშვნელოვანესია მათი დიზაინი. შოკოლადისგან ვამზადებ სხვადასხვა ფიგურას, თაიგულებს, თითქმის ყველაფერს, რაც მომხმარებლებს სურთ.
ამასთანავე, ვარ სადღესასწაულო დიზაინერი, ვალამაზებ ადამიანების ცხოვრებაში ყველაზე მნიშვნელოვან დღეებს და ეს უდიდესი სიამოვნების მომტანია ჩემთვის.
რამდენი ხანია და საიდან გაჩნდა Megi’s Art-ის იდეა?
შოკოლადის მიმართ სიყვარული, რა თქმა უნდა, ბავშვობიდან მომდევს. ასევე, როგორც უკვე იცით, ხელოვნების მიმართაც იგივე დამოკიდებულება მაქვს, ამიტომ ერთ დღეს მომივიდა იდეა, რომ ჩემთვის ორი უსაყვარლესი რამ ერთ საქმედ მექცია და ასე წარმოიქმნა „მეგის შოკოლადების“ შექმნის იდეა, რასაც 3 წლის წინ ჩაეყარა საფუძველი. მას შემდეგ საზოგადოებას ვთავაზობ ხელნაკეთ უმაღლესი ხარისხის შოკოლადებს, შექმნილს სიყვარულითა და დიდი ენთუზიაზმით. დიზაინი ყოველთვის მომხმარებლის სურვილიდან გამომდინარე იქმნება, რაც მას მეტად განსაკუთრებულს ხდის.
როგორ შევიძინოთ თქვენი პროდუქცია?
ჩემ მიერ დამზადებული პროდუქციის შეძენა შეგიძლიათ ონლაინმაღაზიის მეშვეობით megi’s art. როგორც აღვნიშნე, დიზაინის შერჩევა ხდება მომხმარებელთან შეთანხმებით, ასევე, ადგილზე მიწოდება. მაქსიმალურად ვცდილობ პირადად მივაწოდო ხოლმე მომხმარებლებს შეკვეთა და ვნახო მათი ემოციები, ეს ჩემთვის უდიდესი სიხარულის მომტანია.
ინგრედიენტები, რომელსაც პროდუქციაში იყენებთ.
ჩემი შოკოლადი, საიდუმლო ინგრედიენტების გარდა, შეიცავს გერმანული და იტალიური უმაღლესი ხარისხის შოკოლადის ბაზას და ქართული წარმოების ჩირებს, თხილეულსა და სხვა გემრიელობებს.
ნიშა გაგვიზიარეთ.
რასაც ვაკეთებ, სიხარულით ვაკეთებ. ეს ყველაფერი მომწონს და მაბედნიერებს. Megis’art-ის შოკოლადები შექმნილია სიყვარულით.
ბოლოს სამომავლო გეგმების შესახებ გვიამბეთ.
მინდა ახლო მომავალში შევქმნა ადგილი, სადაც ჩემი მომხმარებლები შეძლებენ დასვენებას, ყავის მირთმევას, შოკოლადის დაგემოვნებასა და ადგილზე შეძენას.
ტექსტი: ციაკო ღამბაშიძე
ფოტო: Tedi’s photo studio, ქეთევან ღოღობერიძე
