ბრიტნი სპირსმა მარტის დასაწყისში ალკოჰოლის ზემოქმედების ქვეშ ავტომობილის მართვის ბრალდებით დაკავების შემდეგ პირველად დაარღვია დუმილი. პოპვარსკვლავმა ინსტაგრამზე გამოაქვეყნა ვიდეო, სადაც სარკის წინ თავის 19 წლის შვილთან, ჯეიდენ ფედერლაინთან ერთად ცეკვავს და გულშემატკივრებს მხარდაჭერისთვის მადლობას უხდის.
„მადლობა ყველას მხარდაჭერისთვის… ოჯახთან და მეგობრებთან დროის გატარება დიდი კურთხევაა, იყავით კეთილები!!!“ სპირსმა თავდაპირველად პოსტის კომენტარები გამორთო, შემდეგ კი სოციალური გვერდი ჩაკეტა. გამოქვეყნების მომენტისთვის ვიდეოს თითქმის 200 000 მოწონება ჰქონდა. ვიდეოში ის ამბობს: „დამშვიდებული ვარ, ძალიან მშვიდად ვარ,“ და შვილთან ერთად სხვადასხვა პოზაში სარკის წინ პოზირებს.
44 წლის მომღერალმა მოგვიანებით კიდევ ერთი მსგავსი ვიდეო გამოაქვეყნა შვილთან ერთად და აღწერაში კვლავ დაწერა: „იყავით კეთილები”.
შეგახსენებთ, რომ სპირსი 4 მარტს, კალიფორნიაში ალკოჰოლისა და ნარკოტიკული ნივთიერებების ზემოქმედების ქვეშ ავტომობილის მართვის ეჭვით დააკავეს. საგზაო პატრულის ინფორმაციით, სამართალდამცავებს შეატყობინეს, რომ სპირსი ავტობანზე თავისი BMW-თი „არასტაბილურად და მაღალი სიჩქარით“ მოძრაობდა. პოლიციის მიერ გაჩერების შემდეგ ოფიცრებმა შენიშნეს შესაძლო ინტოქსიკაციის ნიშნები და მომღერალს ადგილზე სიფხიზლის რამდენიმე ტესტის ჩატარება მოსთხოვეს, თუმცა დაკავების შემდეგ ის მეორე დღესვე გაათავისუფლეს.
„ეს იყო სამწუხარო შემთხვევა, რომელიც სრულიად მიუღებელია,“ — განაცხადა სპირსის წარმომადგენელმა. „ბრიტნი გადადგამს სწორ ნაბიჯებს, დაემორჩილება კანონს და ვიმედოვნებთ, რომ ეს გახდება იმ მნიშვნელოვანი ცვლილებების დასაწყისი, რომელიც მის ცხოვრებაში დიდი ხანია საჭიროა. იმედია, ამ რთულ პერიოდში ის მიიღებს საჭირო დახმარებასა და მხარდაჭერას.“
წარმომადგენლის თქმით, მომღერალი შვილებთან მეტ დროს გაატარებს, ხოლო მისი ახლობლები შეიმუშავებენ გეგმას, რომელიც მის კეთილდღეობასა და სტაბილურობას შეუწყობს ხელს.
სპირსს სამართლებრივი პრობლემები წარსულშიც ჰქონია — 2007 წელს ის თავად გამოცხადდა პოლიციაში მას შემდეგ, რაც ლოს-ანჯელესში გაჩერებულ ავტომობილს დაეჯახა და შემთხვევის ადგილი დატოვა. თუმცა საბოლოოდ საქმე დახურული იქნა.
ასევე დაგაინტერესებთ
