ამერიკელი პოპვარსკვლავი Britney Spears კალიფორნიაში დააკავეს ალკოჰოლისა და ნარკოტიკული ნივთიერებების ზემოქმედების ქვეშ ავტომობილის მართვის ეჭვით.
მომღერალი ოთხშაბათს, ადგილობრივი დროით დაახლოებით 21:30 საათზე, კალიფორნიის საგზაო პატრულმა (CHP) დააკავა. მისი წარმომადგენლის განცხადებით „ეს იყო სამწუხარო შემთხვევა, რომელიც სრულიად მიუღებელია“.
საგზაო პატრულის ინფორმაციით, სამართალდამცავებს შეატყობინეს, რომ სპირსი ავტობანზე თავისი BMW-თი „არასტაბილურად და მაღალი სიჩქარით“ მოძრაობდა. პოლიციის მიერ გაჩერების შემდეგ ოფიცრებმა შენიშნეს შესაძლო ინტოქსიკაციის ნიშნები და მომღერალს ადგილზე სიფხიზლის რამდენიმე ტესტის ჩატარება მოსთხოვეს. სპირსი ხუთშაბათს გამთენიისას გაათავისუფლეს. იგი 4 მაისს უნდა გამოცხადდეს ვენტურის ოლქის უზენაეს სასამართლოში.
მომღერლის წარმომადგენელმა ასევე აღნიშნა, რომ სპირსი მზად არის დაემორჩილოს კანონს და გადადგას სწორი ნაბიჯები. მისი თქმით, ახლობლები იმედოვნებენ, რომ ეს შემთხვევა შესაძლოა გახდეს ცვლილებების დასაწყისი, რომლებიც სპირსის ცხოვრებაში დიდი ხანია საჭიროა.
„ვიმედოვნებთ, რომ ის მიიღებს იმ დახმარებასა და მხარდაჭერას, რაც ამ რთულ პერიოდში სჭირდება. მისი ვაჟები მასთან ერთად გაატარებენ დროს, ხოლო ახლობლები შეიმუშავებენ გეგმას, რომელიც მის კეთილდღეობასა და წარმატებას დაეხმარება“, — განაცხადა წარმომადგენელმა.
ინციდენტის გამოძიება ამ დრომდე გრძელდება და ქიმიური ტესტების შედეგები ჯერ მზად არ არის. სამართალდამცავების ინფორმაციით, სპირსი მარტო მართავდა შავ BMW 430i-ს და სამხრეთის მიმართულებით. ინციდენტის შემდეგ მას ავტომობილი ჩამოართვეს. ციხის ოფიციალურ ჩანაწერებში მისი პროფესია „სელებრითად“ არის მითითებული.
მედიის ინფორმაციით, დაკავების შემდეგ სპირსი საავადმყოფოში არ დაუწვენიათ, თუმცა სამართალდამცავებმა იგი ცოტა ხნით გადაიყვანეს სამედიცინო დაწესებულებაში სისხლის ანალიზის ჩასატარებლად, რაც კალიფორნიაში ნასვამ მდგომარეობაში მართვის საქმეებში სტანდარტული პროცედურაა.
დაკავების შესახებ ინფორმაციის გავრცელების შემდეგ, როგორც ჩანს, მომღერალმა თავისი Instagram-ის ანგარიში წაშალა.
ბრიტნი სპირსი ერთ-ერთი ყველაზე წარმატებული პოპვარსკვლავია, ისეთი ჰიტებით, როგორიცაა Baby One More Time, Toxic, Everytime, Gimme More, Womanizer და Stronger.ნ2024 წლის იანვარში მან განაცხადა, რომ აღარ აპირებს მუსიკალურ ინდუსტრიაში დაბრუნებას. მისი ბოლო მუსიკალური ნამუშევარი იყო დუეტი Elton John-თან, რომელიც 2022 წელს გამოვიდა. თუმცა წელს ადრე გამოქვეყნებულ, მოგვიანებით წაშლილ პოსტში სპირსმა მიანიშნა, რომ მიუხედავად იმისა, რომ აშშ-ში აღარ გეგმავს გამოსვლებს, მომავალში შესაძლოა კონცერტები გამართოს დიდ ბრიტანეთსა და ავსტრალიაში. სპირსი 13 წლის განმავლობაში — 2021 წლამდე — სამართლებრივი მეურვეობის ფორმის ფარგლებში იმყოფებოდა, რომლის დროსაც მისი ფინანსები და პირადი ცხოვრება მამამისის კონტროლის ქვეშ იყო. 2023 წელს მომღერალმა გამოსცა მემუარები — The Woman in Me, სადაც ის საკუთარ კარიერასა და კონსერვატორობის პერიოდში განცდილ სირთულეებზე საუბრობს.
მედიის ინფორმაციით, ბრიტნი DUI-ის ბრალდებით დაკავებამდე რამდენიმე თვის განმავლობაში მარტო ცხოვრობდა, რადგან იგი დაშორდა თავის მეგობარ მამაკაც პოლ სოლიზს. წყვილის ურთიერთობა წლების განმავლობაში პერიოდულად იწყებოდა და წყდებოდა. ისინი ერთმანეთს პირველად 2023 წლის აგვისტოში შეხვდნენ წვეულებაზე.
