ყველასთვის კარგად ცნობილი და საყვარელი ბრენდი Bayerische Motoren Werke AG (BMW) – გერმანული კომპანიაა, რომელიც ავტომობილებს, მოტოციკლებსა და ძრავებს აწარმოებს. კომპანიის დაარსების ოფიციალურ დღედ 1917 წლის 21 ივლისი მიიჩნევა, თუმცა BMW-ს ისტორია რამდენიმე წლით ადრე დაიწყო. 1913 წელს მიუნხენში 2 პატარა ფირმა გამოჩნდა, რომლებსაც სათავეში კარლ რაპი და გუსტავ ოტო (ნიკოლაუს ოტოს შვილი, რომელმაც შიდა წვის ძრავა შექმნა) ედგნენ. პირველი მსოფლიო ომის დაწყების შემდეგ ორივე ფირმა იძულებული გახდა გაერთიანებულიყო, რათა თვითმფრინავის ძრავები შეექმნათ. 1916 წელს კომპანიას ახალი სახელი – „ბაიერიშე მოტორენ ვერკე“ ეწოდა. 1917 წელს BMW-ს ემბლემაც დამუშავდა, რომელიც მოტრიალე პროპელერის სიმბოლოს წარმოადგენს. იმავე წელს, კომპანიის მთავარმა ინჟინერმა მაქს ფრიცმა ექვსცილინდრიანი საავიაციო ძრავა – „ტურ 3ა“ შექმნა, შემდეგ კი „მოტორ 4“, რომლითაც 1919 წელს ფრანც დიმერმა მსოფლიო რეკორდი დაამყარა სიმაღლეზე ხტომაში. იგი ცაში 9 670 მეტრზე ავიდა.
მაქს ფრიცმა კიდევ ერთხელ გამოიჩინა გამჭრიახობა, როდესაც ვერსალის ხელშეკრულებით საავიაციო ძრავების გამოშვება აკრძალეს, BMW გაკოტრების საფრთხის წინაშე დადგა, მაგრამ მაქსმა დაიწყო მოტოციკლების წარმოება. მან გამოუშვა „R 32“, რომელიც 1923 წელს სერიულ წარმოებაში ჩაუშვეს და მალევე მოიპოვა პოპულარობა. 5 წლის შემდეგ კომპანიამ აიზენახში პატარა ავტომობილების მწარმოებელი Dixi-ს ქარხანა შეიძინა. ხელშეკრულებით ქარხანა უშვებდა ავტომობილებს „ოსტინ დიქსის“ მარკით. ახალი დიქსი დიდი მოთხოვნილებით სარგებლობდა, ამიტომ BMW დიდხანს არ ხსნიდა ამ მოდელს წარმოებიდან.
1932 წელს კომპანიამ საკუთარი ავტომობილი გამოუშვა. ეს გახლდათ მოდელი 3210, რომლის ძრავაც ორიგინალურად იყო შემუშავებული. მისი სიმძლავრე 20 ცხენის ძალა იყო, ხოლო სიჩქარე 80 კმ/სთ. პირველად BMW 303-ს ჩაუმონტაჟდა გამოზნექილი ლითონის ბადე რადიატორის წინ და ამ მოდელის სიჩქარე იყო 90 კმ/სთ. სპორტული ავტომობილების რამდენიმე მოდელის გამოშვების შემდეგ BMW-ს ხელმძღვანელობამ მაღალი კლასის ავტომობილების წარმოებაც გადაწყვიტა. კონსტრუქტორებმა დასახულ მიზანს მალე მიაღწიეს და გამოუშვეს BMW 326, რომელიც Mercedes Benz-საც კი უწევდა კონკურენციას. დიდი მოთხოვნილების გამო ეს მოდელი 16 000 ცალი აიწყო.
1936 წლისათვის კომპანიამ წარმოადგინა პირველი ღირებული სპორტული ავტომობილი – ორადგილიანი როდსტერი 328. ეს ავტომობილი სპეციალურად შეიქმნა იმ დროს მეტად პოპულარულ რბოლა Mille Miglia-ში (მილე მილია, ათასი მილის რბოლა) მონაწილეობისათვის. BMW 328-მ თავისი „მოვალეობა“ 1940 წელს შეასრულა, როცა ამ მოდელმა 1000-მილიანი მანძილი რეკორდულ დროში დაფარა (166, 7კმ/სთ).
ავტოწარმოების განვითარებასთან ერთად ვითარდებოდა მოტოციკლებიც. მეორე მსოფლიო ომში გერმანიის დამარცხების შემდეგ BMW-ს რამდენიმე ქარხანა დაზარალდა და გაკოტრების წინაშე დადგა, ამიტომ BMW კვლავ მოტოციკლების წარმოებაზე გადავიდა.
1951 წლიდან დაიწყო BMW-ს ახალი მოდელის წარმოება. BMW 501 თავისი კლასის მოდელებისაგან კომფორტულობით გამოირჩეოდა, თუმცა საკმაოდ მძიმე იყო და მის ძრავას ამხელა მასის ტარება უჭირდა. სამი წლის შემდეგ კონსტრუქტორებმა რვაცილინდრიანი ძრავა შექმნეს, რომელიც კარგად მოერგო 501-ს. ავტომობილი 160 კმ/სთ-ს ანვითარებდა.
1955 წლისათვის კომპანიამ საკმაოდ უცნაური მოდელი – ი ე ს ტ ა შექმნა. მას მხოლოდ ერთი კარი ჰქონდა, ძრავა კი 13-ცხენისძალიანი იყო და მხოლოს 80 კმ/სთ-ს ავითარებდა. მაგრამ სიიაფის გამო საზოგადოებაში დიდი ინტერესი გამოიწვია. მოგვიანებით BMW-მ ძვირადღირებული სპორტული მოდელები – 503 და 507 შექმნა. ავტომობილებს გარკვეული ხარვეზები აღმოაჩნდა.მეორე მსოფლიო ომის შემდეგ დაზარალებული ფირმა ნორმალურად არ იყო ფეხზე დამდგარი და ფინანსურ კრიზისს განიცდიდა. ამ ინფორმაციის გაჟონვის შემდეგ დაიმლერ ბენცმა BMW-ს აქციების ყიდვა მოინდომა, მაგრამ კომპანიამ სხვის დაუხმარებლად ფულის მოგროვება და ახალი მოდელის შექმნა განიზრახა. 1961 წელს შეიქმნა ახალი იაფფასიანი კომფორტული სედანი 1,4-ლიტრიანი ძრავით. ფასმა და კომფორტმა თავისი გაიტანა და კომპანიამ ერთბაშად 20 000 ცალის შეკვეთა მიიღო. ასე დაიწყო BMW-ს მორიგი აღმავლობა.
1966 წელს კომპანიამ ახალი BMW 2000 წარადგინა. უნდა ითქვას, რომ ამ მოდელმა საფუძველი ჩაუყარა მესამე სერიის BMW-ების გამოშვებას. მალე შეიქმნა მეხუთე სერიის BMW. 70-იანი წლების ბოლოს კი ზედიზედ იქმნება მეექვსე და მეშვიდე სერიის ავტომობილებიც.
BMW-3-ის სედანების მეოთხე თაობას, საქარხნო ინდექსით E30, აწარმოებდნენ 1982 წლის ნოემბრიდან 1991 წლის ბოლომდე (საუბარია BMW „ხულიგანკაზე“). ამ მოდელში და საერთოდ BMW-ში მაქსიმალური კომფორტი აქვთ მძღოლს და მის გვერდით მჯდომ მგზავრს. BMW-ს ხელსაწყოთა პანელის გაფორმება კი მრავალი წლის მანძილზე ბევრი მწარმოებელისთვის ეტალონად მიიჩნეოდა.
2006 წელი მნიშვნელოვანი პერიოდია BMW-სთვის იმ კუთხით, რომ ის ამ დროს „ფორმულა 1“-ში ჩაება.
2008 წლის მონაცემებით, მისი წლიური ბრუნვა 53 197 მილიარდ ევროს შეადგენდა. 2015 წლის მონაცემებით კი, კომპანიაში 122 244 ადამიანი იყო დასაქმებული. მისი შტაბბინა მდებარეობს მიუნხენში, აქვე მდებარეობს BMW-ს მუზეუმიც, რომელსაც გასაღების ფორმა აქვს.
BMW-ს ამ მრავალწლიანი გამოცდილების ფონზე, მისი ისტორია მართლაც უნიკალური და განსაკუთრებულია. BMW ბევრისთვის საოცნებო და საყვარელი ბრენდი გახდა. მეტიც – ბევრისთვის ის არა მხოლოდ ბრენდი, არამედ ფილოსოფიაა.
