ჟურნალი OK ერთ ერთი საუკეთესოა, ალბათ, თავისი შრომით, ხანგრძლივობით, გემოვნებით… ჩემთვის კი ბედნიერებაა იმის შესაძლებლობა, ასეთ ჟურნალთან კიდევ ერთხელ ვითანამშრომლო. ჩემი პირველი არტნამუშევრები თავისი კონცეფციით – კოგნიტურ-შემეცნებითი არტი, პირველად სწორედ ok-ში დაიბეჭდა რამდენიმე წლის წინ. ამიტომ ეს შემოთავაზება სიამოვნებით მივიღე და ვიქნები მოწვეული რედაქტორი. დანარჩენი ერთად ვნახოთ!
სიყვარული და ნაყოფიერება იქნება მთავარი მოტივატორი, რითიც მე მუშაობას დავიწყებ, შევალ ემოციის ეშხში და დავასრულებ კიდეც. მივიღებ ამ ახალ საინტერესო გამოწვევას და კარგ გამოცდილებას დავიტოვებ, ხოლო ჩემს ხედვებს, ცხოვრების არსს, ფილოსოფიას, სრულად გავხსნი და გავავრცელებ.
სიყვარულის, ნაყოფიერებისა და ბედნიერების ფონდი – პროექტი, ჩემი დარჩენილი სიცოცხლის მთავარი მამოძრავებელი ძალა, მთავარი მიზანი, არსი არსებობისა გახლავთ და სწორედ ეს იქნება ჩემი ლაიტმოტივი ამ ყველაფრისაც. თემები კი, რომლებიც თქვენთვის შევარჩიე – არის მთავარი ხერხემალი ჩემი ყოველდღიურობისა. ჩემი პროფესიაა – უნაყოფობის მკურნალობა ბუნებრივი, ლაპარასკოპიული, ენდოკრინული, ტექნოლოგიური-ინვიტრო განაყოფიერების თუ ქირურგიული გზით. ასევე ორსულთა ცხოვრების ხარისხის გაუმჯობესება. დაწყებული თემით – სექსი და ორსულობა, რომელიც სრულიად უსაფრთხოა და ამის შესახებ თქვენ ამ ნომერში წაიკითხავთ. ასევე მუცლად ყოფნის პერიოდში ბავშვების მენტალურ- ფსიქოლოგიურ ჯანმრთელობაზე ზრუნვა და მშობლების აღზრდა. დიახ, არ მოგესმათ – აღზრდა. იმისთვის, რომ მათ უკეთესი და ხარისხიანი ცხოვრებისთვის გაზარდონ თავიანთი პირმშო, რომელსაც ბევრი წელი ელოდნენ…
მშობლად გახდომის მიზანი ერთ-ერთი საუკეთესოა ადამიანთა მიზნებს შორის… ბედნიერებაა იყო მშობელი… იპოვე შენი ბედნიერება!
