Apple-მა პირველი დასაკეცი სმარტფონი – iPhone Duo წარადგინა. ახალი მოწყობილობა კომპანიის ყველაზე ძვირადღირებული მოდელია და მისი ფასი 1,999 დოლარიდან იწყება.
აღსანიშნავია, რომ Apple-ის სმარტფონების ისტორიაში ეს ერთ-ერთი ყველაზე მნიშვნელოვანი დიზაინერული ცვლილებაა. დაკეცილ მდგომარეობაში iPhone Duo საკმაოდ კომპაქტურია, გაშლის შემდეგ კი 7.6-დიუმიან ეკრანად გარდაიქმნება. გარე ეკრანის ზომა 5.4 დიუმია.
ახალი iPhone A20 Pro ჩიპზე მუშაობს, რომელიც 2-ნანომეტრიანი ტექნოლოგიითაა დამზადებული. მოწყობილობა ასევე აღჭურვილია გაუმჯობესებული გაგრილების სისტემით, 48-მეგაპიქსელიანი კამერებითა და 2 ტერაბაიტამდე მეხსიერებით. Duo მომხმარებელს დიდ ეკრანზე ორი აპლიკაციის ერთდროულად გამოყენების შესაძლებლობასაც აძლევს.
Apple-მა ახალ მოდელში Face ID-ის ნაცვლად Touch ID გამოიყენა. თითის ანაბეჭდის სენსორი გვერდით ღილაკშია ჩაშენებული. კომპანიის განცხადებით, გაშლილ მდგომარეობაში Duo ყველაზე თხელი iPhone-ია.
ახალი სმარტფონი გაყიდვაში 23 ოქტომბერს ჩაეშვება, წინასწარი შეკვეთები კი 16 ოქტომბერს დაიწყება.
Apple-ის ახალი აღმასრულებელი დირექტორის, ჯონ ტერნუსის განცხადებით, სხვა კომპანიების დასაკეცი სმარტფონები ზოგჯერ „უბრალოდ უხერხულად დაკავშირებულ ორ ტელეფონს ჰგავს“. მისი თქმით, Apple-ის ახალი მოდელი დასაკეცი სმარტფონის გამოყენების გამოცდილებას შეცვლის.
კომპანიამ ასევე iPhone 18 Pro და iPhone 18 Pro Max წარადგინა. ორივე მოდელი A20 Pro ჩიპზე მუშაობს და განახლებული კამერის სისტემითაა აღჭურვილი.
ღონისძიებაზე Apple Watch-ის ახალი თაობაც ვიხილეთ. Apple Watch Series 12 და Apple Watch Ultra 4 ჯანმრთელობის მონიტორინგის გაუმჯობესებული ფუნქციებითა და ახალი S11 ჩიპით არის აღჭურვილი. Series 12-ის ფასი 399 დოლარიდან იწყება, Ultra 4-ის – 799 დოლარიდან.
ახალი მოწყობილობების გარდა, Apple-მა ღონისძიებაზე განსაკუთრებული ყურადღება ხელოვნურ ინტელექტსაც დაუთმო. კომპანიამ Siri-ის განახლებული ვერსია წარადგინა, რომელიც მომხმარებლის მოთხოვნების უკეთ გააზრებასა და სხვადასხვა აპლიკაციაში კონკრეტული დავალებების შესრულებას შეძლებს.
Apple-ის განცხადებით, AI-ის ფუნქციების მნიშვნელოვანი ნაწილი უშუალოდ მოწყობილობაზე იმუშავებს, რაც მომხმარებლის პირადი ინფორმაციის დაცვას ემსახურება.
ასევე დაგაინტერესებთ:
#OK! როცა iPhone აღარ კმარა: რატომ გახდა ძველი ფოტოაპარატი ისევ ტრენდული?
#OK! NASA-მ ასტრონავტებს კოსმოსში iPhone-ის წაღების უფლება მისცა
