ჟურნალი OK! გაგაცნობთ ქართული ღვინის წარმოებაზე ორიენტირებულ ახალ ბრენდს „ამერი“, რომელიც ბაზარზე სულ რაღაც 3 თვის წინ გამოჩნდა, თუმცა მისი შექმნის იდეა ბევრად ადრე დაიბადა. მოგეხსენებათ, ჩვენს ქვეყანაში ღვინო კულტურასა და ტრადიციებთან მჭიდროდ არის დაკავშირებული, რაც შთაგონების მთავარი წყარო გახდა. დაფუძნების მთავარი მიზანი ტრადიციული მეთოდების გამოყენებით ისეთი პროდუქტის შექმნა იყო, რომელიც გააგრძელებდა ქართული ღვინის განსაკუთრებულ ისტორიას. ამ და სხვა საინტერესო საკითხებთან დაკავშირებით OK! „ამერის“ დამფუძნებელს, თამარ ბექაურს პირადად ესაუბრა.
გაგვაცანით კომპანია „ამერი“.
„ამერი“ არის ქართული ღვინის წარმოებაზე ორიენტირებული ახალი ბრენდი, რომლის სახელწოდებაც სიმბოლურია და უკავშირდება ღვინის წარმოების ადგილს – სოფელ არხილოსკალოს, რომელიც მდებარეობს უკიდურეს აღმოსავლეთ საქართველოში. „ამერი“ სწორედ უკიდურეს აღმოსავლეთს ნიშნავს, ამიტომ ეს სიმბოლური სახელწოდება ასახავს ღვინის წარმოშობის იდენტობას.
„ამერი“ გამოხატავს ტრადიციებისა და სიახლეების შერწყმას. ჩემთვის მნიშვნელოვანია, რომ ღვინოში იგრძნობოდეს არა მხოლოდ გემო, არამედ ემოცია, რომელიც ქართულ სუფრასთან, ოჯახსა და მეგობრებთან ასოცირდება.
რას სთავაზობს კომპანია საზოგადოებას?
„ამერი“ მომხმარებელს სთავაზობს მაღალი ხარისხის ღვინოს, რომელიც მზადდება ტრადიციული ქართული მეთოდებით და თანამედროვე სტანდარტების შერწყმით. მთავარი ღირებულება ხარისხია, ამიტომ თითოეული ბოთლი დიდი სიფრთხილითა და სიყვარულით მზადდება.
გარდა თავად ღვინისა, ვთავაზობთ გამოცდილებას – იმ ემოციას და სიამოვნებას, რასაც ღვინის დაგემოვნება იწვევს. ასევე, დიდი ყურადღება ექცევა შეფუთვას, რაც ჩვენს პროდუქტს იდეალური საჩუქრის სახეს აძლევს.
რა იყო „ამერის“ დაფუძნების მთავარი მიზანი?
„ამერის“ დაფუძნების მთავარი მიზანი იყო საკუთარი, მაღალი ხარისხის ქართული ღვინის წარმოება და მისი ბრენდად ჩამოყალიბება. ამ დიდ სფეროში ჩემი მოღვაწეობა ჯერ კიდევ ბავშვობიდან დაიწყო, რადგან ჩვენს ოჯახში ღვინო ყოველწლიურად იწარმოებოდა, თუმცა არა როგორც ბრენდი. შემდეგ იყო სწავლა და პრაქტიკული გამოცდილება სხვადასხვა ღვინის საწარმოში. ამ ყველაფრის პარალელურად ვმონაწილეობდი საგრანტო პროგრამაში, რომელშიც გავიმარჯვე, რის შედეგადაც შევიძინე სრულყოფილი ინვენტარი მეღვინეობისთვის. სწორედ ამ ეტაპზე გადავწყვიტე „ამერის“ ბრენდად ჩამოყალიბება და ღვინის წარმოება, რომელიც არა მხოლოდ შესაბამისი ხარისხით გამოირჩეოდა, არამედ ასახავდა ჩემს პირად ხედვას და მიღებულ ცოდნას მეღვინეობაში.
იმისათვის, რომ ეს მიზანი განმეხორციელებინა, გავაერთიანე ქართული ღვინის ტრადიციები და თანამედროვე ტექნოლოგიები, რამაც ბრენდი უნიკალურად აქცია.
მომხმარებელს კი შევთავაზეთ ღვინო, რომელიც ღირსეულად წარმოაჩენს როგორც ადგილობრივ, ისე საერთაშორისო ბაზარზე ქართული ღვინის კულტურას.
მოგვიყევით იმ არომატებზე, რომლებსაც „ამერი“ საზოგადოებას სთავაზობს.
„ამერი“ აწარმოებს 4 სახის ღვინოს: „საფერავი“, „საფერავი როზე“, „წინანდალი“ და „რქაწითელი“. თითოეული მათგანი გამოირჩევა თავისი განსაკუთრებული არომატებითა და გემოთი.
თითოეული მათგანი შესანიშნავად ერწყმის როგორც ქართულ ტრადიციულ, ისე საერთაშორისო სამზარეულოს, რადგან მათი მრავალფეროვნება და უნიკალური გემოები ქმნიან იდეალურ კომბინაციებს სხვადასხვა ტიპის კერძებთან.
ჩვენი მიზანია შევქმნათ ღვინოები, რომლებიც შეძლებენ სიამოვნება მიანიჭონ არა მხოლოდ ღვინის მოყვარულებს, არამედ მათ, ვინც გემოების ახალ და განსხვავებულ გამოცდილებას ეძებს.
სასაჩუქრე ყუთებზეც მოგვიყევით. რა დაგვხვდება მასში?
„ამერი“ ღვინის გარდა მომხმარებელს სთავაზობს ექსკლუზიურ სასაჩუქრე ყუთებს, რომლებიც იდეალურ საჩუქარს წარმოადგენს სხვადასხვა სიტუაციაში, როგორიცაა დაბადების დღე, ახალი წელი, სხვადასხვა დღესასწაული და სხვა მნიშვნელოვანი თარიღები.
ჩვენი სასაჩუქრე ყუთები მორგებულია მომხმარებლის სურვილზე, რადგან შესაძლებელია შერჩეული იყოს ერთი ან ორი ბოთლი ღვინო. ამასთან ერთად, სასაჩუქრე ყუთებში დაგხვდებათ ქართული ტრადიციული საკვები – ჩურჩხელა, რომელიც არომატული და გამორჩეული ტკბილეულია, თაფლი, თხილეულის და ჩირეულის მიქსი.
„ამერის“ ყუთი წარმოადგენს დახვეწილ საჩუქარს, რომელიც არა მხოლოდ ღვინის მოყვარულთათვისაა, არამედ მათთვის, ვინც ქართული ტრადიციებისა და ნატურალური პროდუქტების ღირსებას აფასებს.
ყველა ეს პროდუქტი ნატურალური ინგრედიენტებით არის დამზადებული, რაც იძლევა არა მხოლოდ ვიზუალურ სილამაზეს, არამედ განსაკუთრებულ გემოსა და შთაბეჭდილებას.
სამომავლო გეგმები გაგვიზიარეთ.
„ამერის“ სამომავლო გეგმები ემყარება ბრენდის გაფართოებას და ქართული ღვინის კულტურის პოპულარიზაციას როგორც ადგილობრივ, ისე საერთაშორისო ბაზრებზე.
ჩვენი მიზანია, შეიქმნას ახალი ღვინოების და კერძო კოლექციების ხაზები, რათა მომხმარებელს შევთავაზოთ კიდევ უფრო მრავალფეროვანი და მაღალი ხარისხის პროდუქცია. გარდა ამისა, აქტიურად ვმუშაობთ ბრენდის ცნობადობის გაზრდაზე, რადგან გვინდა ჩვენი ღვინოები გამოჩნდეს როგორც ადგილობრივ მაღაზიებში, ისე რესტორნებსა და ბარებში.
სამომავლოდ, ვგეგმავთ მონაწილეობას ადგილობრივ და საერთაშორისო ღვინის გამოფენებსა და ფესტივალებში, რათა კიდევ უფრო გავზარდოთ ჩვენი ღვინის ცნობადობა. გარდა ამისა, ძალიან დიდი სურვილი მაქვს ღვინის ტურიზმის განვითარების, სადაც სტუმრებს შესაძლებლობა ექნებათ, ადგილზე ნახონ ჩვენი საწარმო, გაეცნონ ღვინის წარმოების პროცესს და, რა თქმა უნდა, დააგემოვნონ ჩვენი პროდუქცია.
ციაკო ღამბაშიძე
