კულინარიით დაინტერესებული ადამიანებისთვის რამდენიმე ძალიან საინტერესო წიგნს გთავაზობთ, რომლებიც უგემრიელესი კერძებისა და დესერტების მომზადებასთან ერთად, თქვენს დროს კიდევ უფრო საინტერესოს გახდის.
Flavor Bible − კარენ ფეიჯი და ენდრიუ დორნენბურგი
ეს წიგნი შეიძლება აჩუქოთ ადამიანებს, რომლებიც ათასნაირი რეცეპტის კრებულებით გადაიღალნენ და კულინარიულ ხელოვნებაშიც ასე თუ ისე კარგად ერკვევიან. Flavor Bible ცნობარია, რომელიც კულინარიულ ფანტაზიას აღვივებს – პროდუქტების კარგი შეხამებების სიას წარმოადგენს.
ყოველ პროდუქტთან ერთად, მოყვანილია ინგრედიენტთა სია, რომლებსაც ის მეტ-ნაკლებად შეეხამება. მაგალითად, გოგრას უხდება 78 პროდუქტი – კლასიკური პარმეზანით, მუსკატის კაკლითა და ქიშმიშით დაწყებული, ექსტრავაგანტური ვაშლის ბრენდით, ლობსტერითა თუ ხამანწკებით დამთავრებული. ამ სიების შედგენაში ავტორებს ამერიკელი მზარეულები ეხმარებოდნენ, რომლებმაც თითოეული სტატია თავიანთი კომენტარებითა და რეკომენდაციებით შეავსეს.
„სრული სამზარეულო“ − ბარბარე ჯორჯაძე
ეს ერთგვარი ბიბლიოგრაფიული იშვიათობა უკვე თქვენს ხელშია. მიანიჭეთ მას მისია, რომელსაც ოჯახურ რელიქვიებად ქცეული რეცეპტების წიგნები ასრულებენ ხოლმე. გააცოცხლეთ ბარბარეს კერძები, მისი ზედსართავები და ზმნები, მისი ბარბარიზმები და დღეს ცოტა ღიმილისმომგვრელი ქართული შესატყვისები, მისი რჩევები თუ იდეები და ნახავთ, რომ ძალაუნებურად გააცოცხლებთ მეცხრამეტე საუკუნის თბილისს, მთელი თავისი ყოფითი კულტურით.
„შიმშილობის სასწაული“ − პოლ ბრეგი
პოლ ბრეგის „შიმშილობის სასწაულმა“ საბჭოთა კავშირში გასული საუკუნის 70-იან წლებში შემოაღწია თვითნაბეჭდი სახით. ბრეგის მეთოდოლოგია და მისი კვების პრინციპები მოსმენისთანავე ნუსხავს ადამიანებს.
