2027 წელს Opera Australia-ს სცენაზე ნინო სურგულაძის დებიუტი შედგება. ქართველი მეცო-სოპრანო რიხარდ ვაგნერის „ტანჰოიზერში“ ვენერას პარტიას შეასრულებს – ამის შესახებ ინფორმაციას მომღერალი თავის სოციალურ ქსელში ავრცელებს:
“ძალიან ბედნიერი ვარ, რომ 2027 წელს შედგება ჩემი ავსტრალიური დებიუტი Opera Australia-ს სცენაზე — და, ამავე დროს, ჩემი დებიუტი ვენერას პარტიაში, ვაგნერის „ტანჰოიზერში“.
განსაკუთრებული პატივია, რომ ამ მნიშვნელოვან დებიუტში და ამ დადგმის მსოფლიო პრემიერაში ვითანამშრომლებ თანამედროვეობის ერთ-ერთ ყველაზე აღიარებულ საოპერო რეჟისორ სერ დევიდ მაკვიკართან და ბრწყინვალე იტალიელ მაესტროსთან, საერთაშორისო საოპერო სცენების გამორჩეულ დირიჟორ ანდრეა ბატისტონისთან.
Looking forward to this new chapter! – წერს ნინო სურგულაძე სოციალურ ქსელში.
ცნობისთვის, Opera Australia ავსტრალიის ეროვნული საოპერო კომპანია და ქვეყნის ერთ-ერთი უმნიშვნელოვანესი კულტურული ინსტიტუტია. იგი 1956 წელს დაარსდა და ყოველწლიურად ასობით ათას მაყურებელს მასპინძლობს.
სიდნეის ოპერის თეატრისა და მელბურნის Arts Centre-ის გარდა, კომპანია წარმოდგენებს ავსტრალიის სხვა ქალაქებსა და რეგიონებშიც მართავს. ასევე თანამშრომლობს მსოფლიოს წამყვან საოპერო თეატრებსა და საერთაშორისო არტისტებთან.
