Netflix-მა მეთიუ პერის შესახებ დოკუმენტური სერიალი დააანონსა. პროექტი, სახელწოდებით „The One About Matthew Perry“, მაყურებელს „Friends“-ის ვარსკვლავის ცხოვრებასა და კარიერას უფრო პირადი და ნაკლებად ცნობილი კუთხით გააცნობს. სამი ეპიზოდისგან შემდგარი დოკუსერიალის პრემიერა 2026 წლის 27 ოქტომბერს, მსახიობის გარდაცვალებიდან თითქმის სამი წლის შემდეგ შედგება.
Netflix-ის ინფორმაციით, ეს მეთიუ პერის შესახებ შექმნილი პირველი მასშტაბური, სიღრმისეული დოკუმენტური პროექტი იქნება. სერიალი მსახიობის გზას აღწერს – კარიერის დასაწყისიდან და კ „Friends“-ის მსოფლიო პოპულარობამდე. ამასთან, პროექტი პერის პირად ცხოვრებასა და დამოკიდებულებასთან მრავალწლიან ბრძოლასაც შეეხება – თემას, რომელზეც თავად მსახიობი სიცოცხლის ბოლო წლებში განსაკუთრებით ღიად საუბრობდა.
სერიალის ერთ-ერთი მთავარი ნაწილი პერის ოჯახის პირადი არქივია. მაყურებელი ნახავს აქამდე გამოუქვეყნებელ ფოტოებსა და ვიდეომასალას, ასევე მოისმენს ადამიანების მოგონებებს, რომლებიც მსახიობს წლების განმავლობაში ყველაზე ახლოს იცნობდნენ. პროექტში მონაწილეობს პერის უმცროსი და, მია პერი ბოუიკი.
„The One About Matthew Perry“-ს რეჟისორი ემის ჯილდოს მფლობელი მერი რობერტსონია.
მეთიუ პერის მსოფლიო პოპულარობა სწორედ ჩენდლერ ბინგის როლმა მოუტანა. მსახიობი “Friends”-ის ათივე სეზონში, ჯამში 236 ეპიზოდში მონაწილეობდა. თუმცა წარმატების პარალელურად წლების განმავლობაში ალკოჰოლსა და ნარკოტიკულ საშუალებებზე დამოკიდებულებას ებრძოდა და მოგვიანებით ამ გამოცდილებაზე საჯაროდ საუბრობდა.
პერი 2023 წლის 28 ოქტომბერს, 54 წლის ასაკში გარდაიცვალა. იგი ლოს-ანჯელესში, საკუთარ სახლში, უგონო მდგომარეობაში იპოვეს. გარდაცვალების ოფიციალურ მიზეზად კეტამინის მწვავე ზემოქმედება დასახელდა.
ასევე დაგაინტერესებთ:
#OK! მეთიუ პერის გარდაცვალების საქმეზე ბრალდებულ ექიმს პატიმრობა მიუსაჯეს
