2003 წლის ერთ-ერთი ყველაზე ცნობილი რომანტიკული კომედია „How to Lose a Guy in 10 Days” შესაძლოა დიდ ეკრანზე დაბრუნდეს. Paramount Pictures ფილმის გაგრძელებაზე მუშაობას იწყებს – პროექტი ამ ეტაპზე განვითარების საწყის ეტაპზეა.
ფილმის პირველი ნაწილი მაყურებელმა 23 წლის წინ, 2003 წელს იხილა. მასში მთავარ როლებს კეიტ ჰადსონი და მეთიუ მაკკონაჰი ასრულებდნენ – ჰადსონი ჟურნალისტ ანდი ანდერსონს, მაკკონაჰი კი სარეკლამო სფეროში მომუშავე ბენჯამინ ბარის განასახიერებდა. მათი ურთიერთობა ერთმანეთისთვის სრულიად განსხვავებული მიზნებით დაწყებულ თამაშს მოჰყვება და საბოლოოდ სიყვარულის ისტორიად იქცევა. ფილმმა მსოფლიო მასშტაბით დაახლოებით 177 მილიონი დოლარი გამოიმუშავა და წლების შემდეგაც რომანტიკული კომედიების ერთ-ერთ ფავორიტად რჩება.
რაც შეეხება მეორე ნაწილს, ცნობილია, რომ ფილმის პროდიუსერი კეიტ ჰადსონი იქნება. ამასთან, შემქმნელებს სურთ, რომ მსახიობი ანდის როლშიც დაბრუნდეს და ეკრანზე კვლავ მეთიუ მაკკონაჰისთან ერთად ვიხილოთ. თუმცა მათი მონაწილეობა ამ ეტაპზე ოფიციალურად დადასტურებული არ არის.
ჰადსონს არაერთხელ უთქვამს, რომ მსგავსი პროექტის მიმართ ღიაა, თუ შესაბამისი სცენარი იარსებებს. მაკკონაჰისაც არ დაუმალავს, რომ ფილმი მისთვის განსაკუთრებულია.
თუმცა, ჯერჯერობით უცნობია, როდის დაიწყება გადაღებები, ვინ დაწერს სცენარს და როდის გამოვა ფილმი ეკრანებზე. შესაბამისად, გაგრძელების სიუჟეტიც საიდუმლოდ რჩება.
ასევე დაგაინტერესებთ:
#OK! 90-იანებისა და 2000-იანების რომანტიკული კომედიები, რომლებიც ერთხელ მაინც უნდა ნახოთ
