თუ ბოლო პერიოდში ვარსკვლავების მაკიაჟს აკვირდებით, ერთ დეტალს აუცილებლად შეამჩნევდით – წამწამები თითქმის შეუმჩნეველია. სქელი ტუში და ხელოვნური წამწამები ამჯერად მეორე პლანზე გადადის. მათ ადგილს ახალი ტრენდი, „Ghost Lashes“ იკავებს, რომლის მთავარი იდეა ბუნებრივი, მსუბუქი და თითქოს შეუმჩნეველი წამწამებია.
ტრენდს უკვე არაერთი ცნობილი სახე შეუერთდა. მათ შორის არიან ზენდაია, დუა ლიპა, ჰეილი ბიბერი, კაილი ჯენერი, ჯიჯი ჰადიდი და პამელა ანდერსონი. ზენდაიამ „Ghost Lashes“ 2026 წლის ივლისში, „The Odyssey“-ს ნიუ-იორკის პრემიერაზე მოირგო.
რა არის „Ghost Lashes“?
სახელწოდება შესაძლოა ცოტა უცნაურად ჟღერდეს, თუმცა იდეა საკმაოდ მარტივია – წამწამებზე ტუში თითქმის საერთოდ არ უნდა ჩანდეს. ზოგ შემთხვევაში მაკიაჟში ტუში საერთოდ არ გამოიყენება, ზოგჯერ კი მხოლოდ ერთი ძალიან მსუბუქი ფენაა საკმარისი.
შედეგი ბუნებრივი და სუფთა თვალის მაკიაჟია, რომელიც სახეს სიმსუბუქეს მატებს. განსხვავებით ბოლო წლების მკვეთრი და მოცულობითი წამწამებისგან, „Ghost Lashes“ ყურადღებას არა წამწამების სიგრძესა და სისქეზე, არამედ თვალის ბუნებრივ ფორმაზე ამახვილებს.
პროფესიონალი ვიზაჟისტების შეფასებით, შეუმჩნეველი წამწამები მაკიაჟს უფრო რბილ და „სუფთა“ იერს აძლევს. ამასთან, ასეთი ლუქი შეიძლება განსაკუთრებით ეფექტური იყოს მაშინ, როდესაც სახის სხვა ნაწილზე მკვეთრი აქცენტი გვაქვს.
როგორ გავიკეთოთ „Ghost Lashes“?
ამ ტრენდის მოსარგებად პროფესიონალური მაკიაჟის გაკეთება აუცილებელი არ არის. პირველი ნაბიჯი წამწამების კარგად აპრეხაა. შემდეგ შესაძლებელია მხოლოდ ერთი თხელი ფენა ტუშის გამოყენება, რომელიც წამწამებს ოდნავ გამოკვეთს, მაგრამ მძიმე და მოცულობით იერს არ მისცემს.
თუ უფრო ბუნებრივი შედეგი გსურთ, შავი ტუშის ნაცვლად ყავისფერი ფერი შეგიძლიათ გამოიყენოთ. კიდევ ერთი ვარიანტია გამჭვირვალე წამწამების ან წარბების გელი, რომელიც წამწამებს ფორმას მისცემს, ერთმანეთისგან გამოყოფს და ფერს არ დაამატებს.
ასევე დაგაინტერესებთ:
#OK! რა არის French Girl Beauty? – ფრანგული სილამაზის ფილოსოფია
