პრინცესა დიანას საკულტო „Revenge dress“ დეკემბერში Sotheby’s-ის აუქციონზე გაიყიდება – მისი ფასი 150 000-დან 300 000 დოლარამდეა.
კაბის დიზაინი კრისტინა სტამბოლიანს ეკუთვნის. პრინცესამ ის 1994 წლის 29 ივნისს, ლონდონში, Serpentine Gallery-ში გამართულ საქველმოქმედო ვახშამზე მოირგო.
იმ საღამოს დიანას ჩაცმულობამ განსაკუთრებული ყურადღება მიიქცია. ღონისძიებამდე რამდენიმე დღით ადრე მედიაში გავრცელდა ინფორმაცია პრინცი ჩარლზისა და კამილა პარკერ ბოულზის ურთიერთობის შესახებ. იმავე დღეს, ჩარლზმა ტელევიზიით საჯაროდ აღიარა, რომ ქორწინების პერიოდში ცოლს ღალატობდა.
დიანას არჩევანი – ელეგანტური და თამამი შავი კაბა – იმ პერიოდის ერთ-ერთ ყველაზე ცნობილ მოდურ მოვლენად იქცა, ხოლო სამოსს მოგვიანებით „შურისძიების კაბა“ შეარქვეს.
იგი ბოლოს 1997 წლის ივნისში, დიანას გარდაცვალებამდე რამდენიმე კვირით ადრე, საქველმოქმედო აუქციონზე გაიყიდა. იმავე აუქციონზე პრინცესამ საკუთარი გარდერობიდან 79 კაბა გაიტანა, მიღებული თანხა კი კიბოსა და შიდსთან მებრძოლ საქველმოქმედო ორგანიზაციებს გადაეცა.
Sotheby’s-ის ინფორმაციით, კაბის სავარაუდო ფასი 150 000-დან 300 000 დოლარამდე მერყეობს, თუმცა მისი საბოლოო ღირებულება აუქციონზე განისაზღვრება.
ასევე დაგაინტერესებთ:
#OK! პრინცესა დიანა – ქალი, რომელმაც სამეფო ოჯახის ისტორია შეცვალა
#OK! ლეგენდარული პრინცესა დიანას საკულტო ფოტოები – ივლისში ის 64 წლის გახდებოდა
