შარტავას ქუჩაზე მომხდარი შემთხვევის შედეგად დაშავებული დათი ქოქრაშვილი საქართველოში რამდენიმე დღის წინ დაბრუნდა. დღეს კი პირველი ინტერვიუ მამასთან ერთად ტელეკომპანია „იმედის“ ეთერში ჰქონდა.
როგორც დათის მამა, ირაკლი ქოქრაშვილი ამბობს, რომ სარეაბილიტაციო პროცედურებისგან ცოტახანი ისვენებენ:
„11 თვის განმავლობაში უამრავი ადამიანის მხარდაჭერას ვგრძნობდით და მეამაყება, რომ ქართველი ვარ. თითქოს ჩემზე მეტად სხვები უფრო ნერვიულობდნენ და განიცდიდნენ. საქართველოში დაბრუნებისას, თბილისს რომ გადმოვხედეთ, ცრემლებიც კი მოგვერია.“
მან ასევე პროცედურების შესახებაც ისაუბრა:
„პროთეზი შეიქმნა და დაიტესტა, მოძრაობს, მაგრამ ძალიან რთულია შეგუება. ვარჯიშის დროს ძალიან ბევრი პრობლემა იყო. ახლაც უნდა ვივარჯიშოთ. თუნდაც მსოფლიოს მეორე ბოლოში მქონდეს წასაყვანი, აუცილებლად წავიყვან. დათიმ თავისი გააკეთა. შეუძლებელი შეძლო. ყველა გაკვირვებული იყო. ძირითადად, 20 ოპერაცია გაკეთდა, მაგრამ 150 დღის განმავლობაში დღეში ორჯერ ჩვეულებრივი ოპერაცია მიმდინარეობდა. მართლა ბრძოლის ველს ჰგავდა რეანიმაციის პალატა. ისრაელში კლინიკაში ყოფნისას, როდესაც ინფექცია აღარ პროგრესირებდა, მაშინ მივხვდით, რომ გავიმარჯვეთ. ოღონდ ამ ყველაფერს ძალიან დიდი რისკი და ბევრი ტკივილი უძღოდა წინ. ყველა პროცედურის წინ უბრალოდ ვრისკავდით, რადგან მეტი გამოსავალი არ გვქონდა. იმედი არც ერთს არ დაგვიკარგავს. სამ თვეში ერთხელ უნდა შეიცვალოს პროთეზის მოცულობა. ტესტრეჟიმში მუშაობს ყველაფერი. ყველამ უარი გვითხრა პროთეზზე. მხოლოდ გერმანიაში გამოჩნდა ერთი ადამიანი, რომელმაც გვითხრა, რომ გააკეთებდა, მაგრამ ზუსტ პასუხს ვერ გეტყვითო. რამდენიმე თვის მერე დათიმ რომ გაიარა, მიხვდა, რომ შეუძლებელი არაფერია. უბრალოდ პროთეზი წლების განმავლობაში უნდა დაიხვეწოს“.
„მომავალში რა იქნება, არ ვიცი, ეს დედამ და მამამ უნდა გადაწყვიტონ. მე მინდა, რომ ამერიკაში წავიდე საცხოვრებლად“.
იხილეთ სრული გადაცემა:
