თამუნა მუსერიძე, ცნობილი ტელე-რადიო წამყვანი უკვე წლებია მშობლებს ეძებს. რამდენიმე წლის წინ მან შეიტყო, რომ აღმზრდელი მშობლები მისი ბიოლოგიური დედ-მამა არ არიან, მას შემდეგ მან ცხოვრების დიდი ნაწილი მათ მოძებნას და მსგავსი პრობლემის მქონე ადამიანების დახმარებას დაუთმო.
თამუნამ ჩამოაყალიბა არასამთავრებო ორგანიზაცია “გეძებ” და პოპულარული Facebook გვერდი, “ვეძებ”, ახლა კი ტელეკომპანია “ფორმულაზე’ ის საავტორო გადაცემას წაიყვანს სახელწოდებით “ვეძებ”. აღნიშნული გადაცემა საზოგადოებას დაკარგული მშობლების, შვილების და ოჯახის წევრების მოძებნაში დაეხმარება.
როგორც თამუნა OK!-სთან ინტერვიუში აცხადებს, გადაცემა მნიშვნელოვან თემებს გააშუქებს და მიაწვდის მაყურებელს ისეთ ინფორმაციას, რომელზეც ხშირად არ საუბრობენ და არ იციან, რომ საქართველოში ხდება. გადაცემა დაეხმარება დაკარგული ოჯახის წევრებს ერთმანეთის პოვნაში და როგორც ტელეწამყვანი გვიანონსებს, იქნება ძალიან ემოციური
“ჩემთვის ეს პროექტი არის ჩემი სისხლი და ხორცი, რადგან როგორც გადაცემაში, ასევე Facebook გვერდში, მეც და ჯგუფის წევრებსაც გვაქვს ჩადებული მთელი სული. გმირებთან ერთად მე გავდივარ ყველაფერს, ამიტომ ეს ჩემთვის მხოლოდ გადაცემა არ არის” – აცხადებს თამუნა და კადრს მიღმა გადაღებულ ფოტოს გვიზიარებს.
