„მსოფლიო საფოსტო კავშირის“ (Universal Postal Union) წერილის წერის საერთაშორისო კონკურსი „საქართველოს ფოსტის“ ორგანიზებით, საქართველოს ეკონომიკისა და მდგრადი განვითარების სამინისტროსა და საქართველოს განათლებისა და მეცნიერების სამინისტროს მხარდაჭერით, მიმდინარე წელს მერვედ გაიმართა.
საქართველოს ეროვნულ მუზეუმში გამართულ ღონისძიებაზე, ჟიურის მიერ გამოვლინდა როგორც საუკეთესო სამეული, ისე ეკონომიკისა და მდგრადი განვითარების სამინისტროსა და განათლებისა და მეცნიერების სამინისტროს რჩეული წერილების ავტორები:
- პირველი ადგილი − ანი ჭანკვეტაძე, იმერეთი, წმინდა მღვდელმოწამე სიმონ მჭედლიძის სახელობის ხარაგაულის მუნიციპალიტეტის სოფელ ლაშის საჯარო სკოლის მოსწავლე, 11 წლის.
- მეორე ადგილი − დავით ლომიძე, ქ. თბილისი, მწვანე სკოლის მოსწავლე, 10 წლის.
- მესამე ადგილი − იოანე ჩხიკვაძე, ქ. ქუთაისი, N13 საჯარო სკოლის მე-6 კლასის მოსწავლე, 11 წლის.
- საქართველოს ეკონომიკისა და მდგრადი განვითარების სამინისტროს რჩეული − მარიამ კილაძე, ქ. გორი, მე-4 საჯარო სკოლის მე-5 კლასის მოსწავლე, 10 წლის.
- საქართველოს განათლებისა და მეცნიერების სამინისტროს რჩეული − ქეთევან წერეთელი, ქ. ჭიათურა, მე-2 საჯარო სკოლის მე-7 კლასის მოსწავლე, 13 წლის.
აღსანიშნავია, რომ პირველი ადგილის მფლობელის ნამუშევარი გაიგზავნა „მსოფლიო საფოსტო კავშირში“ და ჩაერთო საერთაშორისო საკონკურსო პროგრამაში. შედეგად, „მსოფლიო საფოსტო კავშირის“ საერთაშორისო კონკურსში გამარჯვებული ავტორის/ქვეყნის დაჯილდოების ცერემონია გაიმართება 2021 წლის 9 ოქტომბერს, ფოსტის საერთაშორისო დღეს, „მსოფლიო საფოსტო კავშირის“ ცენტრალურ ოფისში (ბერნი, შვეიცარია).
„საერთაშორისო საფოსტო კავშირის“ წერილის წერის საერთაშორისო კონკურსმა, რომელსაც საფუძველი ჩაეყარა 1971 წელს „მსოფლიო საფოსტო კავშირის“ ტოკიოს კონგრესზე, მიმდინარე წელს 50 წლის იუბილე აღნიშნა. ყოველწლიურად, მსოფლიო მასშტაბით, კონკურსში მილიონობით მოზარდი მონაწილეობდა, რაც განპირობებულია იმ გარემოებით, რომ „მსოფლიო საფოსტო კავშირის“ წევრ 192 ქვეყანაში, ეროვნული ოპერატორები მართავენ კონკურსს. შედეგად, სხვადასხვა ქვეყანაში გამოვლენილი გამარჯვებულები, შეჯიბრს განაგრძობენ საერთაშორისო მასშტაბით. „მსოფლიო საფოსტო კავშირის“ ჟიური გამოავლენს გამარჯვებულ ქვეყანას.
2021 წლის საკონკურსო თემა, რომელსაც ყველა ქვეყნისთვის ადგენს „მსოფლიო საფოსტო კავშირი“, გახლდათ „მისწერე წერილი შენი ოჯახის წევრს შენი გამოცდილების შესახებ „კოვიდ-19“-ის პანდემიასთან დაკავშირებით“ (Write a letter to a family member about your experience of Covid-19). კონკურსის მიზანია წერილის წერის ტრადიციის აღდგენა, დამკვიდრება და წერილობითი ურთიერთობის წახალისება ახალგაზრდა თაობაში. ასევე, თანამედროვე ტექნოლოგიების ეპოქაში წერილობითი ურთიერთობების შენარჩუნება.
აღსანიშნავია, რომ ამავე დღეს, ასევე, ხელი მოეწერა ურთიერთთანამშრომლობის მემორანდუმს „საქართველოს ფოსტასა“ და „საქართველოს ეროვნულ არქივს“ შორის, რომლის ფარგლებშიც, 50-მდე რჩეული წერილი გადაეცა არქივს შესანახად. მნიშვნელოვანია, რომ აღნიშნული წერილები პანდემიასთან დაკავშირებული იშვიათი გამოცდილებისა და შინაარსის მატარებელია. ასევე, უნიკალური გზავნილია მომავალი თაობებისთვის.
აღსანიშნავია, რომ მიმდინარე წელს, საქართველოს მასშტაბით, კონკურსში მონაწილეობა მიიღო 597-მა მოზარდმა. თითოეული მათგანი სიგელებითა და საჩუქრებით დაჯილდოვდა.
