28 იანვარს, ლოს-ანჯელესში ემილი ბრონტეს რომანის მიხედვით გადაღებული ემერალდ ფენელის ფილმის – „ქარიშხლიანი უღელტეხილის“ მსოფლიო პრემიერა შედგა, რომელსაც ფილმის თითქმის მთელი გუნდი დაესწრო: ემერალდ ფენელი, მარგო რობი, ჯეიკობ ელორდი, ალისონ ოლივერი, შაზად ლატიფი და ჰონგ ჩაუ.
საღამოზე მთავარი ყურადღება კეტრინის როლის შემსრულებელმა, 35 წლის მარგო რობიმ მიიპყრო, რომელიც Schiaparelli შავ-წითელ კაბაში და ელიზაბეთ ტეილორის რვა მილიონ დოლარად შეფასებულ ყელსაბამში ბრწყინავდა.
ყელსაბამი Taj Mahal ოქროსგან არის დამზადებული, გულის ფორმის ბრილიანტი, ლალის ქვები და ნეფრიტი ამშვენებს. სამკაული ტეილორს 1972 წელს, რიჩარდ ბარტონმა აჩუქა. მასზე ამოტვიფრულია სპარსული წარწერა „სიყვარული მარადიულია“ და „ნურ ჯაჰანი“ (შაჰ ჯაჰანის ცხოვრების სინათლე).
მონღოლთა იმპერიის მმართველის ცოლი, მუმთაზ მაჰალი პირველი ქალი იყო, რომელმაც ეს ულამაზესი სამკაული თავისი ქმრის, ინდოეთისა და ახლო აღმოსავლეთის იმპერატორის, უზბეკური წარმოშობის შაჰ ჯაჰანისგან საჩუქრად მიიღო. მოგვიანებით ყელსაბამი დაიკარგა და მე-19 საუკუნეში ევროპაში მოხვდა. მე-20 საუკუნეში ის ლეგენდარული ელიზაბეთ ტეილორის ქმრის, რიჩარდ ბარტონის ხელში აღმოჩნდა, Cartier-ის დახმარებით ამჟამინდელი ფორმა მიიღო და მსახიობის კოლექციას დაემატა. ტეილორის გარდაცვალების შემდეგ ყელსაბამი, რომელიც თითქმის 500 წლის განმავლობაში სიყვარულის სიმბოლოდ ითვლებოდა, აუქციონზე გაიყიდა და თითქმის 14 წლის შემდეგ პირველად, მარგო რობის ყელზე ნახეს.
რაც შეეხება მსახიობის კაბას, პრემიერისთვის მსახიობმა Schiaparelli-ის კაბა შეარჩია, რომელიც „ჰოლივუდის ოქროს ხანის“ ესთეტიკასა და გოთიკის ბნელ რომანტიკას შორის ლავირებს. ეს უნიკალური ქმნილებაა, რომელიც დენიელ როუზბერის არცერთ ჩვენებაში არ იყო წარმოდგენილი, თუმცა ფერითა და აგებულებით მაღალი მოდის კოლექციას მოგვაგონებს, რომელიც სულ ახლახან იყო წარმოდგენილი.
მარგო რობიმ ჟურნალისტებთან საუბრისას აღნიშნა, რომ იმ საღამოს თავს ნამდვილად ელიზაბეტ ტეილორის ორეულად გრძნობდა. კინოს ისტორიაში ერთ-ერთი ყველაზე ცნობილი მსახიობის ალუზიამ კლასიკურ ჰოლივუდურ მემკვიდრეობასა და ქალურობის თანამედროვე ინტერპრეტაციას შორის კავშირს ხაზი გაუსვა, რომელსაც მსახიობი წითელ ხალიჩაზე სულ უფრო ხშირად ავლენს.
ასევე დაგაინტერესებთ
#OK! მარგო რობის გზა გაჭირვებული ბავშვობიდან “ბარბის” ჰოლივუდურ ცხოვრებამდე
