ლეგენდარული ავტომრბოლელი მიხაელ შუმახერი საწოლს მიჯაჭვული აღარ არის – ის ეტლით გადაადგილდება. ცნობილი სპორტსმენის შესახებ ინფორმაციას Daily Mail-ი ავრცელებს.
შეგახსენებთ, რომ 2013 წლის დეკემბერს შუმახერი ფრანგული ალპების ცნობილ კურორტ მერიბელში ისვენებდა, სადაც ტრაგიკული ინციდენტი მოხდა. მიუხედავად იმისა, რომ ცნობილი ავტომრბოლელი გამოცდილი მოთხილამურე იყო, მისმა ერთმა გადაწყვეტილებამ სპორტსმენის მთლიანი ცხოვრება შეცვალა.
29 დეკემბერს, თხილამურებზე სრიალისას შუმახერმა ტრასის მიღმა გადასვლა გადაწყვიტა და სრიალი გაუკვალავ თოვლში, პატარა ქვებით სავსე გზაზე განაგრძო. სპორტსმენი ერთ-ერთ თოვლით დაფარულ ლოდს გამოედო, ჰაერში ავარდა და დაცემისას თავი ლოდზე დაარტყა, რის შედეგადაც 1 წლის განმავლობაში კომაში იმყოფებოდა.
2 ურთულესი ოპერაციის შემდეგ მიხაელ შუმახერი კომატოზური მდგომარეობიდან გამოიყვანეს, ინციდენტიდან 12 წლის შემდეგ კი ის საწოლს მიჯაჭვული აღარ არის და ეტლით გადაადგილდება.
ცნობილ ავტომრბოლელზე მუდმივად ზრუნავს მისი მეუღლე, კორინა, რომელთანაც იგი უკვე 30 წელია ქორწინებაში იმყოფება. კორინა ექთნებისა და თერაპევტების პროფესიონალურ გუნდთან ერთად სპორტსმენს 24-საათიანი მეთვალყურეობის ქვეშ უვლის.
