საფეხბურთო სამყაროში ვარსკვლავების ერთი ეპოქა დასრულდა – ეს თავი რონალდუმ და მესიმ დახურეს. მიუხედავად იმისა, რომ დღეს ახალბედა ფეხბურთელები ისეთი ყურადღების ეპიცენტრში აღარ არიან, როგორც მათი წინამორბედები, მსოფლიოში ბევრი ნიჭიერი და გამორჩეული მოთამაშე გვყავს, რომელთაგან ერთ-ერთი ჩვენი ქართველი ვარსკვლავი ხვიჩა კვარაცხელიაა.
2022 წელს ხვიჩა ნაპოლიმ 10 მილიონ ევროდ, დინამო ბათუმიდან შეიძინა, ხოლო 2025 წელს პსჟ-მ 65 მილიონ ევროდ, ოთხნახევარწლიანი კონტრაქტით დაიმატა და Paris Saint-Germain-ის პირველი ქართველი ფეხბურთელი გახდა. ამასთან, კვარა პსჟ-სთან ერთად უკვე მეორედ ჩემპიონთა ლიგის გამარჯვებული გახდა.
ხვიჩა კვარაცხელია მედიას, არა მხოლოდ მოედანზე, არამედ მის მიღმაც აინტერესებს. უცხოური პრესის ყურადღების არეალში, ამჯერად, მისი მეუღლე ნიცა თავაძე მოექცა. გასულ წელს EssentiallySports-მა ნიცა და კვარაზე საინტერესო სტატიაც შემოგვთავაზა, რათა უკეთ გაგვეცნო ჩემპიონის საყრდენი ქალი, რომელიც მიუხედავას იმისა, რომ ხშირად არ ჩანს, ყოველთვის იგრძნობა მისი მხარდაჭერა მეუღლის მიმართ
ნიცა მომავალი ექიმია, სამედიცინო განათლება თბილისის სახელმწიფო უნივერსიტეტში მიიღო. იმის გამო, რომ თბილისში სწავლობდა, ხვიჩასთან ერთად ნეაპოლში ვერ გადავიდა და საკმაოდ დიდი ხნის განმავლობაში წყვილმა დისტანციური ურთიერთობა შეინარჩუნა.
„ფეხბურთელების ცოლებმა და შეყვარებულებმა იციან, რომ ხშირად ზარებზე და შეტყობინებებზე პასუხი ჩვენი გადატვირთული გრაფიკის, ვარჯიშებისა და თამაშების გამო შეუძლებელია, თუმცა ნიცას ეს კარგად ესმის” – აღნიშნავს კვარა.
ერთმანეთი საერთო სამეგობრო წრეში გაიცნეს. როგორც თავად ამბობენ, დასაწყისში, მათ შორის მიზიდულობა არ ყოფილა, თუმცა დროთა განმავლობაში ქიმია გაჩნდა. მოგვიანებით წყვილმა საზოგადოებაში გამოჩენაც დაიწყო და 2022 წელს ფეხბურთელმა შეყვარებული ოფიციალურად გაგვაცნო.
2023 წლის, 16 ოქტომბერს მათი ორწლიანი ურთიერთობა ქორწილით დაგვირგვინდა. ჯვარი ქაშუეთის ეკლესიაში დაიწერეს, შემდეგ კი მოკრძალებული ქორწილი რესტორან ფუნიკულიორში გადაიხადეს.
EURO 2024 play-offs-ის ფინალში მატჩის დასრულების დროს, ფეხბურთელმა გულშემატკივრებს სასიხარულო ინფორმაცია გაუზიარა და აცნობა, რომ ის და მისი მეუღლე, ნიცა თავაძე პირველ შვილს, ბიჭს ელოდებოდნენ. დამიანე 2024 წლის აგვისტოში დაიბადა და წყვილის ცხოვრებაში დიდი ბედნიერება შემოიტანა.
„ჩემი ცხოვრება მთლიანად შეიცვალა! უცბად ვიგრძენი დიდი პასუხისმგებლობა, ჩემი შვილის დაბადებამ უზარმაზარი ბედნიერება მომიტანა და ახლა ყველაფერს სხვანაირად ვუყურებ. ყოველ დილით ბედნიერად ვიღვიძებ და ვისურვებდი, ყველა განიცდიდეს ამას”.
საზოგადოებაში ყოველთვის დიდი ინტერესია ნიცა თავაძის მიმართ, რომელიც წარმატებულ ფეხბურთელს ზურგს უმაგრებს, თუმცა ისინი პირადი ცხოვრების გასაჯაროებისგან თავს იკავებენ და ყოველთვის ცდილობენ ეს ცხოვრების ეს ორი მხარე გამიჯნონ.
