ფინეთის განათლების სისტემა მსოფლიოში ერთ-ერთი საუკეთესოა. ფინური სწავლების მეთოდები ჰუმანური და მოსწავლეთა კეთილდღეობაზე ორიენტირებულია. სკოლები ბავშვებს უფასო კვებას სთავაზობენ. ბუფეტში ცალკეა კერძები ვეგეტარიანელებისა და ალერგიის მქონე ბავშვებისთვის. არსებობს პურის დაახლოებით ექვსი სახეობა. ჩვენ გაგიზიარებთ ფინური სკოლების შესახებ რამდენიმე საინტერესო ფაქტს, რაც ადასტურებს, რომ კარგი განათლების მიღება გადაღლისა და შეზღუდვების გარეშეც შეიძლება.
1. ფინური სკოლის სასადილოში საკვები უფასოა, ამასთან, მრავალფეროვანი და შეუზღუდავი რაოდენობით. გარდა ამისა, მოსწავლისთვის ექსკურსიები და სასკოლო ნივთებიც უფასოა.
2. ფინეთში 10 ქულიანი შეფასების სისტემაა, მაგრამ ფინურ სკოლებში შეფასებებს მესამე კლასამდე არ იყენებენ. მესამედან მეშვიდე კლასამდე სიტყვიერი შეფასებები მოქმედებს: „საშუალოდან“ „შესანიშნავამდე“. შეფასებებისთვის საყვედური აქ მიღებული არ არის. ის მხოლოდ ცოდნის გასაუმჯობესებლად და ინდივიდუალური სასწავლო გეგმის შესაცვლელად გამოიყენება.
3. თითოეული მოსწავლე ინდივიდუალური მიდგომით სარგებლობს. მოსწავლეებს ერთ გაკვეთილზე სხვადასხვა სირთულის დავალებების შესრულება შეუძლიათ. სხვადასხვა ფიზიკური და გონებრივი შესაძლებლობების მქონე ბავშვები ერთად სწავლობენ. თუ ბავშვს მასალის დაძლევა უჭირს, მასწავლებლები მისთვის ინდივიდუალურ გაკვეთილებს აწყობენ. დამატებით სხვადასხვა საგნები ისწავლება, მაგალითად, მშობლიური ენები ემიგრანტების შვილებისთვის. თუ მოსწავლეს გაკვეთილი არ აინტერესებთ, შეუძლია სხვა საქმით დაკავდეს. მაგალითად, წიგნი იკითხოს ან კეროს.
4. ფინეთის სკოლებში სასკოლო ფორმები არ არსებობს, რადგან მოსწავლეებს თვითგამოხატვა არ ეკრძალებათ. მათ შეუძლიათ ნებისმიერი ტანსაცმლის ტარება, მაკიაჟისა და თმის ვარცხნილობის გაკეთება.
5. მოსწავლეებს არ მოეთხოვებათ მერხებთან ჯდომა. გაკვეთილების დროს მათ სკამებზე ან იატაკზე ჯდომა შეუძლიათ. თბილ ამინდში გაკვეთილები სკოლის გარეთ, მწვანე ბალახზე ან ამფითეატრში ჩაშენებულ სპეციალურ სკამებზე ტარდება.
6. საშინაო დავალება ძალიან პატარა და საინტერესოა. ფინელ მასწავლებლებს მიაჩნიათ, რომ ბავშვებმა სახლში უნდა დაისვენონ და მშობლებთან ერთად დრო გაატარონ. შესაბამისად, საშინაო დავალება ძალიან ცოტა დროს მოითხოვს. მაგალითად, ისტორიის გაკვეთილზე შეიძლება ბებიასთან გასაუბრება და იმის გარკვევა გთხოვონ როგორი ცხოვრება იყო 1950-იან წლებში, რომ დაადგინოთ განსხვავება იმ დროსა და დღევანდელობას შორის.
7. ფინელი მასწავლებლები ამბობენ – ან ცხოვრებისთვის უნდა მოემზადოთ ან გამოცდებისთვის. ჩვენ პირველს ვირჩევთ, ამიტომ, ფინეთის სკოლებში გამოცდები არ არსებობს. მასწავლებელმა შეიძლება საკუთარი ინიციატივით საკონტროლო წერა ჩაატაროს. ერთადერთი სავალდებულო მოთხოვნაა სტანდარტიზებული ტესტის ჩაბარება 16 წლის ასაკში, სკოლის დამთავრების შემდეგ.
8. ფინელ ბავშვებს მხოლოდ იმას ასწავლიან, რაც ცხოვრებაში გამოადგებათ. ყველაზე მნიშვნელოვანი, რასაც ბავშვები აქ სწავლობენ, ახალ, მუდმივად ცვალებად სამყაროსთან ადაპტაციის უნარია. არაფრის დაზეპირება საჭირო არ არის – შეგიძლიათ ინფორმაცია ვიკიპედიაში მოძებნოთ.
9. ფინეთში „ელიტური“ სკოლები არ არსებობს, ყველა სკოლა თანაბრად კარგია, ამიტომ ბავშვები სახლთან ახლოს მდებარე სკოლაში დადიან. სადაც არ უნდა ცხოვრობდეს ბავშვი, მას აქვს წვდომა საგანმანათლებლო დაწესებულებაზე, სადაც კვალიფიციური მასწავლებლები, მაღალი ხარისხის სასწავლო მასალები და ნოყიერი კვებაა.
10. ზოგჯერ სკოლებში საღამოები იმართება, რასაც ღამისთევა მოჰყვება. ბავშვები სახლიდან საძილე ტომრებს მოაქვთ და ღამეს სკოლაში, მასწავლებლებთან ერთად ატარებენ – ფილმებს უყურებენ და თამაშობენ, დილით კი საუზმეს ნაყინთან ერთად მიირთმევენ. როგორ არ უნდა გიყვარდეს ასეთ სკოლა?
11. მასწავლებლები ერთსა და იმავე სკოლაში დიდი ხნის განმავლობაში არ მუშაობენ. ისინი სამსახურს ხშირად იცვლიან. მაგალითად, დედაქალაქში მცხოვრები მასწავლებელი შეიძლება გარკვეული დროით სოფელში ასწავლიდეს და პირიქით.
12. მოსწავლეები თავად ირჩევენ დამატებით საგნებს და საკუთარ გრაფიკს ქმნიან. მათ ასევე შეუძლიათ აირჩიონ მასწავლებელი, ვისთანაც სწავლა უნდათ.
13. მოსწავლისთვის ყველა სახელმძღვანელო და საკანცელარიო ნივთი უფასოა. ის თავის ნივთებს პირად კარადაში ტოვებს, ამიტომ, ფინეთში ვერ ნახავთ მოსწავლეს, რომელსაც უზარმაზარი ზურგჩანთა მიაქვს.
14. დაწყებითი სკოლის მოსწავლეებს შესვენების დროს სკოლის ეზოში სასეირნოდ უშვებენ. ეს სავალდებულოა, იმის მიუხედავად, გარეთ წვიმს თუ 20 გრადუსიანი ყინვაა.
15. მობილური ტელეფონები აკრძალული არ არის, მაგრამ გაკვეთილზე მათი გამოყენება არ შეიძლება. ამასთან, მოსწავლეებს საკლასო ოთახში გამოსაყენებლად პლანშეტები და ლეპტოპები ეძლევათ.
16. თუ მოსწავლეები სკოლიდან მოშორებით ცხოვრობენ, ისინი სკოლიდან სახლამდე და სახლიდან სკოლამდე სკოლის ავტობუსით გადაჰყავთ. მოსწავლეების ტრანსორტირების ხარჯებს სახელმწიფო ფარავს – ქვეყნის მთლიანი ბიუჯეტის 12.2% განათლებაზეა გამოყოფილი.
როგორც ხედავთ, ფინელ მოსწავლეებს უყვართ სკოლა, არ იტანჯებიან გამოცდებისთვის მზადებისას და ხშირად ერთობიან. ამის მიუხედავად, საერთაშორისო კვლევების თანახმად, მსოფლიოში ცოდნის ყველაზე მაღალ დონეს აჩვენებენ და ერთ-ერთი ყველაზე ნაკითხები არიან.
