თანამედროვე სამუშაო კულტურის, კარიერული განვითარებისა და ახალი შესაძლებლობების გარშემო შექმნილი Unlimited Summit ოქტომბერში მნიშვნელოვნად გაზრდილი მასშტაბით გაიმართება. 24–25 ოქტომბერს, Expo Georgia-ში, ორდღიანი სამიტი 7,000-მდე მონაწილეს, 120 ქართველ და საერთაშორისო სპიკერსა და 80-მდე კომპანიას გააერთიანებს.
Unlimited Summit 360-გრადუსიანი პლატფორმაა, რომელიც თანამედროვე პროფესიულ გარემოში მიმდინარე ცვლილებების განხილვას ცოდნის, გამოცდილებისა და პრაქტიკული შესაძლებლობების გაზიარებასთან აერთიანებს.
პროგრამის ფარგლებში ყურადღება დაეთმობა პროფესიონალებისა და დამსაქმებლების ცვალებად მოლოდინებს, ტექნოლოგიების გავლენას სამუშაო პროცესზე და კარიერული განვითარების ახალ გზებს. მონაწილეებს შესაძლებლობა ექნებათ, დაამყარონ პროფესიული კავშირები და აღმოაჩინონ ახალი კარიერული თუ ბიზნეს შესაძლებლობები, კომპანიებს კი — წარადგინონ საკუთარი პროდუქტები და სერვისები და წარმოაჩინონ საკუთარი თავი როგორც ბიზნესის, ისე დამსაქმებლის პერსპექტივიდან.
სამიტის ძირითადი მიმართულებები
- თანამედროვე სამუშაო კულტურა და საერთაშორისო გამოცდილება — ქართველი და საერთაშორისო სპიკერები ისაუბრებენ AI-ზე, ტექნოლოგიებზე, ლიდერობაზე, ციფრულ ტრანსფორმაციაზე, მარკეტინგზე, თანამშრომელთა მოტივაციასა და პროფესიულ გარემოში მიმდინარე ცვლილებებზე.
- კარიერა და განათლება — დასაქმებისა და განათლების გამოფენები მონაწილეებს დამსაქმებლებთან, საგანმანათლებლო ორგანიზაციებთან და ახალ კარიერულ შესაძლებლობებთან დააკავშირებს.
- ბიზნესი და სტარტაპები — Startup & Company Expo, B2B შეხვედრები და ნეთვორქინგის სივრცეები კომპანიებს, სტარტაპებსა და პროფესიონალებს ახალი საქმიანი კავშირების შექმნის შესაძლებლობას მისცემს.
წლევანდელი პროგრამა განსაკუთრებულ ყურადღებას დაუთმობს იმ ადამიანების გამოცდილებასაც, რომლებმაც პროფესიულ თუ ბიზნეს გზაზე მნიშვნელოვანი წარმატების მიღწევამდე არაერთი გამოწვევა და მარცხი გაიარეს. სპეციალური სტუმრები და სპიკერები აუდიტორიას გაუზიარებენ საკუთარ გამოცდილებას — როგორ განვითარდნენ, როგორ გაუმკლავდნენ წარუმატებლობას, რა დაეხმარათ თავიდან დაწყებასა და წინსვლაში და რა ისწავლეს ამ პროცესში.
ამ გამოცდილებას საერთაშორისო პერსპექტივაც გააძლიერებს: სამიტის პროგრამაში მონაწილეობას მიიღებენ წამყვანი ტექნოლოგიური კომპანიებისა და პლატფორმების წარმომადგენლები, მათ შორის Microsoft, Asana, monday.com, Higgsfield, OpenAI, Meta, Google, n8n, Canva, Lovable, Claude და სხვა.
Unlimited Summit პირველად 2026 წლის აპრილში გაიმართა და 500-მდე მონაწილესა და 50-ზე მეტ სპიკერს უმასპინძლა. რამდენიმე თვის შემდეგ, ოქტომბრის სამიტი უკვე Expo Georgia-ს ხუთ პავილიონს — №3, №4, №5, №6 და №11-ს — მოიცავს და 7,000-მდე მონაწილეს გააერთიანებს.
Unlimited Summit-ის მიზანია ჩამოყალიბდეს რეგიონულ პლატფორმად, რომელიც ხელს შეუწყობს პროფესიული და ბიზნეს ეკოსისტემის განვითარებას, ახალი შესაძლებლობების შექმნასა და საქართველოს საერთაშორისო კავშირების გაძლიერებას.
ამ ხედვის ერთ-ერთი მთავარი მიმართულებაა „გლობალური ხიდი“ (Global Bridge) — ინიციატივა, რომელიც ქართული ტალანტებისა და ბიზნესებისთვის საერთაშორისო ბაზრებთან, კომპანიებთან, ინვესტორებსა და პარტნიორ ორგანიზაციებთან თანამშრომლობის ახალ შესაძლებლობებს შექმნის.
ამავე ეკოსისტემის ფარგლებში Unlimited ქმნის ტალანტების პლატფორმას — პროფესიონალთა სტრუქტურირებულ ბაზას, რომელიც კომპანიებს საშუალებას მისცემს, Unlimited-ის ქომიუნითის ფარგლებში საჭირო სპეციალისტები პროფესიისა და გამოცდილების მიხედვით მოძებნონ. პლატფორმის მიზანია კომპანიებსა და პროფესიონალებს შორის კავშირი სამიტის დღეებს გასცდეს და დამსაქმებლებისთვის შესაბამის ტალანტზე წვდომა უფრო მარტივი და ეფექტური გახდეს.
„აპრილში ჩატარებულმა პირველმა სამიტმა დაგვანახა, რამდენად დიდია მოთხოვნა სივრცეზე, რომელიც პროფესიონალებს, ბიზნესსა და ახალ შესაძლებლობებს ერთმანეთთან აკავშირებს. დღეს სამუშაო გარემო და კარიერული განვითარების გზები სწრაფად იცვლება — იცვლება როგორც პროფესიონალების მოლოდინები, ისე ის, თუ რას ეძებენ კომპანიები. ოქტომბერში გვინდა ეს დიალოგი კიდევ უფრო ფართო მასშტაბზე გადავიტანოთ, გავაერთიანოთ ადგილობრივი და საერთაშორისო გამოცდილება და შევქმნათ შესაძლებლობები, რომლებიც სამიტის დასრულების შემდეგაც გაგრძელდება. სწორედ ამიტომ, Unlimited-ს ვავითარებთ არა როგორც ერთჯერად ღონისძიებას, არამედ როგორც რეგიონულ პლატფორმას,“ — ამბობს ნინო ზექალაშვილი, Unlimited Summit-ის დამფუძნებელი და მთავარი ორგანიზატორი.
Unlimited Summit 2026-ს სხვადასხვა სექტორის კომპანიები, ორგანიზაციები და მედია პარტნიორები უჭერენ მხარს, რომელთა წარდგენაც სამიტის ოფიციალურ საკომუნიკაციო არხებზე უკვე მიმდინარეობს.
Unlimited Summit 2026-ის ბილეთების შეძენა უკვე შესაძლებელია TKT.GE-ზე.
პროგრამის, სპიკერების, პარტნიორებისა და სამიტის სხვა სიახლეების შესახებ დამატებითი ინფორმაციისთვის თვალი ადევნეთ Unlimited Summit-ის ოფიციალურ სოციალურ ქსელებს: Facebook | Instagram | LinkedIn | TikTok
