ბრიტანეთის სამეფო კარმა ოფიციალურ ანგარიშში დაასახელა თანხა, რომელიც უელსის პრინცმა 2025 წლის განმავლობაში გამოიმუშავა. საქმე ის არის, რომ მეფე ჩარლზ III-ის უფროს ვაჟს 2022 წელს არა მხოლოდ უელსის პრინცის, არამედ კორნუოლის ჰერცოგის ტიტული და მასთან დაკავშირებული მამული ერგო. როგორც წესი, ახალი სტატუსი და მოვალეობები, მნიშვნელოვან ფინანსურ რესურსებსაც გულისხმობს. ანგარიშის თანახმად, პრინცმა კორნუოლის საჰერცოგოდან, მართვის მეორე წელს, შემოსავლის სახით 30 მილიონი დოლარი მიიღო. ეს თანხა პრინც უილიამის, ქეით მიდლტონისა და მათი სამი შვილის ოფიციალურ, საქველმოქმედო და პირად ხარჯებს ფარავს.
სამეფო ოჯახის სხვა მომუშავე წევრების მსგავსად, უელსის პრინცი ხელფასს არ იღებს. ამის ნაცვლად, მისი ყოველწლიური ხარჯები კორნუოლის საჰერცოგოდან იფარება. ეს მამული ჯერ კიდევ 1337 წელს ტახტის მემკვიდრეების უზრუნველსაყოფად მეფე ედუარდ III-მ დააარსა – მამული 52 600 ჰექტარზე განთავსებულ ფერმებსა და სახლებს მოიცავს.
სამეფო ექსპერტების მონაცემებით, პრინცი უილიამი საჰერცოგოდან მიღებულ შემოსავალზე საშემოსავლო გადასახადს იხდის (საყოფაცხოვრებო ხარჯების გამოკლებით, რომლის ზუსტი ოდენობა დაკონკრეტებული არ არის).
„დედოფალ ელისაბედის გარდაცვალების შემდეგ, პრინცი კორნუოლის საჰერცოგოს მმართველობაში სრულად ჩაერთო “, – იუწყება წყარო. მემკვიდრეობის მიღების შემდეგ, უელსის პრინცი მამულს რამდენჯერმე ეწვია, მათ შორის 2024 წლის მაისშიც, როდესაც ნიუკვეიში უსახლკარობის პრობლემებზე მიძღვნილ ღონისძიებას დაესწრო.
2024 წლის ანგარიშში, რომელიც პრინცის მმართველობის პირველ წელს ასახავდა, აღნიშნულია ცვლილებები მის მფარველობაში მყოფ ორგანიზაციებში, მათ შორის ფეხბურთის ასოციაციაში (FA). როგორც ფეხბურთის ერთგული გულშემატკივარი, უილიამი ახლა FA-ს ოფიციალური მფარველია – მანამდე ეს პოზიცია მის ბებიას, დედოფალ ელისაბედ II-ს ეკავა.
უელსის პრინცმა ასევე შეითავსა უელსის გვარდიის საქველმოქმედო ორგანიზაციისა და კორნუოლის სამეფო სასოფლო-სამეურნეო ასოციაციისა და ფონდ „Fields in Trust“-ის მფარველის მოვალეობები.
რაც შეეხება მომავალს, 2025 წლის კომპლექსური ანგარიშის თანახმად, კორნუოლის საჰერცოგოს მიზანი 2032 წლისთვის „სათბურის აირების ნულოვანი დონის“ მიღწევაა – სწორედ ამ საკითხით არის ამჟამად პრინცი უილიამი დაკავებული.
პრინცმა მდიდარ ადამიანებს რამდენჯერმე მოუწოდა, რომ დედამიწის გადარჩენაზე იფიქრონ და არა კოსმოსური ტურიზმის განვითარებაზე. „ბრწყინვალე გონების მქონე ადამიანები პლანეტის მდგომარეობის გამოსწორებაზე უნდა ფიქრობდნენ იმის ნაცვლად, რომ აქედან წასასვლელ ადგილს ეძებდნენ”, – განაცხადა პრინცმა BBC-თვის მიცემულ ინტერვიუში.
ასევე დაგაინტერესებთ
