ლეგენდარული გოგონათა ბენდის, Spice Girls-ის წევრი მელანი ბრაუნი, რომელმაც მუსიკალურ სამყაროში „Scary Spice“ – ის სახელით გახდა ცნობილი, სტილისტ რორი მაფიზე დაქორწინდა. ცერემონიალი ლონდონის კათედრალში გაიმართა.
„მეგონა, რომ აღარასდროს გავთხოვდებოდი. არც ურთიერთობა მინდოდა. თურმე, არასდროს თქვა არასდროს“ – აღნიშნავს მელანი ჟურნალ People-თან საუბრისას.
წყვილი 2022 წელს, კლივდენის სასტუმროში დაინიშნა, სადაც მაფიმ სიყვარული ვარდის ფურცლებისა და ბუხრის ფონზე აუხსნა.
ქორწილში იყვნენ მისი მეგობრები, მათ შორის მოდელი და მსახიობი კარა დელევინი, თუმცა საზოგადოების განხილვის საგანი ვიქტორია ბექჰემის, მელ სი-სა და გერი ჰალიველის არყოფნა გახდა. ცერემონიალს ერთადერთი „Spice Girls“-ის წევრი, ემა ბანტონი ესწრებოდა.
როგორც უკვე აღვნიშნეთ, ვიქტორია ბექჰემი (Posh Spice) ცერემონიას არ ესწრებოდა, თუმცა მეგობარს ინსტაგრამის სთორით მიულოცა:
„სიყვარულს გიგზავნი, @officialmelb! რორი ნამდვილად იღბლიანი კაცია!“
მელანი ბიმ ბრიტანელი დიზაინერის, Josephine Scott-ის ელეგანტური საქორწინო კაბა შეარჩია. მის გვერდით იყვნენ ქალიშვილები – ფენიქსი, ანჯელ ირისი და მედისონი.
1990-იანების საკულტო გოგონათა ბენდი, რომელმაც სიტყვა „girl power“ პოპკულტურაში შეიტანა, დღემდე არ კარგავს პოპულარობას. მელანი ბი-ს ქორწილმა გულშემატკივრებს კიდევ ერთხელ შეახსენა ის დრო, როცა ხუთი ძლიერი ქალი სხვადასხვა სტილით, ხასიათითა და ენერგიით ბრწყინავდა სცენაზე.
