6 მარტს პარიზის მოდის კვირეულის ფარგლებში ბალენსიაგას ჩვენება ჩატარდა. შოუ ძალიან ემოციური იყო, დემნამ ღიად გამოხატა თავისი მხარდაჭერა უკრაინის მიმართ. აღნიშნულ ჩვენებას ესწრებოდა ინსტაგრამ გვერდის demnagram-ის ავტორი საბა ბახია. თუ როგორ მოხვდა საბა BALENCIAGA-ს ჩვენებაზე და რომელი ცნობილი ადამიანები გაიცნო კულისებში მან, ამ ყველაფრის შესახებ OK! გაესაუბრა.
პირველ რიგში გაგვეცანით, ვინა არის საბა ბახია?
საბა ბახია არის 22 წლის დევნილი. ჩემი ოჯახი აფხაზეთიდან დევნილია. მართალია მე სოხუმი არასდროს მინახავს, მაგრამ მის მიმართ განსაკუთრებული გრძნობები მაქვს. ძალიან მძიმეა ის რეალობა, რა რეალობაშიც ახლა ვართ. მე ვარ დამამთავრებელი კურსის სტუდენტი. ვსწავლობ ეკონომიკას და პარალელურად ვმუშაობ ბუღალტრის ასისტენტად.
პირველად როდის დაინტერესდით მოდით?
მოდა სულ იყო ჩემს ცხოვრებაში, თუმცა მის მიმართ დიდი ინტერესი მას შემდეგ გამიჩნდა, რაც დემნა გამოჩნდა მოდის ინდუსტრიაში. ამან დიდი გავლენა იქონია ჩემზე და მის მერე უფრო აქტიურად ვადევნებ თვალყურს მოდაში მიმდინარე მოვლენებს.
რატომ დემნა და BALENCIAGA და არა სხვა დიზაინერი ?
ჩემთვის ბალენსიაგა დემნას ხელმძღვანელობით არის N1 ბრენდი მსოფლიოში მრავალი მიზეზის გამო. დემნა გვასალია არის ჩვენი თაობის ყველაზე მნიშნელოვანი დიზაინერი. მან დიდი რევოლუცია მოახდინა მოდაში და სწორედ ამის გამო მოდა არსებობს დემნამდე და დემნას შემდეგ. მისი თითოეული ჩვენება არის ნამდვილი ხელოვნების ნიმუში. იგი არის ქართველი ისევე როგორც მე და ეს ყველაფერს კიდევ უფრო განსაკუთრებულს ხდის. ამაყი ვარ მისი ყოველი წარმატებით.
როდის გაგიჩნდათ DEMNAGRAMI-ს შექმნის იდეა?
დემნაგრამის შექმნის იდეა სპონტანურად გამიჩნდა. ეს იყო 2018 წელს. მაშინ ვერც კი წარმომედგინა, რომ ეს გვერდი ასეთი წარმატებული იქნებოდა. ჩემი მთავარი მიზანი იყო, გამომეხატა ჩემი წილი პატივისცემა ამ გენიოსი ადამიანის მიმართ. მინდოდა მას ეგრძნო რომ საქართველოში ძალიან ვაფასებთ. დემნა არის ნამდვილი გენიოსი და იმსახურებს ყველაფერს კარგს ცხოვრებაში იმისთვის, რასაც აკეთებს ის. მან ასეე, უამრავ ქართველ დიზაინერს მსოფლიო მოდის კარი გაუღო.
როგორ მოხვდით დემნას ჩვენებაზე?
ჩვენებაზე თავად დემნას სურვლით მოვხვდი. დემნა დამიკავშირდა და დამპატიჟა. ძალიან ბედნიერი ვიყავი, რადგან ისეთი ნიჭიერი და წარმატებულ დიზაინერის ჩვენაბაზე დასწრება როგორიც დემნაა არის უდიდესი პატივი. დემნასთან საუბრის შემდეგ დამიკავშირდა ბალენსიაგას გუნდი, დაიგეგმა მოგზაურობა და ჩავფრინდი პარიზში, დანარჩენი უკვე თქვენც იცით.
როგორი შთაბეჭდილება დატოვა დემნამ პირადი შეხვედრისას?
დემნა არის ერთ-ერთი ყველაზე უშუალო და კეთილი ადამიანი, ვისაც კი შევხვედრილვარ. ონალინ ურთიერთობითაც ვხვდებოდი ამას, მაგრამ როცა პირადად შევხვდი და გავისაუბრეთ კიდევ უფრო დავრწმუნდი, თუ როგორი მაგარი ადამიანია. ძალიან თბილად და მეგობრულად მიმიღო. მინდა ავღნიშნო, რომ გვერდის შექმნამდეც მქონდა დემნასთან რამდენიმეჯერ პატარა მიმოწერა ფეისბუქზე. სწორედ ეს შევახსენე დემნას ჩვენებაზე და ჩვენი 2017 წლის მიმოწერიდან ერთ-ერთი მონაკვეთი წავაკითხე – “გჯეროდეს შენი თავის, მიჰყევი შენს ოცნებებს და ეს მიგიყვანს კარგ ადგილას.” ჩემთვის ეს სიტყვები ძალიან ინსპირაციული იყო მაშინაც და ეხლაც. ძალიან გაუხარდა ამის ნახვა და ჩემგან ამ სიტყვების მოსმენა. ბევრი ვისაუბრეთ ქართულად და მოკითხვა დამაბარა ქართველებთან.
დამეთანხმებით ალბათ, რომ აღნიშნული ჩვენება ძალიან ემოციური იყო, როგორი იყო თქვენი ემოციები ჩვენების შემდგომ?
ახლაც შთაბეჭდილების ქვეშ ვარ. დიდი პატივია დემნას ჩვენებაზე დასწრება. ერთ-ერთი მიზეზი, თუ რატომაც იყო ეს ჩვენება განსაკუთრებული არის ის, რომ დემნამ პირველად ჩვენების დასაწყისში და დასასრულს სიტყვით გამოვიდა, რაც მანამდე არასდროს არ მომხდარა. ასევე, ამაღელვებელი იყო იმის გამო. რომ დემნამ ამ ჩვენებით კიდევ ერთხელ დაანახა მსოფლიოს რომ ისტორიის სწორ მხარეს დგას. როდესაც სტუმრები შევედით დარბაზში სკამზე უკრაინის დროშის ფერებში გაკეთებული მაისური დაგხვდა, შემდეგ დემნამ უკრაინული ლექსით გახსნა ჩვენება, რაც ჩემთვის ძალიან საამაყო იყო. მთლიანი კოლექცია, გარემო, მუსიკა იყო ერთმანეთში კარგად შერწყმული, რაც ყველაფერს დიდებულს ხდიდა.
მოგვიყევით კულისებში რა ხდებოდა? ვიცი რომ გაიცანით ბევრი ცნობილი ადამიანი…
სიგიჟე იყო, მაგრამ ჩემთვის ყველაზე მნიშვნელოვანი რა თქმა უნდა დემნასთან შეხვედრა იყო. კულისებში შევხდი პირადად კიმ კარდაშიანს, ბელა ჰადიდს, ალექსა დემის, ფაი ხადრას და სხვა ცნობილ სახეებს. ყველაზე საინტერესო იყო კიმთან შეხვედრა, რადგან დემნამ პირადად გამაცნო ის. კიმი ძალიან თბილად შემხვდა, ცოტა ვისაუბრეთ ვკითხე, თუ იცოდა დემნაგრამის შესახებ და თქვა კი ვიცი და ძალიან მომწონს, ეს სიტყვები ძალიან ბევრს ნიშნავს ჩემთვის და ძალინ ვაფასებ.
თქვენ თვითონ თუ გიფიქრიათ მოდელობაზე ან დიზაინერობაზე?ან აპირებთ თუ არა ამ მიამრთულებით კარიერის გაგრძელებას?
არასდროს. არც დიზაინერობა და არც მოდელიბა ჩემი საქმე არ არის. მინდა გავაკეთო ის საქმე, რაშიც დარწმუნებული ვარ რომ საუკეთესო ვიქნები. ჩემი სამომავლო გეგმები მოდას უკავშირდება, მაგრამ უფრო სხვა მიმართულებით.
ქართული მედია ხშირად იყენებს Demnagram-ის ფოტოებს, როგორ ქმნით კონტენტს?
დემნაგრამის მართვა არც თუ ისე მარტივია, რადგან ეს არ არის ფან გვერდი, ეს არის მხარდამჭერი გვერდი და მათ შორის დიდი განსხვავებაა. ფან გვერდები ხშირად წერენ ისეთ ინფორმაციას, რაც ჩემთვის კატეგორიულად მიუღებელია, მაგალითად პირადი ცხოვრების დეტალები. მე ვცდილობ გავმიჯნო დემნას პირადი ცხოვრება და დემნას საქმიანობა ერთმანეთისგან. კონცენტრირებული ვარ მის საქმიანობაზე. სანამ რაიმეს დავპოსტავ მრავალჯერ ვამოწმებ, რომ სანდო წყარო ვიყო იმისთვის, ვინც თვალყურს ადევნებს ჩემს გვერდს. სწორედ ამის გამოა დემნაგრამი ასეთი წარმატებული და ეს ძალიან მახარებს.
რა არის ეს გვერდი თქვენთვის? რა სამომავლო გეგმები გაქვთ
ეს გვერდი ჩემთვის ძალიან მნიშნელოვანია. დემნაგრამი მნიშნელოვანი პლატფორმაა მოდის მოყვარულებისთვისაც. გვერდი კიდე უფრო განვითარდება. სამომავლო გეგმებზე ჯერ-ჯერობით არ ვისაუბრებ, მაგრამ დიდი გეგმები მაქვს და ამას მალე გაიგებთ.
იხილეთ ასევე:
#OK! საბა ბახიას ახდენილი ოცნება – შეხვედრა დემნა გვასალიასთან
