20 იანვარს ლილიტი მშვილდოსნის ცეცხლოვან ნიშანში გადავიდა. ლილიტი ანუ შავი მთვარე თქვენს ნატალურ რუკაში არსებული ბნელი ქალური ენერგიაა. ის დაუმორჩილებლობასა და მარგინალიზაციას, ასევე კაცობრიობის უხილავ მხარეებს განასახიერებს.
რა არის ლილიტი?
შავი მთვარე ლილიტი ღვთაებრივი ქალურობის ბნელი არქეტიპია, რომელიც კაცობრიობაში ქალური საწყისის არაღიარებულ სიბრძნეს და დემონიზებულ მხარეებს წარმოადგენს. მისი არსებობა ველურ და პირველყოფილ ემოციებს აღვიძებს.
რა არის შავი მთვარე ლილიტი ასტროლოგიაში?
შავი მთვარე ლილიტი პლანეტა კი არა, კოსმოსის იდუმალი, უხილავი წერტილია. ის განასახიერებს ფარულ, მოუთვინიერებელ ქალურობას, რომელიც მთვარის ნაზი შუქის მიღმა იმალება.
რადგან ლილიტი მშვილდოსნის ნიშანში გადადის, ის აქცენტს რწმენაზე, იდეოლოგიაზე, სიმართლის ძიებასა და თავისუფლებაზე აკეთებს. მშვილდოსანი ოპტიმისტია, ლილიტი კი ფანატიზმს, დოგმების მსხვრევას ან პირიქით, ზედმეტ თავდაჯერებულობას ამჟღავნებს.
20 იანვარს ბოროტი შავი მთვარე ლილიტი მშვილდოსნის ცვალებად ცეცხლოვან ნიშანში გადავა და იქ 14 სექტემბრამდე დარჩება. მშვილდოსნის ზოდიაქოს ნიშანი სიმბოლურად თავისუფლებას, ჰორიზონტების გაფართოებას, რწმენას, სულიერებას, ოპტიმიზმს და უსაზღვრო შესაძლებლობების ძიებას გამოხატავს.
შავი მთვარე ლილიტის ტრანზიტი მშვილდოსანში, სავარაუდოდ, პატრიარქალური რელიგიური ავტორიტეტის წინააღმდეგ აჯანყებას გამოიწვევს. შესაძლოა, ახალი მასობრივი პროტესტების, სულიერი რეფორმების და იმ სისტემების საჯარო უარყოფის მოწმენი გავხდეთ, რომლებიც რელიგიის ან გადაადგილების თავისუფლებას თრგუნავენ. იმიგრაციასთან, საზღვრებთან, საგარეო პოლიტიკასთან და ადამიანის უფლებებთან დაკავშირებული პრობლემები სავარაუდოდ, გამწვავდება, რაც ადამიანებს აიძულებს, სხვადასხვა უწყებებს დაუპირისპირდნენ, რომლებიც კულტურულ, ეთნიკურ ან სულიერ ავტონომიას ზღუდავენ.
ნახეთ, რას უნდა ელოდოს ზოდიაქოს თითოეული ნიშანი ამ ტრანზიტის დროს.
ცეცხლის ნიშნები (ვერძი, ლომი, მშვილდოსანი)
მშვილდოსანი: ლილიტი თქვენს ნიშანშია. ესაა პერიოდი, როდესაც თქვენი ქარიზმა მწვერვალს აღწევს, მაგრამ ჩნდება რისკი, რომ ზედმეტად იმპულსური ან ეგოცენტრული გახდეთ. შესაძლოა, გარშემომყოფებმა თავისუფლებისკენ თქვენი სწრაფვა ამბოხად აღიქვან.
ვერძი: ლილიტი თქვენს მე-9 სახლშია (მსოფლმხედველობა). შესაძლოა, საკუთარ რწმენასა და რელიგიური შეხედულებებში ეჭვი შეგეპაროთ. ფრთხილად იყავით უცხოელებთან ურთიერთობისას ან შორ მოგზაურობებში – ნუ ენდობით ყველას, ვინც „ჭეშმარიტების აღმოჩენას“ გპირდებათ.
ლომი: ლილიტი მე-5 სახლშია (შემოქმედება, სიყვარული). ეს მგზნებარე სიყვარულს ან შემოქმედებით აფეთქებას მოგიტანთ, თუმცა, არსებობს აზარტულ თამაშებში ჩათრევის ან შვილებთან ურთიერთობაში დაძაბულობის რისკი.
მიწის ნიშნები (კურო, ქალწული, თხის რქა)
კურო: ლილიტი მე-8 სახლშია (კრიზისები, სხვისი ფული). ეს რთული, პერიოდია. შესაძლოა გაიღვიძოს ინტერესმა ეზოთერიკის მიმართ. მოერიდეთ სარისკო ფინანსურ მაქინაციებს და ვალების აღებას.
ქალწული: ლილიტი მე-4 სახლშია (ოჯახი, სახლი). შესაძლოა თავი იჩინოს ძველმა საოჯახო ტრავმებმა ან მშობლებთან კონფლიქტმა. გაგიჩნდებათ სურვილი, რომ ოჯახური წნეხისგან გათავისუფლდეთ ან საცხოვრებელი ადგილი შეიცვალოთ.
თხის რქა: ლილიტი მე-12 სახლშია (ქვეცნობიერი). ეს განმარტოებისა და შინაგანი ბრძოლის პერიოდია. მოსალოდნელია წინასწარმეტყველური სიზმრები. მთავარია, საკუთარ თავში არ ჩაიკეტოთ და ილუზიებს არ მიეცეთ.
ჰაერის ნიშნები (ტყუპები, სასწორი, მერწყული)
ტყუპები: ლილიტი თქვენს საპირისპირო, მე-7 სახლშია (პარტნიორობა). მოსალოდნელია პარტნიორების მხრიდან პროვოკაციები. შესაძლოა გამოჩნდეს ძალიან მიმზიდველი ადამიანი, რომელიც თქვენით მანიპულირებას ცდილობს. ისწავლეთ საზღვრების დაცვა.
სასწორი: ლილიტი მე-3 სახლშია (კომუნიკაცია, გარემოცვა). უფრთხილდით ჭორებს და არასწორ ინფორმაციას. და-ძმებთან ან მეზობლებთან ურთიერთობაში მოსალოდნელია დაძაბულობა. თქვენი სიტყვები ახლა ჩვეულებრივზე უფრო მწვავედ ისმის.
მერწყული: ლილიტი მე-11 სახლშია (მეგობრები, გეგმები). შესაძლოა რომელიმე მეგობრის გამო იმედგაცრუება განიცადოთ. გადახედეთ სამომავლო გეგმებს და მიხვდებით, მათ შორის რომელია სხვისგან თავსმოხვეული.
წყლის ნიშნები (კირჩხიბი, მორიელი, თევზები)
კირჩხიბი: ლილიტი მე-6 სახლშია (რუტინა, ჯანმრთელობა). ყურადღება მიაქციეთ კვებას და ძილს. სამსახურში შესაძლოა ინტრიგებმა თავი იჩინოს. ეცადეთ, არ გადაიტვირთოთ და ყველაფრის იდეალურად შესრულებას ნუ ეცდებით.
მორიელი: ლილიტი მე-2 სახლშია (ფინანსები, თვითშეფასება). ჩნდება ფულის ხარჯვის ან სწრაფი გამდიდრების დაუოკებელი სურვილი. დააფასეთ ის, რაც თქვენთვის ნამდვილად ძვირფასია და თქვენს თვითშეფასებას მხოლოდ საბანკო ანგარიშს ნუ დაუკავშირებთ.
თევზები: ლილიტი მე-10 სახლშია (კარიერა, სტატუსი). შესაძლოა უფროსობის წინააღმდეგ ამბოხების სურვილი გაგიჩნდეთ. კარიერული მიზნები შეიძლება შეიცვალოს – ისეთი საქმის კეთება მოგინდებათ, რომელიც მეტ თავისუფლებას განიჭებთ, თუნდაც ეს სარისკო იყოს.
რჩევა – ლილიტი მშვილდოსანში გვაფრთხილებს, რომ ცრუ ავტორიტეტებს არ ავყვეთ და საკუთარი ფანატიზმის მსხვერპლი არ გავხდეთ.
ასევე დაგაინტერესებთ
https://devoted-emu-se5h.flyinghost.app/ok-moduri-horoskopi-romel-s/
