სოციალური მედია უკვე დიდი ხანია ჩვენი ცხოვრების განუყოფელი ნაწილი გახდა. Instagram-ის, Facebook-ის, TikTok-ისა და სხვა მრავალი პლატფორმის გახსნის გარეშე ჩვენი ყოველდღიური ცხოვრება თითქმის წარმოუდგენელია. სოციალური მედია 21-ე საუკუნეში საზოგადოებისთვის ერთ-ერთი ყველაზე მნიშვნელოვანი საკონტაქტო სივრცე გახდა, მას ადამიანები იყენებენ, არამხოლოდ ერთმანეთთან საკომუნიკაციოდ, არამედ საკუთარი ყოველდღიური ცხოვრების კადრების და ვიდეოების გამოსაქვეყნებლად. მიუხედავად ბევრი დადებითი გავლენისა, სოციალური მედია ხშირად ხდება ნეგატიური კომენტარების გავრცელების მიზეზი, რადგან ადამიანები არასასიამოვნოდ გამოხატავენ საკუთარ აზრს. სოციალური მედიის უარყოფითი გავლენის მსხვერპლი მომღერალი და ბიზნესვუმენი სელენა გომესი არაერთხელ გამხდარა.
სელენამ რამდენიმე კვირის წინ გააკეთა განცხადება, სადაც აღნიშნა, რომ მას ლუპუსის ქონის გამო ბევრი წამლების დალევა უწევს, რაც მისი სხეულის ფორმას და წონას ცვლის, რის გამოც ის ხშირად ხდება სოციალურ ქსელში დაცინვის საგანი. მომღერალმა განაცხადა, რომ მას არ ანაღვლებდა, რას წერდნენ “გაბოროტებული ადამიანები” მის შესახებ, თუმცა რამდენიმე დღის წინ აღიარა, რომ მოიტყუა: “მე არ ვამბობდი სიმართლეს, მოვიტყუე, რა თქმა უნდა, ჩემზე მოქმედებს ადამიანების დამცინავი კომენტარების წაკითხვა, ისე ვიქცევი, ვითომ არც კი ვკითხულობ მათ კომენტარებს, რადგან არ მინდა იმ ადამიანებმა ცუდად იგრძნონ თავი, რომლებსაც ასევე აწუხებთ წონის პრობლემა”.
