შპს „რობერტ ბოში“ საქართველოში 2012 წლიდან არის წარმოდგენილი. კომპანიის ერთ-ერთი წამყვანი მიმართულებაა ელექტრო სამშენებლო ხელსაწყოები. „ბოში“ ორიენტირებულია მუდმივ განვითარებაზე და მის მიზანს წარმოადგენს, შექმნას მომხმარებლის საჭიროებებსა და მაღალ სტანდარტს მორგებული პროდუქცია. დეტალური ინფორმაციისთვის OK! გაესაუბრა შპს „რობერტ ბოშის“ კავკასიის გენერალურ დირექტორს, მიხეილ ჩიქოვანს.
გვიამბეთ „რობერტ ბოშის“ შესახებ.
„რობერტ ბოშის“ კავკასიის სათავო ოფისი წარმოდგენილია საქართველოში, რომელიც ემსახურება კავკასიის სამ ქვეყანას − საქართველოს, სომხეთსა და აზერბაიჯანს. ამდენად, ამ სამი ქვეყნის ბაზრისთვის პროდუქციის მიწოდება სწორედ საქართველოდან ხორციელდება. რაც შეეხება მისი შექმნის ისტორიას, „რობერტ ბოში“ საქართველოში 2012 წელს დაფუძნდა და მას შემდეგ წამყვან პოზიციებს იკავებს ინდუსტრიაში.
გაგვაცანით თქვენი მომსახურების სფერო.
ჩვენს ძირითად მიმართულებას წარმოადგენს კომერციული და ინფრასტრუქტურული პროექტები. პროდუქციით ვამარაგებთ დიდ სამშენებლო კომპანიებს. ამასთან ერთად, „რობერტ ბოშის“ კავკასიის წარმომადგენლობა თანამშრომლობს ე.წ. დილერებთან − კომპანიებთან, რომლებიც ფლობენ „ბოშის“ პროდუქციის რეალიზების ოფიციალურ ნებართვას. შეიძლება ითქვას, ჩვენ სადილერო კომპანიებს ვაწვდით პროდუქციას, ისინი კი მომხმარებლისათვის მიწოდებას უზრუნველყოფენ.
რა სახის პროდუქციას სთავაზობთ დეველოპერულ კომპანიებს?
წარმოდგენილი გვაქვს ელექტრო სამშენებლო ინსტრუმენტების ფართო ასორტიმენტი, რომელიც აერთიანებს 4 ძირითად პროფესიულ მიმართულებას: პროფესიული ხელსაწყოები, აქსესუარები (იგივე სახარჯი მასალები), საზომი ტექნიკა და სარემონტო ნაწილები.
მთავარი ნიშა, რომელიც „ბოშის“ სამშენებლო ინსტრუმენტებს გამოარჩევს…
„ბოშის“ სამშენებლო პროდუქცია, უპირველეს ყოვლისა, გამოირჩევა ხარისხითა და უსაფრთხოების მაღალი სტანდარტით, ვინაიდან ჩვენთვის მნიშვნელოვანია, სამშენებლო ინსტრუმენტის გამოყენებისას, ერთი მხრივ, მომხმარებელი იყოს მაქსიმალურად დაცული, ხოლო მეორე მხრივ შედეგით დარჩეს კმაყოფილი.
გვესაუბრეთ კომპანიის სამომავლო გეგმებთან დაკავშირებით.
ჩვენ აქტიურად ვადევნებთ თვალს ბაზარზე მიმდინარე პროცესებსა და მომხმარებლის საჭიროებებს, რათა დროულად შევთავაზოთ მათ ინტერესებზე ორიენტირებული პროდუქცია. „ბოშისთვის“ უცვლელი რჩება მიზანი − მიაწოდოს მომხმარებლებს პროდუქტი, რომელიც გაუმარტივებს სამუშაოს შესრულებას და უზრუნველყოფს მაღალი ხარისხის შედეგს.
ტექსტი: მარიამ მთივლიშვილი
