ქეით მიდლტონმა უინძორის ციხესიმაგრეში ინგლისის ქალთა რაგბის ნაკრებს უმასპინძლა, რომლის მფარველიც თავად გახლავთ. ეს 2026 წელს პრინცესას პირველი დამოუკიდებელი სამეფო ღონისძიებაა.
უელსის 44 წლის პრინცესამ ღონისძიებისთვის Alexander McQueen-ის წითელი შარვალ-კოსტიუმი და Giavinto Rossi-ის წითელი ფეხსაცმელი შეარჩია, რაც შემთხვევითი არ ყოფილა – წითელი იმ გუნდის (წითელი ვარდები) სიმბოლოა, რომელსაც ქალთა ნაკრები მიეკუთვნება.
შეხვედრა 2025 წლის სექტემბერში, ქალთა რაგბის მსოფლიო თასზე ინგლისელების გამარჯვებას მიეძღვნა. ავტობუსის დაზიანების გამო გუნდი უინძორის ციხესიმაგრეში დაგვიანებით მივიდა, რის გამოც რეზიდენციაში დაგეგმილი კერძო ექსკურსია გაუქმდა. სპორტსმენებმა პრინცესას სამახსოვრო საჩუქრები, მათ შორის მოთამაშეების მიერ ხელმოწერილი მაისური გადასცეს. ქეით მიდლტონმა გუნდთან და მწვრთნელებთან ერთად ოფიციალური ფოტო გადაიღო.
შეგახსენებთ, რომ 2024 წელს უელსის პრინცესას მუცლის ღრუს ოპერაცია ჩაუტარდა. ამის შემდეგ ის საჯარო სივრციდან გაუჩინარდა, რასაც უამრავი კონსპირაციული თეორია მოჰყვა. მოგვიანებით ქეით მიდლტონმა განაცხადა, რომ ექიმებმა კიბოს დიაგნოზი დაუსვეს. ერთწლიანი მკურნალობის შემდეგ პრინცესამ რემისიის შესახებ გვამცნო და მალევე სამეფო მოვალეობების შესრულებას დაუბრუნდა.
ასევე დაგაინტერესებთ
#OK! Vogue -მა ქეით მიდლტონი 2025 წლის ყველაზე მოდურ ცნობილ ადამიანად აღიარა
