#OK! „ეს საქმე არ მინდა“- პრინცმა ჰარიმ დედის გარდაცვალების შემდეგ განვლილ სირთულეებზე ისაუბრა

პრინცმა ჰარიმ და მისმა მეუღლემ, სასექსის ჰერცოგინიამ, მეგანმა, კიდევ ერთხელ ისაუბრეს იმ რთულ გამოცდილებაზე, რომელიც სამეფო ოჯახის მოქმედ წევრებად ყოფნის პერიოდში ჰქონდათ. ჰარიმ აღნიშნა, რომ დედის გარდაცვალების შემდეგ „ეს საქმე“ აღარ სურდა, ხოლო მეგანმა განაცხადა, რომ ერთ დროს „მსოფლიოში ყველაზე მეტად ტროლინგის მსხვერპლი ადამიანი“ იყო.

წყვილის კომენტარები ავსტრალიაში მიმდინარე ოთხდღიანი ნახევრად-სამეფო ვიზიტის ფარგლებში გაკეთდა, რომლის დროსაც ისინი საჯარო შეხვედრებსა და კომერციულ ღონისძიებებს ესწრებიან. მელბურნში გამართულ InterEdge Summit-ზე სიტყვით გამოსვლისას, ჰარიმ გაიხსენა ტკივილი, რომელიც დედის – პრინცესა დაიანას – ავტოკატასტროფაში დაღუპვის შემდეგ განიცადა. იმ დროს ის მხოლოდ 12 წლის იყო.

„დედაჩემის გარდაცვალების შემდეგ, ჩემს 13-ე დაბადების დღემდე ცოტა ხნით ადრე, ვფიქრობდი: ‘მე ეს საქმე არ მინდა. ეს როლი არ მინდა – რაც უნდა მოჰყვეს ამას, არ მომწონს. ამან დედაჩემი იმსხვერპლა და მე ამის კატეგორიული წინააღმდეგი ვიყავი. წლების განმავლობაში თავს ვიმალავდი რეალობისგან. ბოლოს მივხვდი – თუ ამ პოზიციაში სხვა ადამიანი იქნებოდა, როგორ გამოიყენებდა ამ პლატფორმას, შესაძლებლობებსა და რესურსებს, რათა სამყაროში ცვლილება შეეტანა?“ – განაცხადა ჰარიმ.

პრინც ჰარის არაერთხელ უსაუბრია დედის სიკვდილის დამანგრეველ გავლენაზე და სწორედ ამას ასახელებს მიზეზად, თუ რატომ იცავს განსაკუთრებულად მეუღლესა და შვილებს.

ერთ-ერთ შეხვედრაზე მეგან მარკლმაც გაამახვილა ყურადღება იმ ძლიერ ზეწოლაზე, რომელსაც სამეფო ოჯახის წევრობის პერიოდში და მის შემდეგაც განიცდიდა. ავსტრალიური ფსიქიკური ჯანმრთელობის ორგანიზაცია Batyr-ის ახალგაზრდებთან შეხვედრისას მან განაცხადა, რომ წლების განმავლობაში ონლაინ ბულინგის მუდმივი სამიზნე იყო.

„ათი წლის განმავლობაში ყოველდღე მაკრიტიკებდნენ და თავს მესხმოდნენ. ერთ დროს მსოფლიოში ყველაზე მეტად ტროლინგის მსხვერპლი ადამიანი ვიყავი,“ – თქვა მეგანმა და დაამატა: „მიუხედავად ყველაფრისა, მე ისევ აქ ვარ.“

სასექსის ჰერცოგი და ჰერცოგინია სამეფო მოვალეობებს ექვსი წლის წინ ჩამოშორდნენ. მოგვიანებით მათ არაერთ ინტერვიუში, დოკუმენტურ პროექტსა და ჰარის მემუარებში აღნიშნეს, რომ გადაწყვეტილება განაპირობა ტაბლოიდური მედიის ზეწოლამ, ონლაინ სიძულვილმა, რთულმა ოჯახურმა გარემომ და ფინანსური დამოუკიდებლობის სურვილმა.