ცნობილი ბრიტანელი მოდის დიზაინერი – პოლ კოსტელო 80 წლის ასაკში გარდაიცვალა,- ინფორმაციას The Independent-ი ავრცელებს.
მოდის ბრენდმა – Paul Costelloe Collections-მა დამფუძნებლის გარდაცვალება დაადასტურა და დასძინა, რომ დიზაინერი ხანმოკლე ავადმყოფობის შემდეგ, ოჯახის წევრების გარემოცვაში, მშვიდად გარდაიცვალა.
პოლ კოსტელო პრინცესა დიანას პირად დიზაინერად ითვლებოდა და მასთან 1983 წლიდან 1997 წლამდე თანამშრომლობდა.
ის 1945 წელს დუბლინში დაიბადა. კოსტელოს კარიერა მოდის სფეროში გრაფტონის მოდის დიზაინის აკადემიაში სწავლით დაიწყო, რის შემდეგაც პარიზში გაემგზავრა. 1979 წელს დიზაინერმა საკუთარი ბრენდი, Paul Costelloe Collections, დააარსა, ხოლო 1983 წელს უელსის პრინცესა დიანას პირადი დიზაინერი გახდა და მასთან დიანას გარდაცვალებამდე თანამშრომლობდა.
კოსტელოუ ენ კუპერზე იყო დაქორწინებული. წყვილს შვიდი შვილი ჰყავდა: ჯესიკა, უილიამი, რობერტი, გევინი, ჯასტინი, პოლ ემეტი და ნიკოლასი.
კოსტელო პრინცესასთან ძირითადად, ოფიციალური ლუქების შექმნაზე მუშაობდა, თუმცა მისმა ზოგმა ნამუშევარმა კამათი და აზრთა სხვადასხვაობა გამოიწვია. ერთ-ერთი ასეთი ნამუშევარი იყო შიფონის ქვედაკაბა, რომელიც შუქზე ოდნავ გამჭვირვალე ხდებოდა. პრინცესას სამოსის გარდა, კოსტელომ British Airways-ისა და Delta Airlines-თვის კორპორატიული სამოსი და ირლანდიის ოლიმპიური ნაკრების სპორტული ფორმები შექმნა.
ადრე, მოდის დიზაინერმა დევიდ ემანუელმა აღნიშნა, რომ პრინცესა დიანას სტილს ბევრი თანამედროვე ცნობილი ადამიანი იმეორებს. მაგალითად, უელსის პრინცესას საყვარელი Mom Jeans მოდური გახდა. ეს შარვალი რამდენიმე წლის წინ მოდაში დაბრუნდა და მას მოდელები როზი ჰანტინგტონ-უაითლი, ბელა ჰადიდი და სხვები ატარებდნენ.
ასევე დაგაინტერესებთ
