25 დეკემბერს, ბრიტანეთის სამეფო ოჯახი ტრადიციულ საშობაო წირვაზე, სანდრინგემში შეიკრიბა.
როგორც ყოველთვის, ქეით მიდლტონი ამჯერადაც მოხდენილად გამოიყურებოდა. უელსის პრინცესამ შოკოლადისფერი Blaze Milano-ს პალტო მოირგო, რომელიც ამ დღემდე ოთხჯერ ეცვა. ქეითმა პალტოს Gucci-ს ქვედაბოლო, Gianvito Rossi-ის ჩექმები, Cornelia James-ის ხელთათმანები, Demellier London-ის ჩანთა, Juliett Botterill-ის ქუდი, Really Wild Clothing-ის მოსახვევი და Cartier-ის საყურეები შეუხამა, რომლებსაც მთელი წლის განმავლობაში ატარებდა.
პრინცესა შარლოტას ღია ფერის პალტო ეცვა, რომლის შოკოლადისფერი საყელო, ღილები, მანჟეტები და ჯიბეები ქეით მიდლტონის სამოსს იდეალურად ეხამებოდა. პრინცესებისგან განსხვავებით, ოჯახის მამრობითი სქესის წარმომადგენლებმა უპირატესობა მუქი ლურჯი ფერის სამოსს მიანიჭეს. პრინცებს თითქმის ერთნაირად ეცვათ: მოკლე პალტოები, თეთრი პერანგები, კლასიკური შარვლები, ტყავის ფეხსაცმელი და კონტრასტული ჰალსტუხები.
ჯეფრი ეპშტეინთან კავშირის გამო საშობაო წირვაზე არ მიიწვიეს პრინცი ენდრიუ და მისი ყოფილი ცოლი სარა ფერგიუსონი. მას შემდეგ, რაც გაჩნდა მტკიცებულებები, რომლებიც გარდაცვლილ მილიარდერსა და იორკის ყოფილ ჰერცოგს შორის მჭიდრო კავშირებს ადასტურებს, მონარქიას მასთან რაიმე ურთიერთობა არ სურს.
სამეფო ოჯახის დანარჩენ წევრებთან ერთად, სანდრინგემში, საშობაო წირვას ყოფილი პრინცი ენდრიუს ქალიშვილები, პრინცესები ბეატრისი და ევგენია დაესწრნენ, რაც საზოგადოებამ ენდრიუსგან დისტანცირებად და მეფე ჩარლზ III-ის მიმართ სოლიდარობის ნიშნად აღიქვა. ფაქტობრივად, ეს ენდრიუ მაუნტბატენ-უინძორის უარყოფაა სამეფო ოჯახთან ურთიერთობის შესანარჩუნებლად.
ოქტომბრის ბოლოს მეფე ჩარლზ III-მ თავის უმცროს ძმას, ენდრიუს ბიზნესმენ ჯეფრი ეპშტეინთან კავშირის გამო ყველა სამეფო ტიტული და წოდება ოფიციალურად ჩამოართვა. ენდრიუმ უინძორის სასახლეში თავისი რეზიდენცია Royal Lodge-იც დატოვა.
ასევე დაგაინტერესებთ
#OK! მეფე ჩარლზ მესამემ უმცროს ძმას პრინცის ტიტული ჩამოართვა და სასახლიდან გააძევა
